Еркин Қарақалпақстан Вести Каракалпакстана 06:36:12, 21.09.2018
Хош келипсиз! | RSS
Сайт мазмуны

Кириў усылы

ФУРКАДҚА «КӨЗ  ТИЙДИ»

Бүгинги күнде пүткил дүнья спорт жәмийетшилигиниң бар дыққаты Қубла Кореяның Пхёнчхан қаласында өткерилип атырған XXIII қыcқы олимпиада ойын­ларына қаратылған. Жума күнги ашылыў мәресиминен кейин спортшылар медальлар ушын беллесиўлерге қызғын кирисип кетти.

Соны айрықша атап өтиў керек, ойынларда күтилген ҳәм күтилмеген нәтийжелер жүз берип атыр. Биатлон бойынша ерлер арасында 7,5 километрге өткерилген спринт бәйгисинде франциялы атақшы спортшы, жәҳән кубогы жеңимпазы Мартин Фуркад биринши оқ атыўда үш мәрте қәтешиликке жол қойып, финиш сызығын сегизинши болып кесип өтти. Бул бәйгиде төрт мәрте жәҳән чемпионы, германия­лы Арнд Пайффер жеңимпаз атанған болса, чехиялы Михал Крчмарж гүмис, италиялы Доминик Виндиш қола медалына ийелик етти.

Усы бәйгиге ҳаял-қызлар арасында өткерилген беллесиўде де әўмет германиялы спортшыға күлип бақты. Нышаналардың барлығын қәтесиз жапқан Лаура Дальмайер аралықты 21 минут 6,2 секундта басып өтти. Норвегиялы Марте Олсбю екинши, чехиялы Вероника Виткова болса үшинши орынды ийеледи. Ванкувер ҳәм Сочи олимпиадаларының қаҳарманлары, ҳәмме үмит еткен беларуссиялы Дарья Домрачева тоғызыншы, словакиялы Анастасия Кузьмина болса он үшинши орынға жайласты.

 

Голландиялы конькиде жуўырыў шебери Свен Крамер ойынлар тарийхында медалы ең көп спортшыға айланды. 5000 метрге өткерилген бәйгиде қолға киргизген алтын медалы оның карьерасындағы сегизинши медаль болып табылады.

Спорттың усы түринен ҳаял-қызлар арасында 3000 метрге өткерилген бәйгиде турнир пьедесталының барлығы да голландиялы спортшыларға тийисли болды. Бул мәмлекет ўәкиллери Карлейн Ахтеректе алтын, Ирен Вюст гүмис ҳәм Антуанетта де Йонг қола медальларын жеңип алды.

Болып өткен беллесиўлерден кейин 3 алтын, 1 қола (жәми 4) медальды қолға киргизген Германия рәсмий емес командалық есапта кәрўанбасылық етип киятыр. Оннан кейинги орынларда Голландия (2, 2, 1 - 5) ҳәм Норвегия (1, 4, 3 - 8) жайласқан.

Ойынлар даўам етпекте.

С.ЖАНИЕВ.

 

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF