Еркин Қарақалпақстан Вести Каракалпакстана 12:33:13, 22.10.2020
Хош келипсиз! | RSS
Сайт мазмуны

Кириў усылы

ӘДИЛ СУДЛАЎ  АКАДЕМИЯСЫ ҲАҚҚЫНДА

2017-жылы 13-июнь күни өткерилген суд системасына бағышланған видеоселектор мәжилисинде Өзбекстан Республикасы Президенти қәнигелестирилген оқыў мәкемеси — Әдил судлаў академиясын шөлкемлестириў ҳаққында усыныс билдирген еди.

Мәжилисте Президентимиз Ш.Мирзиёев бүгинги күнги халық күтип атырған әдил қарарлар қабыл етиўге ҳәр тәреплеме жетик, күшли ерк-ықрарына ийе жоқары кәсип ҳәм руўхый пазыйлетлерге ийе болған суд хызметкерлери қурамын жетилистириў ең әҳмийетли ўазыйпа болып турғанлығын, әйне мәнаўий пазыйлетлердиң жетиспеўшилиги себепли айырым судьялар ортасында нызамсыз ҳәрекетлер ислеў, напәклик, дәмегөйлик, адамлардың дәрт-тәшўишлерине итибарсызлық пенен қараў, әдиллик өлшемлерине қарсы рәўиште қарарлар қабыл етиў қатты сынға алынды.

Әдалат ҳәм мәнаўият өз-ара тығыз байланыслы түсиниклер, буны бир-биринен айырып болмайды. Судьялар, юрист кадрларды таярлаў ҳәм судьялық лаўазымына тайынлаўда бул мәселеге айрықша итибар қаратылыўы лазым.

2018-жылда суд системасы хызметкерлерин таярлаўға қәнигелестирилген жаңа формадағы Өзбекстан Республикасы «Әдил судлаў академиясы» шөлкемлестирилиўи режелестирилмекте. Бул ҳаққында «Жедел исбилерменлик, инновациялық идеялар ҳәм технологияларды қоллап-қуўатлаў жылы» Мәмлекетлик бағдарламасында белгиленген.

Суд системасы хызметкерлерин таярлаў, квалификациясын асырыўға хызмет ететуғын қәнигелестирилген оқыў орны усы жылдың 30-июнь күнине шөлкемлестириў нәзерде тутылған. Жаңа академияның қаржыландырыў дереги Раўажланыў мәмлекетлик бағдарламасынан келип шығып анықланыўы, оның жумысын жол­ға қойыўға Жоқарғы суд, Судьялар кеңеси, Әдиллик министрлиги, Бас прокуратура ҳәм Қаржы министрлиги жуўапкер етип көрсетилген.

Буннан тысқары, бы­йыл­ғы жыл мәмлекетлик бағдарламасында Жоқарғы суд системасында суд тәжирийбесин таллаў ҳәм нызамшылық басқармасын шөл­кемлестириў көзде тутылмақта. Сондай-ақ, Жоқарғы суд судьясы жәрдемшиси штат бирлигин енгизиў ҳәм ўәлаят ҳәм район (қала) судлар сис­темасын муўапық­ластырыў, 2018-жыл 30-июнь күнине шекем орайлық суд органлары ҳәм мәкемелери жумысының бирлесиўин тәми­йинлеў мақсетинде оларды жайластырыў бо­йынша бирден-бир ком­плекс — «Әдалат сарайы» бирлеспесин қурыў реже­лестирилген.

Бир сөз бенен айтқанда, бул Жоқары профессионал дәрежеде жумыс жүргизетуғын жетик судьяларды таярлаўға хызмет ететуғын Өзбекстан Республикасы Әдил судлаў академиясын шөлкемлестириў пуқаралардың ҳуқық ҳәм еркинликлериниң суд ҳәкимияты тәрепинен қорғалыўына хызмет етеди.

 А.КЕРИМБАЕВ,

Нөкис қалалық ҳәкимшилик судының баслығы.  

 

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF