Еркин Қарақалпақстан Вести Каракалпакстана 18:16:32, 21.11.2018
Хош келипсиз! | RSS
Сайт мазмуны

Кириў усылы

МИЙНЕТЛЕРИ МҮНӘСИП БАҲАЛАНДЫ

Илимди, билимлендириўди ҳәм тәлим-тәрбияны раўажландырыў, жасларды заманагөй талаплар тийкарында оқытыў, жас әўладты Ўатанға сүйиспеншилик ҳәм садықлық руўхында тәрбиялаўда муғаллим ҳәм устазларымыздың машақатлы ҳәм пидакерли хызметлери айрықша.

Бүгинги күни өзлериниң зийрек ақыл-ойы, беккем ерк-ықрары, жаслық жигери ҳәм дөретиўшилик таланты менен өзлериниң ҳеш кимнен кем емеслигин көрсетип атырған перзент­лер тымсалында олардың ийгиликли ислериниң жемислерин көремиз. Устаз деген атқа миясар болыў ҳәркимге де несип ете бермейди. Әне усындай муқаддес атқа мүнәсип болған устазлардың бири Абай Сапарниязов.

А.Сапарниязов 1998-жылы Әжинияз атындағы Нөкис мәмлекетлик педагогикалық институтының мийнет-информатика-экономика қәнигелигин питкерип, мийнет жолын пайтахтымызда жайласқан 2-санлы республикалық көп тармақлы педагогикалық лицей-интернатында информатика пәни муғаллими болып жумыс баслайды. Соң 2006-жылдан ҳәзирги ўақытқа шекем Қарақалпақстан Республикасы Халық билимлендириў министрлигине қараслы 11-санлы мәмлекетлик қәнигелестирилген улыўма орта билим бериў мектебинде келешегимиз болған жас әўладқа тәлим берип келмекте.

Ол усы жыллар ишинде оқыўшы-жасларға билим бериўде, олардың руўхый бай инсанлар болып камалға келиўи жолында тынымсыз изленди. Нәтийжесинде оның оқытқан оқыўшылары ҳәр жылы өткерилип барылатуғын пән олимпиадаларында, «Билимлер беллесиўи» жарысларында информатика пәнинен жеңимпазлықты қолға киргизип келмекте. Оқыўшыларынан бири Ж.Идиятдинов (2001-жыл) республикалық 4-басқыш пән олимпиадасында екинши орынды ийелеп тест сынаўларысыз жоқары оқыў орны студенти болыў бахтына миясар болды. Сондай-ақ, оқыўшыларынан Ш.Оразымбетов, Р.Нажимов, И.Абиев, Д.Тоқтарбаев, Б.Жумабекова, Г.Халықназарова, Б.Сабуров, З.Абубакировалар ҳәр қыйлы жылларда пән олимпиадалары менен «Билимлер беллесиўи» республикалық жарысларында сыйлы орынларды ийелеп келди.

— А.Сапарниязов өз пәниниң жетик қәнигелеринен бири сыпатында билимлендириў ҳәм тәрбиялық жумыслардың дәрежесин арттырыў, ҳәр бир сабақты жаңа педагогикалық технологиялары ҳәм ҳәр қыйлы интерактив усыллардан пайдаланып өтиўлери менен басқа муғаллимлерден өзгешеленеди. Сондай-ақ, оның кишипейиллиги, мийнеткешлиги, бәрше менен теңдей қарым-қатнаста болыўы менен де жәмәәтимизде өзиниң мүнәсип абырайына ийе,- дейди усы мектептиң руўхый-ағартыўшылық ислери бойынша директор орынбасары Л.Турманова.

Ол тек ғана тәлим-тәрбия берип қоймастан, информатика пәнине байланыслы ҳәр қыйлы оқыў-методикалық қолланбалар жазып келеди. Мәселен, 2003-жылы (С.Пирназаров ҳәм Д.Утебаевлар менен бирге) «Информатика ҳәм информациялық технологиялар» пәни бойынша қарақалпақ тилинде тест-сынаўлары методикалық қолланбасы жарық көреди. Ал, оның жеке авторлығында жазған «Microsoft Excel электрон кестеси» (2008-жыл), ҳәм «HTML тилин үйрениў» (2009-жыл) атлы қарақалпақ тилиндеги методикалық қолланбалары республика көлеминде ен жайдырылды. Сондай-ақ, А.Сапарниязов усы жылы Өзбекистан Республикасы көлеминде өткерилген «Ең жақсы электрон информация-тәлим ресурслары-2017» таңлаўында сыйлы 1-орынды ийелеп, ол жаратқан информатика пәни бойынша 1-класс оқыўшылары ушын бес тилде жаратқан тәлим ресурсы eduportal.uz сайтына жайластырылып Өзбекистан көлеминде мектеплерде пайдаланыў ушын жәрияланды.

Оның усындай мийнетлери ҳүкиметимиз тәрепинен мүнәсип баҳаланып, Қарақалпақстан ҳәм Өзбекистан Халық билимлендириў ағласы көкирек нышанлары, Қарақалпақстан Республикасы Жоқарғы Кеңесиниң Ҳүрмет жарлығы ҳәм өткен жыл «1-октябрь —муғаллимлер ҳәм устазлар күни» байрамы мүнәсибети менен Өзбекистан Республикасы Президенти тәрепинен «Шуҳрат» медалы менен сыйлықланды.

Мақаламыз жуўмағында өз исиниң пидайысы, киши пейил, излениўшең А.Сапарниязовтай устазлардың қатары елимизде көбейе берсе екен деймиз.

Р.АРЗИЕВ, арнаўлы хабаршымыз.

СҮЎРЕТТЕ: А.Сапарниязов сабақ пайытында.

Автордың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF