Еркин Қарақалпақстан Вести Каракалпакстана 04:54:22, 22.02.2018
Хош келипсиз! | RSS
Сайт мазмуны

Кириў усылы

КҮТИЛГЕН НӘТИЙЖЕНИ БЕРМЕКТЕ

Дүньяға келген ҳәр бир инсан билим алып, өнер ийелеп, алған тәлим-тәрбиясының арқасында бийик-бийик шыңларға көтерилиўди алдына мақсет етип қояды. Сол ушын да елимиздиң ертеңги келешеги болған жасларымыздың билим алып, белгили бир қәнигеликти ийелеўи ушын мәмлекетимиз тәрепинен барлық шараятлар жаратылған.

Оларға туўдырып қойылған мүмкиншиликлерди көрип ҳәўесиң келеди. Солардың қатарында Нөкис юридикалық колледжин мысал етип келтирип өтиўимизге болады. Бүгинлиги бул дәргайда  зийрек, билимли жасларымыз өз қәнигелиги бо­йынша билим  алып атыр.  Бул оқыў дәргайында республикамыздың ҳуқық қорғаў тараўы ушын зәрүр болған киши қәнигелер таярланбақта. Оқыўшылардың тыянақлы билим алыўы ушын жетерли итибар қаратылған. Оқыў орнында ҳәр бир айға белгиленген пән айлықлары бойынша бир қатар илажлар шөлкемлестирилди. Пәнге байланыслы ис-режеге тийкарланып, ҳәр бир топарда ашық сабақлар өткерилип атыр.

Исбилерменлик ҳәм жумыс­қа орналастырыў технологиялары тийкары пәнлеринен юрист 03-15-топарында өткерилген ашық сабақ жаңа инновациялық технологияларды өз ишине қамтыды. Тема ойын аралас өткени менен де оқыўшыларда қызығыўшылық оятып, олардың пәнге деген ықласын арттырды.

Сондай-ақ, дүньяда ашылып атырған жаңалықлардың барлығы илим негизинде әмелге асады. Әсиресе, ҳәзирги коммуникациялық технологияның раўажланыўында анық пәнлер, соның ишинде экономика пәниниң орны гиреўли. Әдетте, көпшилик оқыўшылар экономика пәнин қыйынсынады, бирақ, пәнди жаңаша түсиндириў усыллары  менен ҳәр бир сабақ интерактив түринде өтилсе, әлбетте, тема оқыўшылар ушын түсиникли ҳәм қызықлы болып өтеди.      

Сондай-ақ, колледжимизде билим алып  атырған оқыўшыларымыздың бул пәнге болған қызығыўшылығын және де арттырыў мақсетинде топарлар арасында интеллектуал ойынлар өткерилип турылады. Буннан гөзленген мақсет — оқыўшылардың жыл даўамында өзлестирген билимин беккемлеў, пәнге болған қызығыўшылығын және де арттырыў. Ойын барысындағы сораў-жуўаплар оқыўшыларымыздың пән бойынша билим көнликпелерин арттырып қо­й­мастан, оларды логикалық ойлаўға, дыққат-итибарлы  болыўға үйретеди.  

 Улыўмаластырып айтқанда, жас әўладтың тыянақлы билим, тәрбия алыўында оқытыўшылардың орны гиреўли. Демек, оқыўшыларды сол пәнге қызықтырып барыў, бүгинги күнги педагогтың алдында турған ўазыйпаларының бири екен, бул бағдардағы жумысларымызды ҳәр тәреплеме жетилистириўге ҳәрекет етемиз.

Д.ДЖАМАНТАЕВА.

Нөкис юридикалық колледжи оқытыўшысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF