Еркин Қарақалпақстан Вести Каракалпакстана 05:53:38, 19.08.2018
Хош келипсиз! | RSS
Сайт мазмуны

Кириў усылы

«СТУДЕНТЛЕР ӘМЕЛИЯТЫ:  НӘТИЙЖЕЛЕР, МАШҚАЛАЛАР, УСЫНЫСЛАР»

Бүгинги күнде жоқары маманлықтағы кадрларды таярлаўда студентлердиң теориялық билимлерин әмелиятта қолланыўдың әҳмийети үлкен.

Усындай илаждың бири жақында Бердақ атындағы Қарақалпақ мәмлекетлик университети Қарақалпақ филологиясы факультети филология ҳәм тиллерди оқытыў бакалавр бағдары 4-курс студентлериниң педагогикалық әмелият жуўмағы бойынша «Студентлер әме­лияты: нәтийжелер, машқалалар, усыныслар» атамасында конференция болып өтти.

Илажды факультет деканы Қ.Турдыбаев ашты хәм алып барды. Өндиристе бириктирилген ҳәр бир объекттен өз әмелиятын  белсендилик пенен жуўмақлаған бир қатар студентлер ислеген жумысларының нәтийжелери менен таныстырып өтти.

— Әўметти ҳәр ким ҳәр түрли түсинеди. Мениң пикиримше, әўмет бул — жақсы устаздың шәкирти болыў, усы факультетте оқып атыр­ған ҳәр бир студент әўметли, -дейди И.Юсупов атындағы мәмлекетлик қәнигелестирилген мектеп-интернатында өз әмелиятын өткерген Г.Зийнатдинова.

Оның айтыўынша, әмелиятшы студентлер сабақ өтиў барысында, оқыўшыларды зериктирмеў ушын интерактив методлардан пайдаланып, ҳәр түрли дөгереклердиң де айыр­машылығы айрықша екенлигин көрсетиў керек.

Басқа оқыўшыларға салыстыр­ғанда өзлестириўи төмен болған бала менен әмелияты даўамында жеке түрде ислесип, оқыўшының оқыўға, ана тилине деген қызығыўшылығын оята алған Нөкис қалалық 17-санлы мектебинде әмелиятта болған Р.Бадирова да алған тәсирлерин бөлисти.

Буннан тысқары, конференцияда Индира Нуруллаева Қарақалпақ мәмлекетлик университети акаде­миялық лицейинде, Г.Мухаматдинова Нөкис қалалық 27-санлы  ҳәм С.Кеңесбаев Нөкис қалалық 19-санлы мектеплерде әмелияты барысындағы жумыслар менен таныстырып өтти.

Конференцияда факультет профессор-оқытыўшылары, әмелият орынларынан келген устазлары ҳәм әмелиятшы студентлер қатнасып, солардан филология илимлериниң кандидаты, доцент Ш.Алланиязова, И.Юсупов атындағы мәмлекетлик қәнигелестирилген мектеп-интернаты директорының орынбасары Ж.Бийимбетов, Нөкис қалалық 17-санлы мектептиң қарақалпақ тили ҳәм әдебияты пәни оқытыўшысы Ш.Хожамуратовалар шығып сөйлеп, өзлериниң пикир ҳәм усынысларын билдирди.

 Улзада  ҚОШҚАРОВА,

ҚМУ журналистика тәлим бағдары 4-курс студенти.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF