Еркин Қарақалпақстан Вести Каракалпакстана 07:02:58, 19.09.2018
Хош келипсиз! | RSS
Сайт мазмуны

Кириў усылы

ҚӘЛЕМИ  ИЛИМДЕ  ТАНЫЛДЫ

ямаса журналистика илиминде Өзбекстанда биринши PhD илимий дәрежесине ийе болған достымыз  Тамара Машарипова туўралы бир-еки аўыз сөз

Тамара Машарипова менен  Нөкис мәмлекетлик университетинде журналистика қәнигелигинде бир топарда бес жыл бирге оқыдық. Тамара Айбүйирдиң етегинде өсип кәмалға келген, арамызда китапқумарлығы, журналистикаға ықласы  менен ажыралып туратуғын, қолынан китабы түспейтуғын шаққан студент болды.

Үйге берилген тапсырманы дәрриў илип алып, бәрҳа «бес» баҳасына оқыды. Соның ушын сол жылы филология факультетин питкерип атырған жүздей сту­дент­тен тек Тамара Машариповаға «қызыл» диплом тийисли болды. Оны аспирантураның күндизги бөлимине оқыўға алып қалды. Әмелият­та «Еркин Қарақалпақстан» газетасында бирге болатуғын едик. Университетте оқытыўшы болып ислеп жүрсе де, «Еркин...»нен қол үзбей, хабаршы болып та ислеп жүрди. Редакциядағы устаз кәсиплеслеримиз бенен бирге пикирлесип, көп ғана жақсы мақалалар жазды. Оның қәлеминен дөреген мақалалар қызықлы ҳәм тәсирли. Сонлықтан летучкаларда мақталады.

Тамара кейинги ўақытларда илимий темасы үстинде шынтлап шуғыллана баслады, 2015-жылы Қарақалпақ мәмлекетлик университетинде үлкен оқытыўшы ҳәм «ҚМУ хабаршысы»ның жуўаплы хаткери (бул журналды шөлкемлестириўде баслама көтергенлердиң бири) лаўазымынан таңлаў тийкарында төрт пәннен имтихан тапсырып, Өзбекстан Миллий университетиниң журналистика факультетине үлкен илимий хызметкер-излениўши лаўазымына өтти. Себеби, журналистикадан докторантурада тек Ташкентте оқыў мүмкин еди. Сонша қыйыншылықларға төтепки берип, ул-қызларын таслап, бала-шағалы адамға, әсиресе, ҳаял адамға Ташкентте илим менен шуғылланыў аңсат емес ғой. Бул пикирге Тамара қосылса да өзиниң қайсарлығы менен «Енди перзентлеримниң ҳеш қайсысының арқасы бесикте емес, бәри де ержетип киятыр, алды студент, генжеси мектепке барды, алдында үйдиң ийеси — әкеси бар, оның үстине олардың өзлери «Сиз енди жумысыңызды қорғап алың, өзлеримиз еплеймиз, деп рухсат берди» деди ушырасып қалғанымызда.

Солай етип, 2016-жылы Т.Машарипова «Публицистика теориясының бир пүтин концепциясы (Қарақалпақстан Республикасы баспасөзи материаллары мысалында)» көлемли монографиялық жумысын жәриялады, китап етип басып шығарды. Китапқа белгили әдебиятшы Қ.Жәримбетов илимий жақтан редакторлық етсе, оған белгили профессорлар Қ.Оразымбетов, К.Алламбергенов, Қ.Ирназаровлар унамлы пикир билдирди.

Буған шекем де оның «Өзимди излеймен...», «Жанлы сөз», «Өмир гүли» деген топламлары жарыққа шығып, журтшылықтың кеўлинен жыллы орын алған еди. Бүгин болса ол өзиниң илим жолындағы дәслепки ири табысы менен қуўанышқа бөленди: 2017-жылдың 15-декабрь сәнесинде Ташкент мәмлекетлик Шығыстаныў институтында журналистика бойынша бир мәртелик илимий кеңесте «Публицистика теориясында шығарманың мазмун ҳәм форма мәселелери» темасында (илимий басшы профессор Ф.А.Муминов) филология илимлери бойынша философия докторы (PhD) илимий дәрежеси ушын диссертациясын қор­ғап шықты ҳәм Жоқары аттестация комиссиясы тәрепинен 2018-жылдың 26-январь сәнесинде тастыйықланды. Диссертацияға белгили алым ҳәм жазыўшы Сарыгүл Баҳадырова менен филология илимлериниң кандидаты Перихан Алламбергенова жоқары баҳа берген.

Қала берди, Өзбекстан Республикасының Биринши Президенти И.Кәримов 1994-жылы Нөкис қаласынан 30 талантлы жас шаңараққа дөретиўшилик пенен шуғылланыў ушын имканият жаратыў мақсетинде үлкен исеним менен 3 ҳәм 4 ханалы турақ жайлардан  берген еди. Тамара Машарипова менен усы дөретиўшилер жайының 5 ҳәм 6- квартираларында иргелес қоңсы болғанымыз бар. Жақын қоңсы турып турмыс­та да, дөретиўшиликте де пикирлес болдық.

Биринши Президентимиздиң исенимине бола, көплеген талантлылар камал тапты.  Б.Дәўлетмуратов физика-математика, З.Бекбергенова филология илимлери докторлары, Д.Бекбаўлиев, Т.Қаллибеков, К.Палымбетовлар илим кандидатлары болды. Басқа да көплеген дөретиўши инсанлар түрли тараўларда жемисли мийнети етип атыр. 

Тамара ушын 8-март қос байрам. Усы күни оны анасы Жийенгүл Аллаярова дүньяға келтирген. Әкеси Жолдасбай Машарипов өмирден сәл ертелеў кетти. Бирақ, оның тәрбиялаған ул-қызларының бәри де жақсы инсанлар болып жетилди. Мине  быйыл Тамара дос­тымыз белгили қәниге болып Қарақалпақ мәмлекетлик университети журна­листика бөлиминдеги устазлық жумысына қайта оралды. Ол халқымыздың ул-қызларына журналистиканың әлўан түрли сырларын үйретиўден жалықпайды. Тамараның дөретиўшилик шыңлары енди «писип» жетилискен мәҳәли десек қәтелеспеген боламыз. Устазлық жолы менен бирге дөретиўшиликтен де халқымызға берери көп. Сонлықтан дос­тымызға сәтли қәдемлер менен табыслар қоршаўында болыўын тилеймиз. 

Б.ЖОЛДАСБАЕВА.

СҮЎРЕТТЕ:  Т.Машарипова.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF