Еркин Қарақалпақстан Вести Каракалпакстана 05:52:46, 19.08.2018
Хош келипсиз! | RSS
Сайт мазмуны

Кириў усылы

АЎЫЛ МЕКТЕБИНИҢ  ЖЕТИСКЕНЛИКЛЕРИ

Соңғы жылларда ҳүкиметимиз тәрепинен билимлендириў системасын реформалаўға айрықша дыққат-итибар қаратылмақта. Нәтийжеде бул жумыслар  тараўдың жаңа басқышқа көтерилиўине, мазмунының түп-мәнистен жақсыланыўына ҳәм жас әўладтың заман талабына сай тәлим-тәрбия алыўына унамлы тәсирин тийгизбекте.

Нөкис районындағы 27-санлы улыўма орта билим бериў мектеби «Кердер» АПЖ аймағында жайласқан болып, 1987-жылы пайдаланыўға берилген. 2012-жылы болса, Мектеп билимлендириўин раўажландырыўдың миллий бағдарламасына муўапық, мектепке капитал реконструкция жумыслары исленди.

Бүгинги күни бул дәргайда оқыўшылардың заман талабына сай тәлим-тәрбия алыўлары ушын барлық шараятлар жаратып берилген. Тәжирийбели педагог Жамалатдин Атамуратов басшылық етип киятырған мектепте ҳәзирги ўақытта 453 оқыўшы 48 муғаллимнен билим ҳәм тәрбия алмақта. Оқыўшылардың сабақтан бос ўақытларын мазмунлы етип өткериў мақсетинде мектепте 12 пән дөгереги, оқыўшылардың жеке қызығыўшылығына қарай 3 дөгерек ҳәм 7 спорт секциялары турақлы ҳәрекет етип тур. Сондай-ақ, буннан тысқары, бүгинги күнде мектепте райондағы Балалар ҳәм жас өспиримлер спорт мектебиниң спорттың миллий гүрес түринен секциясы да бар болып, онда 40 (соннан 14 қыз бала) жас палўан тәжирийбели тренер Жарас Әбдимуратовтан гүрес сырларын үйренип келмекте. Оның жарысқа таярлаған шәкиртлериниң бүгинги күнде қолға киргизип атырған табыслары көзди қуўандырады. Атап айтқанда, өткен жылы август айында Хожели районында республикамызға белгили палўан Сатыбалды Мылтықбаевтың естелигине бағышланып өткерилген жарыста усы мектептиң 6-класс оқыўшысы Д.Орынбаева 44 килограмм салмақта екинши, 9-класс оқыўшылары Н.Орынбаев 35 килограмм салмақта, Г.Масленова 40 килограмм салмақта екинши, А.Қыпшақбаев 46 килограмм салмақта үшинши орынларды ийеледи.

Сондай-ақ, ҳәр жыл сайын мектеп оқыўшылары арасында өткерилип киятырған пән олимпиадасы, «Билимлер беллесиўи» ҳәм ҳәр түрли атамадағы таңлаўларға мектеп оқыўшылары белсендилик пенен қатнасып, ра­йон ҳәм республика көлеминде сыйлы орынларды ийелеўге мия­сар болып келмекте. Өткен жылдың ноябрь, декабрь айларында ра­йондағы улыўма орта билим бериў мектеплериниң ҳәм кәсип-өнер колледжлериниң оқыўшылары арасында болып өткен «Уллы мақсетлерге умтылыўшылар» атамасындағы китапқумарлар таңлаўының районлық басқышында мектеп топары 35 топар арасында екинши орынды ийеледи.

Мектепте тәжирийбеси бас­қаларға үлги муғаллимлер қатары көпшиликти қурайды. Олардан инглис тили пәни муғаллими Қ.Ҳамидова ҳәм өзбек тили пәни муғаллими З.Дәўлетовалар оқыўшыларға ҳәр бир сабақ барысында жаңа педагогикалық технологиялардан пайдаланған ҳалда мазмунлы сабақлар өтип, кәсиплеслерине үлги болмақта.

 С.ОРАЗЫМБЕТОВ,  өз хабаршымыз.

Нөкис районы.

СҮЎРЕТTЕ: Мектеп турмысынан көринис.

Автордың түсирген сүўрети.   

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF