Еркин Қарақалпақстан Вести Каракалпакстана 10:14:02, 23.06.2018
Хош келипсиз! | RSS
Сайт мазмуны

Кириў усылы

ЖАҢА  ТЕХНОЛОГИЯЛАРДЫ  МЕҢГЕРГЕН ЖАСЛАР

Президентимиз Ш.Мирзиёевтиң өткен жылы 20-21-январь күнлери республикамызда болған сапарында ирге тасы қаланған «Нөкис Полимер» жуўапкершилиги шекленген жәмийетиниң өндирислик кәрханасы бүгинги күнге келип өз өнимлери менен халқымыз мақтанышына айланды.

Қысқа ўақыт ишинде жедел пәтлер менен қурып питкерилген заводқа жәҳәнде өз брендине ийе Қытайдың «ЛИАНСУ» ҳәм «ҲИТИАН» компаниясынан заманагөй технологиялар алып келип орнатылды. Бүгинги күни кәрханада жумыс төрт гезекте алып барылып онда жылына диаметри 16 миллиметрден 630 миллиметрге шекем болған жоқары басымға шыдамлы 8 мың тонна полиэтилен трубалары ислеп шығарылады. Быйылғы жылдың «Жедел исбилерменлик, инновациялық идеялар ҳәм технологияларды қоллап-қуўатлаў жылы» деп белгилениўине байланыслы кәрханада ислеп шығарыл­ған полиэтилен трубаларын ҳәр қыйлы формаға келтириўши жаңа үскене алып келинип, иске қосылды.

— Аўызбиршилик пенен мийнет етип атырған жәмәәтимизде 100 адам жумыс ислеп атырған болса, солардың тең ярымын жаслар қурайды. Бул жерде жумысшылардың нәтийжели мийнет етиўи ушын барлық қолайлылықлар жаратылып, олар арнаўлы кийим-кеншек ҳәм де ыссы аўқат пенен тәмийинленген, - дейди усы кәрхананың жаслар аўқамы басланғыш шөлкеминиң жетекшиси Азамат Артықов. — Өзим 2016-жылы Бердақ атындағы Қарақалпақ мәмлекетлик университетин нефть ҳәм газ қәнигелиги бойынша питкерип, заводта инженер-механик болып жумыс ислеп атырман. Бунда тийкарғы шийки зат базасы «Қарши термопласт» ҳәм «Үстирт газ-химия комп­лекси»нен алып келинеди ҳәм қайта таярланады. Ҳәзир өз өнимлеримиз бенен ишки базарды толық тәмийинлеп атырмыз ҳәм алдағы ўақытлары қоңсы республикаларға экспорт етиўди режелестиргенбиз.

— ҚМУдың химия-технология факультетин питкерип, өз қәнигелигим бойынша өткен жылдың август айынан баслап жумыс ислеп атырман,- дейди кәрхана операторы Мәрҳамат Қутлымуратов. — Бул жерде жумыс ислеп атыр­ғанымнан қуўанышлыман. Өз ис-тәжирийбемди  арттырыў ушын өткен жылы бир ай даўамында Қашқа­дәрья ўәлаятындағы «Қаршы термопласт» заводында өндирис технологиясын үйренип қайттық. Ҳәзир соңғы заманагөй техноло­гиялар жәрдеминде таярлан­ған өнимлеримизди ишки базарға өз ўақтында жеткерип бермектемиз... 

   Әлбетте, бул әмелге асырылып атырған илажлар елимиз экономикасын еле беккемлеўде ҳәм импорт етилип атырған өнимлерди жергиликлилестириўде әҳмийетли болып табылады.

А.ОРАЗОВ,

арнаўлы  хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF