Еркин Қарақалпақстан Вести Каракалпакстана 04:50:28, 22.02.2018
Хош келипсиз! | RSS
Сайт мазмуны

Кириў усылы

ОЛАР   ЖӘРДЕМГЕ   МҮТӘЖ

«Денсаўлықдур — алтын тахтың» деп уллы шайыр Бердақ бабамыздың жазғанындай, биз ким болсақ та аўырыў әбден жеңген па­йытлары көз алдыңа ҳеш нәрсе көринбей, усы кеселликтен қутылсам болды, әрманым болмас еди, деп ойланамыз, шыпакер қоймай қаранып, қалай болмасын тезирек тәўир болыўдың ҳәрекетин ислеймиз.

Лекин, усы орында туўма ҳәм кишкене гезлеринде аўыр наў­қаслыққа шатылған инсанлар өмирдиң ашшы-душшысына төтепки берип шүкиршилик пенен жасап атыр. Көпшиликке мәлим болғанындай, инсанның денсаўлығы, қәдир-қымбаты ең жоқары қәдирият есаплан­ған бизиң елимизде бундай өзгелер жәрдемине мүтәж кемкеўил инсанлар ушын Нөкис қаласы ҳәм Хожели районында арнаўлы мектеп-интернатлары, Шымбай ҳәм Хожели ра­йонларында Республикалық Ерлер ҳәм Ҳаял-қызлар Мүриўбет үйлери ислеп тур. Инсанның өмир кешириўи ушын не нәрселер зәрүр болса, барлығына мәмлекетимиз тәрепинен итибар берилген. Лекин, өмирде жуўабы жоқ мәселелерде бар ғой.

Өзбекистан Республикасы  Президентиниң  2017-жыл 1-декабрьдеги «Майыплығы болған шахсларды мәмлекет тәрепинен  қоллап-қуўатлаў системасын түп-тийкарынан жетилистириў илажлары ҳаққында»ғы  Пәрманына  муўапық,  елимизде  бундай инсанларды  мәмлекет  тәрепинен  қоллап-қуўатлаў, оларға  медициналық-социаллық  жәрдем көрсетиў, турмыс сапасын жақсылаў системасын жетилистириў,  билим алыўда ҳәм жумысқа орналастырыўда ҳәр тәреплеме  көмеклесиў илажлары көрилмекте.

Пәрманда көрсетилгениндей,  оларға қолайлы турмысты тәмийинлеў ушын қосымша  шараятлар  жаратыў кереклиги, инсанлардың майыпларға  болған қатнасын өзгертиў, әтираптағыларды олардың жәмийетте толық ҳәм тең ҳуқықлы қатнасыўы туўралы хабардар етиў ҳәм басқа да машқалаларды шешиўде оғада әҳми­йетли, биринши гезектеги қәдем  болып табылады. Усы мақсетте «майып» түсиниги қатнастан шығарылмақта, инсанның еркинлигин есапқа  алып, улыўма тән алынған «майыплығы болған шахс» атамасы киргизилмекте.

Президентимиздиң өткен жылы январь айында республикамызға  сапары даўамында Хожели районындағы Республикалық Ҳаял-қызлар Мүриўбет үйине барып, бул жердеги шараятлар менен жақыннан танысқан еди. Президентимиз Ш.Мирзиёев шыпакер ҳәм мийирбийкелер менен сәўбетлесип, шараятларды буннан былай да жақсылаў ушын мәмлекет тәрепинен жәрдем көрсетилетуғынын атап өтти.

Биз жақында усы Мүриўбет үйинде болып, соңғы ўақытлары алып барылып атырған жумыслар  менен жақыннан таныстық.

— Ҳаял-қызлар  жәми­йетимиздиң бир бөлеги. Оларды қәстерлеп, ҳүрмет етиў  ўазыйпамыз. Бирақ, бул жерде тәрбияланып атыр­ған  ҳаял-қызларымыздың көпшилиги ақылы  за­йыл ҳәм он еки мүшеси пүтин емеслиги себепли  бәрқулла  жәрдемге  мүтәж болып  жасайды,-дейди ҳаяллар-қызлар Мүриўбет үйи баслығы Ким Лидия Романовна. — Ҳәзирги ўақытта 235 ҳаял-қызлар жасап, турмыс кеширмекте. Олардың өмирге көзқарасы пүткиллей басқаша. Айырымлары физикалық жақтан майып болғаны менен ойлаўы ҳәм  пикирлеўи  саў адамлардан кем емес. Ал, гейбиреўлери китап оқыўға, тоқыма тоқыўға, сүўрет салыўға, ҳәттеки қосық жазыў ҳәм айтыўға қызығады. Олардың аўқатланыўы ҳәм кийиниўине бәрҳа мийирбийкелер жәрдем береди. 2017-жылы январьда Президентимиз Ш.Мирзиёевтиң сапарынан соң азық-аўқат пенен тәмийинлениў мәселеси жақсыланды.

Ҳаял-қызлардың өзине тән жаратылысы болғанындай, бул жердеги  ҳаяллардың да ақылый раўажланыўы  төмен болғаны менен олардың көпшилигиниң  денсаўлығы жақсы. Бизлерде  ең баслы машқаламыз — ҳаял-қызларымыздың  жеке гигие­насы ушын зәрүр ҳәм көрпе-төсеклерди қаплайтуғын буйымлар толық жетиспейди. Соның ушын, Мүриўбет үйимизге  қәўендерлик  етиўди қәлеўши  мәкемелер, исбилерменлер, жеке пуқаралар болса үлкен саўап иске қол урған болар еди...

Бир қуўанышлы тәрепи сонда, быйыл бул Мүриўбет үйи пайтахтымыз орайындағы барлық қолайлылықлар жаратылған жаңа имаратқа көшип өтеди.

— Оларға нәзер салып қарасаң,  кеўиллери гирбиңсиз. Барлығы   жас баладай, бизлер олардың ата-анасындай болып қалғанбыз. Алдыңнан  биреўи шығып қушақласаң,  барлығын  қушақлап шығыўың керек, болмаса  түскинликке түсип қалады. Соның ушын, ҳәммесине  барлық ўақытта теңдей меҳир менен қараймыз. Мәкемемизде  ҳәр түрли миллеттиң  ҳаял-қызлары  бир үйдиң ағзасындай болып  бир-бирине   жәрдем берип,  татыў жасап  атыр. Байрам сәнелеринде олардың қатнасында концерт бағдарламалары, сахналық көринислер шөлкемлестирилип, кеўиллери шадлыққа толады. Булар да өмирден ләззет алыўға, ылайықлы турмыс кешириўге ҳақылы.

Бахытсыз ҳәдийсе себепли майып болып қалған Гүлмира исмли қызымыз күтә талантлы. Ол өзиниң  өмирине налымай,  шүкиршилик етип жасап атыр. Арасында  йошланып, қосық шығарады ҳәм қасындағы  адамға  жазып алыўын өтиниш етип, ақ қағаз бетлерин толтырады,- дейди  мәкемениң үлкен мийирбийкеси Амангүл Казекова. — Оның қосықларын  оқып, ҳәттеки  көзлеримизге ериксиз жас келеди. Буннан тәсирленген бизлер олардың руўхын көтерип, келешекке деген исенимин оятыўға ҳәрекет етпектемиз...

Бүгинги күни Республикалық ҳаял-қызлар Мүриўбет үйинде бундай инсанларды мүнәсип турмыс кешириўи ушын көплеген қолайлы шараятлар жаратылған. Ҳәттеки, өткен 2017-жылы Қәрезсизлигимиздиң 26 жыллығы байрамында Ташкент қаласындағы «Истиқлол» сарайында өткерилген байрамға өзлериниң концерт бағдарламасы менен қатнасып қайтты. Лекин, олар бәрибир өзлериниң жақын-жуўығы, қурбы-қурдасларының меҳрине мүтәж. Сонлықтан, «Саўап исти ҳәр ким, ҳәр күни ислеўи керек» дегениндей, бизиң ҳәр биримиз усындай өзгелер жәрдемине мүтәж, кемкеўил инсанлардың ҳал-жағдайларынан хабар алып, жыллы сөзлеримизди аямасақ олардың кеўиллери және де тасып, шексиз қуўаныш­қа бөленеди. 

З.ЖАҚСЫМУРАТОВА.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF