Еркин Қарақалпақстан Вести Каракалпакстана 22:26:15, 25.09.2020
Хош келипсиз! | RSS
Сайт мазмуны

Кириў усылы

ШАҢАРАҚЛЫҚ ИСБИЛЕРМЕНЛЕРГЕ  ЖЕҢИЛЛИКЛИ МИКРОКРЕДИТЛЕР

Өзбекстан Республикасы Президенти Шавкат Мирзиёев 2017-жыл 15-16-декабрь күнлери республикамызға сапары ўақтында Орайлық банк­ке коммерциялық банклер менен биргеликте республикамызда исбилерменликти раўажландырыў ушын жеңилликли кредитлер бериў көлемин кеминде 1,5 есеге арттырыў бойынша тапсырма берген еди.

— Бул тапсырма бойынша Өзбекстан Республикасы Министрлер Кабинети тәрепинен 2017-жыл 26-декабрьде, сондай-ақ, Қарақалпақстан Республикасы Жоқарғы Кеңесиниң 2017-жыл 30-декабрьдеги мәжилис протоколына муўапық илажлар бағдарламасы тастыйықланды,-дейди Өзбекстан Республикасы Орайлық банки Қарақалпақстан Республикасы бас басқармасының баслығы Азамат Абдикаримов. — Усы мәжилис протоколы тийкарында исбилерменлик пенен шуғылланыў тилегиндеги шаңарақларды анықлаў бойынша комиссия дүзилди. Бүгинги күнге комиссия тәрепинен ҳәкимликлер менен биргеликте республикамыз бойынша исбилерменлик пенен шуғылланатуғын шаңарақлар анықланып, олардың дизими алынды. Сондай-ақ, Орайлық банктиң Қарақалпақстан Республикасы бас басқармасы тәрепинен барлық коммерциялық банклер шаңарақлық исбилерменлерге жеңилликли кредитлер ажыратыў бойынша жуўапкер етип бириктирилди.

Атап айтқанда, «Микрокредитбанк» тәрепинен Әмиўдәрья, Елликқала ра­йонларындағы, «Қишлоқ қурилиш банк» тәрепинен Беруний районындағы, «Агробанк» тәрепинен Қара­өзек, Тахтакөпир, Нөкис районларындағы, «Санаат­қурылысбанк» тәрепинен Қоңырат, Тақыятас районларындағы, «Саўдагербанк» тәрепинен Төрткүл районындағы, «Миллий банк» тәрепинен Хожели, Шымбай районларындағы, «Халық банки» тәрепинен Мойнақ, Шоманай, Қанлыкөл районларындағы, «Асака банк» тәрепинен Кегейли районындағы, «Капиталбанк», «Инфинбанк», «Алоқабанк», «Ипотекабанк», «Туранбанк», «Ҳамкорбанк» тәрепинен Нөкис қаласындағы исбилерменлик пенен шуғылланатуғын шаңарақларға жеңилликли шәртлер тийкарында микрокредитлер ажыратыў белгиленген. Бул микрокредитлер пуқараларға Өзбекстан Республикасы Әдиллик министрлигинде усы жылы 22-февраль күни дизимге алын­ған «Халықтың бәнтлигин тәмийинлеў ушын коммерциялық банклер тәрепинен микрокредитлер ажыратыў тәртиби ҳаққындағы реже» талабы тийкарында 3 айдан 6 айға шекем жеңиллетилген ҳалда 3 жылдан көп болмаған мүддетке  ең кем мийнет ҳақының 100 есеси муғдарына шекем бериледи. Биринши гезекте, аймақларда халқымыз ушын мүнәсип турмыс шараятларын жаратыў, белгили бир мийнет түри менен шуғылланыў тилегиндеги исбилерменлик жумысы арқалы бәнтлигин тәмийинлеў ушын жеңилликли шәртлер бойынша ажыратылады.

 Қарақалпақстан хабар агентлиги.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF