Еркин Қарақалпақстан Вести Каракалпакстана 21:08:08, 18.12.2018
Хош келипсиз! | RSS
Сайт мазмуны

Кириў усылы

АДАМ ҚӘЛБИНИҢ НУРЫ — ИЛИМ

ямаса академик пенен ушырасыў

Мәмлекетимиз экономикасының инновациялық раўажланыўында академиялық илимниң ролин күшейтиў, илимий-изерт­леў ҳәм инновациялық искерликти раўажландырыў, илимниң алдынғы нәтийжелерин әме­лиятқа енгизиў, орынларда илимий мектеплерди беккемлеў ҳәм олардың аймақлық,  тармақлық машқалаларды шешиўде қатнасыўын тәмийинлеў, зийрек жасларды илимий искерликке тартыў, ўатандарлық илимниң халықаралық масштабтағы абырайын арттырыў мақсетинде Өзбекстан Республикасы Президенти тәрепинен 2017-жылы декабрь айында «Өзбекстан Республикасы Илимлер Академиясының ҳақыйқый ағзаларын тас­тыйықлаў ҳаққындағы», Өзбекстан Республикасы Илимлер Академиясының ҳақыйқый ағзаларының, сондай-ақ, бурынғы Өзбекстан аўылхожалығы илимлери академиясының ҳақыйқый ағзалары ҳәм хабаршы ағзаларының хызметлерин буннан былай да хошаметлеў ис-илажлары ҳаққындағы» Пәрманлары қабыл етилген еди.

Соны айтыў керек, ӨзР Илимлер Академиясына сайлаўлар 2000-жылы өткерилген болса, 2017-жылы, арадан 17 жыл өтип, Илимлер Академиясына 32, соннан медицина илимлери бойынша 5 академик сайланды. Сайланған академиклер арасында Өзбекстан Республикасы Илимлер Академиясы Иммунология институты директоры, медицина илимлери докторы, профессор Тамарахан Уктамовна Арипованың орны гиреўли.

Академик Т.Арипова басқарған бул орай елимизде медицина тараўында илимий-изертлеў жумысларын алып барыўда, жоқары қәнигели илимий кадрлар таярлаўда үлкен абырайға ийе. Ташкент педиатрия медицина институты Нөкис филиалы менен Иммунология институты он жылдан аслам ўақыттан берли бирге ислесип келмекте. Бул дәўир ишинде 2 жойбар орынланды, 6 илим кандидаты таярланды. Бүгинги күнде филиал ҳәм институт хызметкерлери экологиялық факторлардың инсан иммун системасына тәсирлерин үйрениў бағдарында изерт­леўлерде бирге ислеспекте.

Жақында Ташкент педиатрия медицина институты Нөкис филиалында академик Тамарахан Уктамовна Арипова ҳәм Иммунология институты хызметкери медицина илимлери докторы, профессор Диларам Абдуллаевна Мусаходжаева менен филиал профессор-оқытыўшылары, клиникалық ординаторлары ушырасыўы болып өтти. Ушырасыўда олардан тысқары ТашПМИ Нөкис филиалы жанындағы академиялық лицей оқыўшылары ҳәм педагогикалық жәмәәти қатнасты.

Ушырасыў барысында Тамарахан Уктамовна өзиниң өмир жолы, илимий жумыслары, сондай-ақ, Иммунология институтының раўажланыў тарийхы, жетискенликлери туўралы кеңнен айтып берди.

Ушырасыў академиклердиң искерлигиниң тийкарғы бағдарлары бойынша ислеп шығылған «Жол карталары» шеңберинде әмелге асырылды. «Жол карталары» илимий-инновациялық тараўларда әмелге асырылып атырған реформалардың мәнис-мазмунын үгит-нәсиятлаў, заманагөй илим жетискенликлерин ғалабаластырыў бойынша мақсетли илажларды көзде тутады. «Жол картасы»н әмелге асырыўда орынларда, әсиресе алыс ра­йонлар ҳәм аўыллардағы жумысларға айрықша итибар каратылған еди. Сонлықтан академик Т.У.Арипова Хожели, Тақыятас, Елликқала, Төрткүл, Әмиўдәрья районларында болып, медициналық колледжлерде, мектеплерде ушырасыўлар өткерди.

Бул ушырасыўлар оқыўшы ҳәм студент жасларда үлкен тәсир қалдырды, оларда илим-билимге қызығыўшылықты оятып, ел-журттың, ана-Ўатанның раўажланыўына келешекте  өз үлесин қосыўға болған умтылысты пайда етти.

Академик Тамарахан Уктамовна Арипованың илим жолындағы ғайратына дыққат қаратар  екенбиз, Шығыстың ойшылларының бири Әбдибек Шеразийдиң «Егер инсан илим нуры менен өз жолын жақтыландырмаса, қараңғылық ҳәм наданлық көшесинде қалады. Адамның қәлбиниң нуры илим ҳәм ағартыўшылық пенен қүдиретли болады. Инсанияттың қәдири илим менен пайда болады. Илимнен еле ҳеш ким зыян көрген емес. Илимди ийелеп алыў болса бир өнер» деген даналық пикириниң ҳақ екенине және бир мәрте исеним арттырамыз.

О.АТАНИЯЗОВА,

медицина илимлериниң докторы, профессор,

ТашПМИ Нөкис филиалы директоры,  Олий Мажлис сенаты ағзасы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF