Еркин Қарақалпақстан Вести Каракалпакстана 02:18:57, 08.08.2020
Хош келипсиз! | RSS
Сайт мазмуны

Кириў усылы

ЖУМЫСЛАР  НЫЗАМ ТИЙКАРЫНДА

2018-жыл 10-январь күни Өзбекстан Республикасы Бас прокуратурасы жанындағы Мәжбүрий орынлаў бюросы Қарақалпақстан Республикасы басқармасы баслығы, Қарақалпақстан Республикасы прокуроры, оның тармақ бойынша биринши орынбасары, Мәж­бүрий орынлаў бюросы коллегия ағзалары ҳәм барлық хызметкерлер қатнасында басқарманың коллегия мәжилиси болып өтти.

Мәжилисте Мәжбүрий орынлаў бюросы Қарақалпақстан Республикасы басқармасы, район ҳәм қалалық бөлимлери тәрепинен 2017-жыл 1-июльден 2018-жыл 1-январьға шекем, яғный, 6 ай даўамында әмелге асырылған ислер терең додаланды. Сондай-ақ, 2017-жыл 22-декабрьдеги Өзбекстан Республикасы Президенти Ш.М.Мирзиёевтиң мәмлекетимиз парламенти — Олий Мажлиске Мүрәжатында берилген көрсетпелери тийкарында Бюроның келешектеги ўазыйпалары белгилеп алынды.

Айтып өтиў лазым, Өзбекстан Республикасы Президентиниң 2017-жыл 29-майдағы «Электр энергиясы ҳәм тәбий­ғый газ жеткерип бериў, және де тутыныў тараўында төлеў тәртибин беккемлеў, сондай-ақ, орынлаў исин жүргизиў системасын түп-тийкарынан жетилистириў илажлары ҳаққында»ғы, 2017-жыл 16-ноябрьдеги «Суў тәмийнаты ҳәм суў шығарыў хызметин көрсетиў тараўында төлеў тәртибин түп-тийкарынан жетилистириў илажлары ҳаққында»ғы Пәрманлары, 2017-жыл 30-майдағы «Өзбекстан Республикасы Бас прокуратурасы жанындағы Мәжбүрий орынлаў бюросы жумысын шөлкемлестириў ҳақ­қында»ғы қарарына муўапық Өзбекстан Республикасы Бас прокуратурасы жанындағы Мәжбүрий орынлаў бюросы өз ўәкилликлери шеңберинде бир қатар ислерди әмелге асырды.

Мәжбүрий орынлаў бюросы Қарақалпақстан Республикасы басқармасы, район ҳәм қалалық бөлимлериниң ис жүргизиўинде 2017-жылдың 1-июль жағдайына өткен жыл қалдығы менен 139 465 дана орынлаў ҳүжжети бар болған. Соннан, жәми 51 562 дана (37 процент) орынлаў ҳүжжети тамамланып, әмелде 34 436 данасы (24,7 процент) өндирилген. Есабат (01.07.2017) ақырына жәми 87 682 дана орынлаў ҳүжжети қалдықта қалған.

Ески суд департаменти дәўиринде 2016-жыл 1-июльден 2017-жыл 1-январьға шекем, яғный, 6 ай даўамында 35 691 дана орынлаў ҳүжжети тамамланған болып, соннан 30 492 данасы бойынша өндирилген.

Бюроның басқарма, район ҳәм қалалық бөлимлери тәрепинен 2017-жыл 1-июльден 2018-жыл 1-январьға шекем, яғный, 6 ай даўамында 58 126 орынлаў ҳүжжети тамамланып, соннан 48 731 данасы бойынша өндирилген ҳәм ис өнимдарлығы өткен 6 айға салыстырғанда 2 есе артығы менен өндириўге ерисилген. Бүгинги күнде жәми 60 783 дана орынлаў ҳүжжети қалдықта болып, өндириў ҳәрекетлери алып барылмақта.

Өзбекстан Республикасы Президентиниң арнаўлы Бийлиги менен тастыйықланған «Жол картасы»ның 69-бәнтиниң орынланыўын тәмийинлеў мақсетинде 2017-жыл 15-июль күни Қарақалпақстан Республикасы прокурорының Бийлиги имзаланып, бәрше район ҳәм қалаларда ис жүргизиўдеги орынлаў ҳүжжетлерин инвентаризациялаў ушын штаб ҳәм исши топарлар дүзилди. Усы бағдардағы жумыслардың ҳақыйқый жағдайын анықлаў мақсетинде Қарақалпақстан Республикасы Мәжбүрий орынлаў бюросы тәрепинен Реже-кес­те белгиленип, 2017-жылдың 20-сентябрине шекем 91 455 дана орынлаў ҳүжжети ҳәм «Суд ҳүжжетлери ҳәм басқа да уйымлардың ҳүжжетлерин орынлаў ҳаққында»ғы Нызамның 40-статьясына тийкар тамамланған 2 572 дана орынлаў ҳүжжетлерин пуқталық пенен үйренип шығыў тапсырылған еди. Нәтийжеде 92 176 дана, яғный, 100,8 процент орынлаў ҳүжжети ҳәм Нызамның 40-статьясына тийкар, тамамланған 3 104 дана, яғный, 120,7 процент орынлаў ҳүжжети үйренилди.

Бюроның және бир тийкарғы ўазыйпаларынан бири бул — электр энергияси ҳәм тәбийғый газ ушын төлемлердиң өз ўақтында ҳәм толық өндирилиўин, тутыныўшылардың қарыздарлығын кемейтиўди тәмийинлеў болып есапланады. Бул бағдарда тәбийғый газден 2016-жыл 1-июньнен 2017-жыл 1-январьға шекем 84,3 млрд. сумлық өндириў әмелге асырылған болса, 2017-жыл 1-июньнен 2018-жыл 1-январьға шекем 185,1 млрд. сум, яғный, өткен жылдың 7 айына салыстырғанда 100,8 млрд. сум артығы менен өндирилди.

Электр энергиясынан 2016-жыл 1-июньнен 2017-жыл 1-январьға шекем 110,3 млрд. сумлық өндириў әмелге асырылған болса, 2017-жыл 1-июньнен 2018-жыл 1-январьға шекем 152,3 млрд. сум, яғный, өткен жылдың 7 айына салыстырғанда 42 млрд. сум артығы менен өндириўге ерисилди.

Ҳәзирги күнде бюро ўәкилликлеринен үнемли пайдалана отырып, дебитор қарыздарлықты кемейтиў мақсетинде қарыздар тутыныўшыларға орынланыўы мәжбүрий болған талапнама берилди. Сондай-ақ, энергия ресурслары ушын төлемлерди өз ўақтында төлемеген қарыздар тутыныўшыларды тармақтан ажыратыў илажлары көрилди, юридикалық шахс ҳәм жеке тәртиптеги исбилерменлерге қарыздарлықты өндириў мақсетинде олырдың есап-бетлерине инкасса тапсырмалары, қарыздар хызметкердиң ис хақысынан өндириў ушын ис бериўшилерге талапнамалар берип барылды.

Улыўма айтқанда, Мәжбүрий орынлаў бюросы Қарақалпақстан Республикасы басқармасы тәрепинен энергия ресурслары бойынша белгиленген режениң 100 процент орынланыўына ерисилди.

Бул бағдардағы жумысларды еле де жетилистириў мақсетинде мәмлекетлик инспекторлардың ҳәммеси 217 дана термопринтер, төлеў терминаллары ҳәм “MIB Inspector” бағдарламасы орнатыл­ған 200 дана телефон үскенелери менен толық тәми­йинленди. Бүгинги күнде пайдаланылған энергия ресурслары бойынша жәми 334 889 физикалық ҳәм юридикалық шахслардың тәбийғый газ ҳәм электр энергиясынан есаплағыш үскенелери тексериўден өткерилди ҳәм “ MIB Inspector ” бағдарламасына киргизилди.

Бюро хызметкерлери тәрепинен район ҳәм қала аймақларында автотранспорт қураллары менен көшеме-көше жүрип, рупорлар (даўыс күшейттиргишлер) менен халық арасында тутыныўшылардың қарыздарлығы хаққында ескертиў, көшпели кассалар, мобиль терминаллар жәрдеминде өндириў ислери жолға қойылди.

Мәмлекетимиз басшысы Ш.М.Мирзиёевтиң 2017-жыл 15-16-декабрь күнлери Қарақалпақстанға сапары даўамында берилген тапсырмалардың орынланыўын тәмийинлеў мақсетинде Қарақалпақстан Республикасында энергия ресурсларынан болған дебитор қарыздарлықларды кескин кемейтиў менен байланыслы әмелге асырылыўы лазым болған ис-илажлар бағдарламасы ҳәм 2018-жыл 1-апрельге де­йин энергия ресурсларынан дебитор қарыздарлықты өндириўдиң қатаң реже-кестеси басқарма тәрепинен ислеп шығылып, Республика Прокуроры тәрепинен тастыйықланды. Ҳәзирги күнде бул бағдарлама ҳәм қатаң реже-кесте бойынша жумыслар системалы шөлкемлестирилип, өндириў ислери сапалы жолға қойылған.

Буннан тысқары, 2018-жыл 1-январь жағдайына Қарақалпақстан Республикасында энергия ресурслары бойынша жәми 804 ҳуқықбузарлық анықланып (электр энергиясынан — 590, газ тәмийнатынан — 214), жәми 685,9 млн. сумлық зыян жеткизилгенлиги мәлим болды. Соннан 625 ине Өзбекстан Республикасы ҲЖҳКниң 101-статьясына тийкар, жәми 576,0 млн. сумлық ҳәкимшилик жәрийма қолланылды, 426 ҳуқықбузардан жәми 402,7 млн. сумлық, яғный, 69,9 процент ҳәкимшилик жәрийма өндирилди. Сондай-ақ, ҲЖҳКниң 3081-статьясына тийкар, ҳуқықбузарлықтың кем әҳмийетлилиги себепли, жәми 74 млн. 373,1 мың сумлық 91 ҳәкимшилик ислери усыныс пенен  судларға жиберилди.

Президентимиз Ш.М.Мир­зиёевтиң «Халқымыз ҳәмме нәрседен үстин қоятуғын әдалат туйғысын турмысымызда шын мәнисинде қарар таптырыў — ең тийкарғы ўазыйпамызға айланыўы шәрт» деп билдирген көрсетпесин басшылыққа алып, 2017-жыл 18-октябрь күни Мәжбүрий орынлаў бюросы бас­қармасы баслығының басламасы менен 3 жыл даўамында шешимин таппай киятырған пуқаралардың машқаласы, яғный, 40 турақ жай ҳәм 10 дүкан имараты ийелериниң жеке мүлкке бол­ған ийелик ҳуқықлары 10 күн ишинде нызамлы түрде шешилип, тиклеп берилди.

Буннан тысқары, Елликқала районында 12 ҳәм Шоманай ра­йонында 26 кем тәмийинленген шаңарақта бөлим хызметкерлери тәрепинен материаллық жәрдем сыпатында жас бала­ларға саўғалар тапсырыў илажлары шөлкемлестирилди.

Атамурат  ҚАБУЛОВ,

Мәжбүрий орынлаў бюросы Қарақалпақстан Республикасы

басқармасы Шөлкемлестириў-қадағалаў ҳәм талқылаў бөлиминиң аға инспекторы.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF