Еркин Қарақалпақстан Вести Каракалпакстана 21:26:53, 21.07.2018
Хош келипсиз! | RSS
Сайт мазмуны

Кириў усылы

АРҚА-БАТЫС ӘСКЕРИЙ ОКРУГИНИҢ ДҮЗИЛГЕНИНЕ 19 ЖЫЛ

 ЎАТАНҒА  ХЫЗМЕТ — ӘДИЎЛИ  МИННЕТ

Соңғы жылларда Өзбекс­танда заманагөй талап­лар­ға жуўап беретуғын, елимиздиң ғәрезсизлиги, оның қәўипсизлиги ҳәм аймақлық пүтинлигиниң исенимли кепили болған Қураллы Күшлерди дүзиў ҳәм миллий армиямызды қәлиплестириў бо­йынша бир қатар унамлы жумыслар әмелге асырылды. Миллий нызамшылық базасында да қорғаныў, қәўипсизлик мәселелерине байланыслы ҳуқықый ҳүжжетлер жетилистирилип барылмақта.

Пайтахтымызда жайласқан Арқа-Батыс әскерий округиниң шөлкемлестирилгенлигине быйыл 19 жыл толыўы мүнәсибети менен республикамыздың барлық орынларында «Тынышлығың ушын жаным пидә — муқаддес Ўатан!» ураны астында өткерилип атырған ҳәптелик шеңберинде бир қатар илажлар шөлкемлестирилип, буның тийкарғы салтанатлы мәресими жақында 1-санлы балалар ҳәм өспиримлер спорт мектебинде болып өтти.

Дәслеп республикамыз халқы, әсиресе, улыўма орта билим бериў мектеби ҳәм кәсип-өнер колледжлериниң оқыўшы-жаслары ушын әскерий техникалар ҳәм қурал-жарақлардың көргизбеси өткерилди.

— Әскерий техникаларды, ҳәр қыйлы қурал-жарақларды тек әскерий кинолардан ғана көргенбиз. Мине, бүгинги көргизбедеги ҳақыйқый қурал-жарақлар менен техникалар бизлерде өзгеше тәсирлер қалдырды. Келешекте мен де әскер болып, елимиздиң, Ўатанымыз тынышлығы жолында хызмет етемен,-дейди 9-санлы орта билим бериў мектеби оқыўшысы А.Ибрагимов.

Илажда Қарақалпақстан Республикасы Жоқарғы Кеңесиниң Баслығы, Әскерий-ҳәкимшилик секторы басшысы М.Ерниязов, Арқа-Батыс әскерий округиниң сәркардасы Ф.Артиқовлар ҳәм басқалар шығып сөйлеп, округтиң 19 жыллығы менен қутлықлады ҳәм ҳүрметли Президентимиздиң басшылығында халық пенен армия­ның бирлигин тәми­йинлеў мақсетинде әскерий-ҳәкимшилик секторының дүзилгенлиги, буннан тысқары, Қураллы Күшлеримизде кең көлемли реформалардың әмелге асырып атырғанлығы жөнинде де айтып өтти.

Соң бир топар тараў ветеранларына Өзбекстан Республикасы Қорғаныў министрлигиниң көкирек нышанлары салтанатлы жағдайда тапсырылды. Сондай-ақ, әскерий хызметкерлер ҳәм колледж оқыўшы-жаслары арасында спорттың әскерийлестирилген эстафета түри бойынша жарыс шөлкемлестирилип, Миллий гвардияшылар ҳәм Хожели агро-экономикалық кәсип-өнер колледжиниң оқыўшылары жеңимпазлықты қолға киризди ҳәм оларға шөлкемлестириўшилер тәрепинен баҳалы саў­ғалар тапсырылды.

Салтанатлы мәжилиске Қарақалпақстан Республикасы Министрлер Кеңесиниң Баслығы Қ.Сариев, Қарақалпақстан Республикасы Жоқарғы Кеңесиниң комитет баслықлары, Министрлер Кеңеси Баслығының орынбасарлары, тараў басшылары ҳәм кең жәми­йетшилик ўәкиллери қатнас­ты.

Илаж соңында қатнасыўшыларға Өзбекстан Қураллы Күшлериниң қосық ҳәм аяқ ойын ан­самбли ҳәм қарақалпақ көркем-өнер шеберлериниң концерт бағдарламасы қойып берилди.

 

Р.АРЗИЕВ, арнаўлы  хабаршымыз.

СҮЎРЕТТЕ: салтанатлы илаждан көринис.

Автордың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF