Еркин Қарақалпақстан Вести Каракалпакстана 04:48:53, 22.02.2018
Хош келипсиз! | RSS
Сайт мазмуны

Кириў усылы

ӨРТКЕ ИТИБАРЛЫ БОЛАЙЫҚ

Аязлы күнлерде үйлеримиздиң жыллылығын тәмийинлеп бериўши электр ҳәм газ үскенелери  бәршемиз ушын зәрүр. Бирақ, бундай үскенелерден  өз орнында туўры пайдаланып барсақ, мақсетке муўапық ис тут­қан боламыз. Усыған қарамастан, айырым пуқараларымыз  үйлериниң   жыллылығын  тәмийинлеўши үскенелердиң насазлығын байқамастан ислетиўи  ақыбетинде кеўилсиз ҳәдийселердиң жүз берип  атырғаны да  сыр  емес. 

Ҳәр жылы  қыс мәўсими  па­йытында республикамыз  аймақларындағы  мәкеме ҳәм кәрханалар, басқа да шөлкемлер, оқыў орынлары менен  пуқаралардың турақ жайларында мине усындай газ ҳәм электр үскенелериниң насазлықлары себепли унамсыз жағдайлардың  жүз бергенин айтып өтиўимиз тийис.

Өзбекистан Республикасы  Президентиниң   2017-жыл 22-июнь күни  қабыл етилген қарарының орынланыўын тәмийинлеў мақсетинде бүгинги күни #арақалпақстан Республикасы ИИМ Өрт қәўипсизлиги басқармасы  ҳәм оның қала ҳәм районлық бөлимлериниң хызметкерлери тәрепинен кең тусиник жумыслары алып барылмақта. 2017-жыл  23-май күни Президентимиз тәрепинен «Ишки ислер уйымлары өрт қәўипсизлиги бөлимлериниң жумысын түп-тийкарынан жетилистириў илажлары ҳаққында» қабыл етилген  қарарына муўапық, ҳәптениң ҳәр сәршембиси «Өртлер профилактикасы күни» деп белгиленип берилди.  Усы мүнәсибет пенен ҳәр сәршемби күни  республикамыздың барлық аймақларындағы  өрт қәўипсизлиги бөлимлериниң хызметкерлери тәрепинен халқымыз арасында, әсиресе, мәкеме ҳәм кәрханалар менен басқа да  шөлкемлер, жоқары ҳәм орта оқыў орынларындағы оқыўшыларға жүз бериўи мүмкин болған өрт қәўпиниң алдын алыў ҳәм оған қарсы гүресиў бойынша тийисли үгит-нәсият жумыслары бүгинги күнде нәтийжели даўам етип келинбекте.  Бирақ, ҳәзирги ўакытта мине усындай үгит-нәсият жумысларының орынларда турақлы түрде әмелге асырылып  барылыўына қарамастан, айырым жерлерде еле де түсинбеўшилик жағдайлары ушыраспақта.  Мысал ретинде айтып өтетуғын болсақ, өткен жыл 17-ноябрь күни Төрткүл ра­йонындағы «Тазабағжап» аўыл пуқаралар жыйыны аймағында жасаўшы, 1981-жылы туўылған  А.К исмли пуқараға  тийисли болған саўда дүканында оның иниси, 1987-жылы туўыл­ған пуқара Р.Қ  мәс ҳалында келип, ол жерде сигарета шегип отырып, уйқылап қалыўы  ақыбетинде сол дүканның 2 метр квадрат полы ҳәм бир дана гилеми сигареттиң шоғынан жанып кеткен ҳәм ўақыя жеринде пуқара Р.Қ. қайтыс болған. Усы жыл 26-январь күнинен 27-январь күнине өтер кеште Шымбай районында «Тазғара» АПЖда жасаўшы, 1968-жылы туўылған К.Қ. исмли пуқараның үй ишин жылытқыш печиниң морысының насазлығынан өрт пайда болған. Ақыбетинде дийўалдың шөпкерден болғанлығы себебинен жайдың төбеси толық жанып, имарат жарамсыз аўҳалға келген.   Бундай жағдайлар соңғы пайытлары республикамыз аймақларында көплеп ушыраспақта. Соның ақыбетинде  адамлардың  үйлериндеги  кеўилсиз ҳәдийселердиң  жүз берип атырғаны ашынарлы жағдай.  Ҳаўа райының бүгингидей аязлы күнлеринде пуқараларымыздан үйлериңиздеги жыллылық бериўши печь морылары, газ ҳәм электр үскенелериниң ислеўине ҳәрдайым итибарлы болыўын соранып қаламыз.  Әзелден мәлим, халқымыз арасында  «Өрт — тилсиз жаў» деген терең мәнили гәп бар. Ҳәмийше өрт қәўпиниң  алдын алыў ҳәм оған қарсы гүресиў ҳәммемиздиң миннетли ўазыйпамыз саналады.  Мине, усындай  бахытсыз ҳәдийселерден сергек болып, ҳәрда­йым көрсетилген өрт қәўипсизлиги қәделерине бойсынып барсақ, әлбетте, жүз бериўи мүмкин болған кеўилсиз ҳәдийселердиң алдын алып, мақсетке муўапық ис тутқан боламыз.

 

М.СЕЙДУЛЛАЕВ,  

Қарақалпақстан Республикасы ИИМ ӨҚБ

баслығының орынбасары, подполковник.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF