Еркин Қарақалпақстан Вести Каракалпакстана 11:20:43, 22.10.2020
Хош келипсиз! | RSS
Сайт мазмуны

Кириў усылы

СОЯ ЖЕТИСТИРИЎ ҲӘМ ОНЫҢ АГРОТЕХНИКАСЫ

Қарақалпақстан Республикасы Министрлер Кеңесинде «Соя жетистириў көлемин буннан былай да көбейтиўге тараў илимпазлары менен қәнигелерин кеңнен тартыў» темасында оқыў-семинары болып өтти.

Илажға Қарақалпақстан Республикасы Аўыл ҳәм суў хожалығы, Әдиллик минис­трликлериниң, республика фермер, дийқан хожалықлары ҳәм қыйтақ жер ийелери кеңесиниң басшылары, хызмет көрсетиўши кәрханалардың қәнигелери, илимпазлар, фермерлер, ғалаба хабар қуралларының ўәкиллери қатнасты.

Оқыў-семинарда Қарақалпақстан Республикасы Минис­трлер Кеңеси Баслығының орынбасары С.Хожаметов,  Өзбекстан мәмлекетлик жәҳән тиллери университетиниң профессоры, аўыл хожалығы илимлериниң докторы Д.Ёрматова, Ташкент мәмлекетлик аграр университети Нөкис филиалының директоры Е.Төрениязов, Өзбекстан Аўыл хожалығы илимий-өндирислик орайы Қарақалпақстан бөлиминиң баслығы С.Шәмшетов ҳәм басқалар шығып сөйлеп, Өзбекстан Республикасы Президентиниң 2017-жыл 14-марттағы «2017-2021-жылларда республикада соя егинин егиў ҳәм соя дәнин жетистириўди көбейтиў илажлары ҳаққында»ғы қарарының мазмун-мәниси, соя дәниниң халық хожалығындағы әҳмийети және оны жетистириўде жәҳәнниң алдынғы тәжирийбелерине тоқтап өтти. Соның менен бирге, елимиздиң түрли топырақ-ықлым шараятында соя жетистириўдиң агротехникасы, келешеги, жергиликли ҳәм шет еллерден алып келинген сортларын жетистириў, оларға тәрбия бериў, агротехникасы, зүрәәтлиликти арттырыў факторлары, жабайы шөплер, кеселлик ҳәм зыянкеслерге қарсы гүресиў илажлары, егис ҳәм жыйын-терим мапазында заманагөй техникалардан пайдаланыў әҳмийети бойынша кең түрде түсиник берилди.

Атап өтилгениндей, соңғы жыллары бир қатар аўыл хожалығы дақыллары менен бирге соя өсимлиги егисине де айрықша әҳмийет берилмекте. Өзбекстан Республикасы Министрлер Кабинетиниң усы жыл 10-февральдағы «Республикада соя жетистириў көлемин буннан былай да көбейтиў илажлары ҳаққында»ғы қарарының   орынланыўын тәмийинлеў бойынша быйылғы жылы 1500 гектар майданға соя егиў режелестирилмекте. Бизге белгили бол­ғанындай, бул дақыл әҳмийети бойынша салы, бийдай, мәккеден кейинги орынды ийелейди. Оннан түрли өнимлер алыныўы менен бирге, маллар ушын сапалы және жуғымлы от-шөп болып табылады.

Сояның жергиликли «Барака», «Тумарис МАН-60», «Пәрўаз», «Өзбек-6», шет еллерден алып келинген «Селекта-302», «Селекта-201», «Эврика-357» сортлары болып, олардың биологиясы, жетистириў агротехникасы бойынша кең түрде түсиник берилди. Қәнигелердиң атап өткениндей, сояны гүзлик арпа ямаса ерте писер бийдайдың орнына қайта егис сыпатында егиўге болады. Бунда сорт­ты дурыс таңлаў айрықша әҳмийетке ийе. Ерте писер «Селекта-201», орта писер  «Селекта-302» ҳәм «Эврика-357» сортларын таңлаў жақсы нәтийже береди. Оны елимиздиң арқа регионларында 20-июньнен 1-июльге шекем егиў усыныс етиледи.

— Республикамыздың Тахтакөпир, Қараөзек, Нөкис, Хожели, Шоманай, Қанлыкөл ҳәм Қоңырат районларынан 800  гектар майданға соя егетуғын 97 фермер хожалығы менен шәртнама дүзилди,-дейди «Туран-Хожели» акцио­нерлик жәмийетиниң қәнигеси Досберген Ерназаров. —Бүгинги күни Россияның Краснодар үлкесинен 27 тонна туқымлық «Селекта-302» сорты алып келинди. Жақын күнлерде және 23 тонна алып келинеди. Шәртнамада көрсетилген сумманың 50 процентине шекем фермер хожалықларына жанылғы-майлаў материаллары, минерал төгин ҳәм мийнет ҳақы ушын аванс ретинде тарқатып бериледи.

 Д.АБИБУЛЛАЕВ,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF