Еркин Қарақалпақстан Вести Каракалпакстана 06:35:02, 26.06.2019
Хош келипсиз! | RSS
Сайт мазмуны

Кириў усылы

ҚАРА  БАСТЫҢ  ҒАМЫН  ГӨЗЛЕГЕНЛЕР

Бүгинги күни мәмлекетимизде истиң көзин билетуғын, билимли заманласларымызға жеке фирмалар ашып, жумыс алып барыўлары ушын кең мүмкиншиликлер есиги ашық екенлиги бәршемизге мәлим. Солай болса да өзлерине жүклетилген ўазыйпаларын билип, нызам шеңберинде жумыс алып барып атырған исбилерменлеримизге сөзимиз жоқ-дә, бирақ, базы бир кимселердиң усы шеңберди бузып, өзлеринше бурмалап, туўры баратырған жолларын қыя тәреплерге өзгертип, өз жеке мәплерине пайдаланып атырғанлар да табылады.

 

 

Булай деўимиздиң себеби, бәри де бала-шағалы, оңлы-солын аңлайтуғын инсанлардың тил бириктирип, билип билмей жынаятқа қол урып атырғанлығы ашынарлы жағдай.  Бәлким, олар ислеген ислериниң түби ўайран екенлигин аңламаған шығар. Дәслеп тәўекелге ислеген ислериниң әўметли, яғный, қамырдан қыл суўырғандай өткенлиги оларға қол келип, «дәмиккеннен қуныққан жаман» дегендей, бир-бирин мақуллап, жынаятқа қол урып атырғанлығын ишинен сезинсе де билмесликке алып, көрсе де көз жумып, ҳәрекетин даўам ете береди.

Бунда Б.Хиясов жеке фирмалар ашыўда көрсетилген мақсетлерди әмелге асырыўды бир шетке қойып, тек ғана өз мақсетлеринде исбилерменлик  фирмасын ашып ҳәм сол жол менен жеңил-желпи, саўда қағыйдаларын бузып, өз мәплерине пайдаланыў мақсетинде Б.Бекмановтың басшылығында «Aziya Platinum Universal» ҳәм «FORSAJ MIGOM» ЖШЖти баслықлары М.Турдымуратов ҳәм Н.Султамуратов, сондай-ақ, Халилаев, Рамбердиевлар бирлескен топар ағзаларына айланып, өзлери арасында тапсырмаларды бөлисип, тил бириктиреди. Яғный, олар биринши нәўбетте өзлери мәплениў мақсетинде «Avangard Genmontaj-Stroy» ЖШЖтин шөлкемлестирип, «Микрокредит» банктиң Нөкис қалалық филиалынан есап бетин аштырады. Солай етип, олар нызамсыз түрде 9 млрд 245 млн 137 мың 208 сумды есап бетине түсиреди. Есап бетиндеги қаржыларға ҳәр қыйлы түрдеги қурылыс материалларын ҳәм басқа да керекли затларды сатып алыў ушын «Avangard Genmontaj-Stroy» ЖШЖниң «Микрокредит» банк ҳәм «Ипотека» банктиң Нөкис қалалық бөлимлериндеги тийкарғы ҳәм қосымша есап бетлериндеги қаржылары арқалы Өзбекистан Республикасы Саўда санаат биржасы ҳәм басқа да  хожалық жүритиўши субъектлерден шәртнама тийкарында  ҳәр түрли қурылыс материалларын пул өткизиў жолы менен сатып алыўға ериседи.

Ашынарлысы, алынған затлардың ярымын пул өткизиў жолы менен, ал, қалғанын нақ пулға сатып жибереди. Жеңил жол менен табылған көлденең дәраматтың ҳеш кимге, ҳеш қандай пайда келтирмейтуғынын олар баслары тасқа барып тийгенде ғана аңлады. Солай етип, «суўдың да сораўы бар» дегендей, бирлескен топар ағзаларының бәри де ислеген ислерине жараса тийисли жазаларын алды.

С.ЖАРЕКЕЕВА.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF