Еркин Қарақалпақстан Вести Каракалпакстана 06:38:34, 19.09.2018
Хош келипсиз! | RSS
Сайт мазмуны

Кириў усылы

ДУЙЫМ ЖУРТТЫ УЙЫТҚАН ҲАЎАЗ

«Қуранды еситиў, есите алыў жоқары мәнаўият, ағартыўшылық. Қуран ҳеш қашан жаманлыққа шақырмайды. Егер Қураны кәримди есите алсақ, еситтире алсақ — бул жетискенлик болады. Елимизге нур келеди», деген еди ҳүрметли Президентимиз Ш.Мирзиёев 2017-жыл 1-сентябрь күни «Ҳәзирети Имам» (Ҳастимам) комплексине еткен сапары ўақтында.

Елимиз басшысы соның менен бирге, усы сапары пайытында Қуран жарысын шөлкемлестириў тапсырмасын бергенлигинен де көпшиликтиң хабары болса керек. Усы тапсырманың ҳәм Өзбекстан мусылманлары басқармасының 2017-жыл 29-ноябрьдеги буйрығын орынлаў мақсетинде мәмлекетимиз бойлап Қуран жарысы өткерилмекте.

Шийшемби күни Нөкис Имам ийшан Муҳаммад жәмәәтлик мешитинде усы жарыстың Қарақалпақстан Республикасы басқышы болып өтти. Қуран жарысының ашылыў мүнәсибети менен өткерилген салтанатлы мәресимде сөзге шыққан Қарақалпақстан Республикасы Министрлер Кеңесиниң Баслығы Қ.Сариев, Өзбекстан мусылманлары басқармасы мешитлер бөлиминиң баслығы Р.Рахманов ҳәм Қарақалпақстан мусылманлары қазыятының қазысы Ш.Баўатдиновлар өткерилип атырған илаждың әҳмийетине ҳәм Ислам дининиң халқымыз турмысында тутқан орнына айрықша тоқтап, жарыс қатнасыўшыларына табыслар тиледи.

Қуран — мусылманлар ушын муқаддес китап. Илажда жыйналғанлар оның кәлиймалары астында оғада терең мазмун бар екенлиги, сондай-ақ, ҳәр қандай инсан Қураны кәримниң тәсиршең аятларын еситкен ўақытта оны ықлас пенен берилип тыңлаўы — булардың барлығы ҳәм усы муқаддес китапта жазылғанлар әлемди жаратыўшы Аллатааланың илаҳий сөзлери екенлигине және бир мәрте исеним пайда етти.

Жарыста январь айында өткерилген зоналық бас­қышлардың жеңимпазлары болған 18-25 ҳәм 26-40 жас аралығындағы пуқаралар өз-ара күш сынас­ты. Сондай-ақ, Мухаммад ибн Ахмад ал-Беруний атындағы Нөкис орта арнаўлы ислам билим журтының талабалары да Қуранды оқыў бойынша өз өнерлерин көрсетти. Соны айрықша атап өтиў керек, олар Қуран аятларын қирәәтке салып оқығанда даўыслары ду­йым журтты уйытты. Дөгерек-әтирап силтидей тынып, бәршениң кеўлинде өзгеше кейпият орнағанын сезиў қыйын емес еди.

Қуран жарысы жуўмағында 18-25 жас аралығында Тахтакөпир районынан Нурмухаммед Әметниязов, 26-40 аралығында Нөкис районынан Султанбай Ражаповлар жеңимпаз деп табылып, жарыстың Өзбекстан көлеминде өткерилетуғын жуўмақлаўшы басқышына жоллама алды. Жеңимпазлар ҳәм сыйлы орын ийелери Қарақалпақстан мусылманлары қазыяты ҳәм қәўендер шөлкемлер тәрепинен таярланған диплом ҳәм баҳалы саўғалар менен сыйлықланды. Нурмухаммед Әметния­зов Умра ҳаж сапарына барыў имканиятын да қолға киргизди.

С.ЖАНИЕВ, арнаўлы  хабаршымыз.

СҮЎРЕТТЕ: жарыстан көринис.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF