Еркин Қарақалпақстан Вести Каракалпакстана 05:01:43, 28.05.2018
Хош келипсиз! | RSS
Сайт мазмуны

Кириў усылы

БУЛ ИТИБАР КҮШ-ЖИГЕРИМИЗДИ ТАСТЫРАДЫ

Өмиримиздиң көрки ҳәм жаратыўшысы болған ҳаял-қызлар мәмлекетимизде бәрқулла қәдирленип, ҳүрмет-иззетке бөленип келмекте. Быйылғы жылы да ояныў паслы болған бәҳәрдиң кирип келиўи менен 8-Март — ҳаял-қызлар байрамында аналарымыз, апа-сиңлилеримиз үлкен қуўанышқа бөленди. Барлық орынларда, мийнет жәмәәтлеринде ҳаял-қызларға ҳүрмет көрсетилип, жақсы тилеклер, сый-саў­ғалар инам етилмекте.

Ҳаял-қызлардың жәмийетлик турмыстағы орны ҳәм абырайын арттырыў мақсетинде усы жыл 2-февральда «Ҳаял-қызларды қоллап-қуўатлаў ҳәм шаңарақ институтын беккемлеў тараўындағы жумысты түп-тийкарынан жетилистириў илажлары ҳаққында» Президент Пәрманы қабыл етилди. Бул Пәрман арқалы ҳаял-қызлардың жәмийеттеги орны, абырайы және де артады. Пәрманға тийкарланып республикамыздан Нөкис мәмлекетлик педагогикалық институтының 2-курс студенти Шаҳодат Жоллыбаева ҳәм Нөкис Мәденият ҳәм көркем өнер колледжиниң 2-басқыш оқыўшысы Наргиза Утемуратовалар Зульфия атындағы мәмлекетлик сыйлыққа ийе болды.  Сондай-ақ, ҳаял-қызлардың жәмийетимиздиң раўажланыўына қосып атырған мийнетин жоқары баҳалап, байрам мүнәсибети менен Қарақалпақстан Республикасы Телерадиокомпаниясы «Қарақалпақстан» телеканалының бас редакторы Алтынгүл Өтениязова «Өзбекстан Республикасына хызмет көрсеткен журналист» ҳүрметли атағына, Шымбай районындағы «Lanextrakt» қоспа кәрханасының сыртқы экономикалық мәселелер бойынша директоры Мухайё Абдурахимова «Дослық» ордени менен сыйлықланыўы, бул жоқары сыйлықлар Ташкент қаласында болып өткен салтанатлы мәресимде елимиз басшысының өз қолынан салтанатлы түрде тапсырылыўы елимизде ҳаял-қызларға болған итибардың жоқары көриниси болып табылады.

Байрам мүнәсибети менен Қарақалпақстан Республикасы ҳәм барлық ўәлаятларда, оқыў орынларында, мийнет жәмәәтлеринде илажлар, ушырасыўлар шөлкемлестирилип, ҳаял-қызларға сый-ҳүрмет көрсетилди ҳәм баҳалы саўғалар инам етилди. Сондай-ақ, көркем өнер шеберлериниң байрам концертлери байрамға және де заўық бағышлады.

Аналары, ҳаял-қызлары сый-ҳүрметте, қәдирленген журтта жасап атырғанымыздан бахтыярлық сезим  және де жигерлендирип, перзент­леримиз тәрбиясында, Ўатанымыздың еле де гүллеп-жаснаўында күш-қуўат болады. Аналық меҳримиз, турмыслық тәжирийбемиз бенен перзентлеримизди руўхый интеллектуал жетик, ана-Ўатанымызға садық етип тәрбиялаўда күш-жигеримизди тастырады.

 Ҳаўахан  ОМАРОВА,

Нөкис қаласы ҳәкиминиң орынбасары,

қалалық ҳаял-қызлар комитети баслығы. 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF