Еркин Қарақалпақстан Вести Каракалпакстана 09:50:11, 19.04.2018
Хош келипсиз! | RSS
Сайт мазмуны

Кириў усылы

ТЫНЫШ ҲӘМ АБАДАН  ТУРМЫС УШЫН

Өткен жылда ҳуқық қорғаў уйымлары хызметкерлериниң жәмийетшилик пенен бирге ислесиў механизми түп-тийкарынан өзгерди. Әсиресе, Президентимиздиң басламасы менен ҳәр ҳәптениң пийшембиси «Жынаятшылықтың алдын алыў ҳәм ҳуқықбузарлықлар профилактикасы»  күни етип белгилениўине байланыслы оларға үлкен  жуўапкершилик жүкледи. 

Көпшиликке мәлим, 2017-жыл 15-ноябрь күни Президентимиз Ш.Мирзиёев басшылығында елимизде ҳуқықбузарлықлар профилактикасы ҳәм жынаятшылыққа қарсы гүресиў бағдарында белгиленген ўазыйпаның орынланыўына, бул бағдарда жүзеге келген машқалалар ҳәм оларды шешиў мәселелерине бағышланған видеоселектор мәжилиси болып өткен еди. Онда «Мениң мәҳәллемде жынаят болмаўы керек» деген идеяны қәлиплестириўде профилактика инспекторлары алдына қатаң тапсырмалар қойылды. Бул бойынша Шымбай ра­йоны ишки ислер бөлими тәрепинен белгиленген ўазыйпалардың орынланыўында нәтийжели жумыслар жүргизилмекте. Атап айтқанда, «Гүжимли», «Абат мәкан», «Дослық», «Жипек жолы», «Көкши қала», «Бердақ», «Жипек жолы»,  «Көнши» мәкан пуқаралар жыйыны ҳәм «Тазғара», «Қостерек», «Пашенттаў», «Майжап», «Бахытлы», «Қызылөзек» аўыл пуқаралар жыйынларында жынаятшылық ҳәм ҳуқықбузарлықлардың анағурлым кемейиўине ерисилгени қуўанарлы жағдай. Тилекке қарсы, «Қаракөл», «Оржап», «Кеңес», «Тазажол», «Көксуў» мәкан пуқаралар жыйынларында нызам бузыўшылардың артқанлығы көзге тасланады. Олардың басым көпшилиги пуқаралық паспорт қағыйдаларын бузғанлығы, аў қуралын сақлаў мүддетиниң өткенлиги ҳәм ҳәкимшилик тәртипти бузған пуқаралар болып табылады. Бул көрсетилген ҳуқықбузарлықлардың алдын алыўда жыйын ағзалары ҳәм профилактика инспекторлары тәрепинен оқыў орынларында ушырасыўлар өткерилип, үгит-нәсият жумыслары алып барылмақта.

— Ишки ислер уйымлары хызметкерлериниң жумыс нәтийжелилигин арттырыўда жеңиллетилген кредит есабынан ажыратылған автомашиналар профилактика инспекторларына берилди. Турақ жай қурылысына келетуғын болсақ, «Шахтемир» МПЖ ҳәм «Майжап» АПЖ аймағына жақын жайласқан хызмет үйлери пайдаланыўға тапсырылды. Ал қал­ған жайлардың қурылыс ислери алып барылмақта, - дейди район ишки ислер бөлими ҳуқықбузарлықлар профилактикасы бөлимшесиниң аға инспекторы, аға лейтенант Е.Ибраимов.

Өз гезегинде бул илажлар нызам бузыўшылықтың ерте алдын алыўда халық пенен еле де тығыз бирге ислесиўди талап етеди.

А.ОРАЗОВ, арнаўлы хабаршымыз.

Шымбай районы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF