Еркин Қарақалпақстан Вести Каракалпакстана 19:03:12, 21.11.2018
Хош келипсиз! | RSS
Сайт мазмуны

Кириў усылы

УСТАЗ  ЖУРНАЛИСТКЕ  АЙРЫҚША ҲҮРМЕТ

Инсан деп аталған тиришилик ийе­синиң түрли-түрли тайпалары болатуғынындай, Аллатаала тәрепинен олар­ға инам етилетуғын жас та ҳәр қыйлы болады. Биреўлер узақ жасаса да бул дүньядан елеспесиз өтип кетеди. Ал, айырым адамлар болса, аз жасаса да саз, жанып жасап, заманласларының қәлбинде исмин, ислеген ислерин мәңги мөрлейди. Қарақалпақстан Республикасына мийнети сиңген журналист, марҳум Атажан Халмуратов мине усындай инсанлардан еди.

Қарақалпақ баспасөзи өзиниң көшин тарта баслаған өткен әсирдиң 20-жылларынан бүгинги күнге шекем онда қаншадан-қанша журналистлер, жазыўшы-шайырлар хызмет етпеди дейсиз. Әсиресе, 60-80-жылларда баспасөзге араласқан бир дүркин әўлад ўәкиллериниң миллий журналистиканың раўажланыўында тут­қан орны айрықша. Олардың арасында Атажан Халмуратов та өзине ылайық орын ийеледи, десек асыра силтеген болмаймыз.  

Соны айрықша атап өтиў керек, әпиўайы халық тилин, оның қашырымларын жақсы билиўи, көркемлеў қуралларынан шебер пайдалана алыўы арқалы, ең тийкарғысы, қәлеминиң өткирлиги менен Атажан Халмуратов басқалардан дараланып турды. Өз алдына тур­ғанда елеспесиз болып көринетуғын сөзлер оның қәлемине илингеннен ке­йин жамғырдан соң аспан   жийе­гинде бой көрсететуғын айқулақтай түрли реңге дөнип сала берди. Бирақ, әпиўайылық оның ҳәр бир дөретпесинде сақланып қалды. Өзиниң дөретиўшилик өмири даўамында «Жеткиншек», «Қарақалпақстан жаслары», «Еркин Қарақалпақстан» газеталарында, «Қарақалпақстан» баспасында түрли лаўазымларда ислеген ол бул басылымлардың тематикалық жақтан байыўына, рәң-бәрең болып шығыўына, көркем публицистика, очерк жанрларының раўажланыўына салмақлы үлес қосты. Бир қатар китапларын баспадан шығарып, оқыўшыларға инам етти.

Устаз журналисттиң 70 жыллығы мүнәсибети менен жақында пайтахтымыздағы И.Юсупов атындағы қәнигелестирилген мектеп-интернатта «Жақсының аты өшпейди» атамасында әдебий еслеў кешеси болып өтти.

А.Халмуратовтың заманласлары, кәсиплеслери ҳәм көп санлы шәкирт­лери, жақынлары қатнасқан бул кешени Қарақалпақстан Республикасы Жоқарғы Кеңесиниң комитет баслығы Д.Қурбаниязов кирис сөз бенен ашты ҳәм басқарып барды. Өзбекистан Журналистлери дөретиўшилик аўқамы Қарақалпақстан бөлиминиң баслығы, «Еркин Қарақалпақстан»-«Вести Каракалпакстана» газеталарының Бас редакторы К.Реймов Атажан Халмуратовтың өмири ҳәм дөретиўшилик хызметлери ҳаққында баянат жасады. Соң Қарақалпақстан халық жазыўшысы Ш.Уснатдинов, Қарақалпақстан Республикасына мийнети сиңген журналист Е.Байназаров, Қарақалпақстан Жазыўшылар аўқамының баслығы, Қарақалпақстан халық ша­йыры К.Каримов, А.Халмуратовтың класслас досты, философия илимлериниң кандидаты Ю.Әлимбетов, шәкиртлери П.Хожамуратова, Г.Нурлепесова, Қарақалпақстан Республикасына мийнети сиңген журналист Ө.Өтеўлиев ҳәм басқалар сөзге шығып, юбилярдың қарақалпақ журналистикасы, әсиресе, оның баспасөз тараўының раўажланыўына қосқан үлеслерин айрықша атап өтти.

Устаз журналистти еслеў мақсетинде өткерилген бул кеше қатнасыўшыларда умытылмас тәсир қалдырды.

С.ЖАНИЕВ.

СҮЎРЕТТЕ: кешеден көринис.

А.ОРАЗОВтың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF