Еркин Қарақалпақстан Вести Каракалпакстана 17:31:46, 20.02.2018
Хош келипсиз! | RSS
Сайт мазмуны

Кириў усылы

НЫЗАМ ҮСТИНЛИГИН  ТӘМИЙИНЛЕЎ — БАСЛЫ  ЎАЗЫЙПАМЫЗ

Ҳүрметли Президентимиз Ш.Мирзиёев Өзбекистан Республикасы Олий Мажлисине Мүрәжатында өткен бир жыл даўамында суд ҳәкимиятының шын мәнисиндеги еркинлигин тәмийинлеў бойынша кең көлемли жумыслар баслағанлығын, атап айтқанда, судлардың структурасын ҳәм судьялық лаўазымларына талабанларды таңлаў ҳәм та­йынлаў системасын буннан былай да жетилистириў мақсетинде ҳеш бир ҳәкимият буўынына бойсынбайтуғын уйым Судья­лардың жоқар­ғы Кеңеси шөлкемлестирилгенлигин, Кеңес тәрепинен судьялыққа талабанларды таңлаў ҳәм та­йынлаўда тәсиршең жәми­йетлик қадағалаў орнатыл­ғанлығын атап өтти.

Сол мақсетте Олий Мажлис жанында Суд ҳәкимияты еркинлигин тәмийинлеўге көмеклесиў комиссиясын шөлкемлестириў зәрүр деп есаплады. Бул комиссия пуқаралардан келип түсип атыр­ған мүрәжатларды, халық пенен тиккелей ушырасыў ҳәм пикирлесиў процесинде ушырасып атырған мәселелерди улыўмаластырыўы, парламентлик сораў арқалы ҳақыйқый жағдайды талқылаўы, Жоқарғы суд ҳәм Судьялардың жоқарғы Кеңеси менен бирге машқалаларды шешиў илажларын көриўи лазым деп билдирди.

Суд ҳәкимиятының шын мәнисиндеги еркинлигин тәмийинлеў ушын биринши гезекте судьяларды әдил судлаўға тәсир ететуғын факторлардан қорғаў, тергеў ҳәм суд исине араласыў жағдайларын анықлаў, бул ушын жуўапкершиликти күшейтиў ҳәм жазаның сөзсиз екенин тәмийинлеў оғада әҳмийетли болып табылады.

Сондай-ақ, Президентимиз биз «Хабеас корпус» инс­титутын енгизиўде ҳәм тергеў алып барыўда суд қадағалаўын күшейтиў бағдарындағы жумысларды избе-из даўам еттириў, соннан келип шыққан ҳалда тинтиў өткериў ҳәм жынаят ислеўде гүман етилген шахс­лардың телефондағы сөйлесиўлерин еситип турыўға санкция бериў ҳуқықын судларға өткериў зәрүрлигин, сондай-ақ, айырым қылмысларды жынаятлар категориясынан шығарыў ҳәм либералластырыў, жына­йый жазаларды инсаныйлық көзқарасынан өзгертиўге айрықша итибар қаратыў, усы мақсетте 2018-2021-жылларда жынаят ҳәм жынаят-процессуал нызамшылықты раўажландырыў концепциясын қабыл етиў ҳәм әмелге асырыў зәрүр деп билдирди.

Халқымыздың кеширимли болыў ҳәм кеңпейиллик сыяқлы әзелий қәдириятларынан келип шығып, жынайый жуўапкершиликке тартыў мүддетлерин қайта көрип шығыў лазым. Сондай-ақ, жоқары профессионаллық дәрежеде жумыс алып баратуғын маман судьяларды таярлаўға  хызмет ететуғын Өзбекистан Республикасы әдил судлаў академиясын шөлкемлестириў кереклигине тоқтады. Ал, судланған шахслардың ҳуқықларын тәмийинлейтуғын қосымша механизмлер жаратыўды есапқа алып, жынаят-атқарыў нызамшылығын буннан былай да жетилистириў үлкен әҳмийетке ийе екенлигин, жазаны өтеў мәкемелериниң системасын сын көзқарастан үйрениў ҳәм түпкиликли жетилистириў шеңберинде 2018-2021-жылларда тийисли илажлар бағдарламасын қабыл етиў режелестирилип атырғанлығын, инсан ҳуқықлары бузылыўының алдын алыў мақсетинде барлық ўақтынша сақлаў ҳәм тергеў қамақханалары, жазаны өтеў мәкемелери видеобақлаў қураллары менен тәмийинленетуғынлығын, келеси жылдан баслап ишки ислер уйымлары жол-патруль ҳәм пост-патруль хызметлерин өз ўазыйпасын орынлаў, әсиресе, пуқаралар менен пикирлесиў процесин сүўретке алыў имканиятын беретуғын видеокамералар менен тәмийинленетуғынлығын, бул система тараўдағы бар дәмегөйлик ҳәм лаўазымынан өз мәпине пайдаланыў жағдайларының алдын алыў имканиятын беретуғынлығын айтып өтти.   

Соның менен бирге, ендигиден былай адвокатлардың консалтинг хызмети, яғный, мәсләҳәт бериў ҳәм исбилерменлик субъектлерине ҳуқықый жәрдем көрсетиў бағдарындағы жумысын жетилистириў илажларын көриў бүгинги күнниң әҳмийетли ўазыйпасы болып табылады. Сонлықтан, адвокатлар тәрепинен юридикалық хызметлер көрсетиў бағдарындағы жумысты кеңейтиў, соның ишинде исбилерменлерге рухсат беретуғын ҳүжжетлерди рәсмийлестириўде көмеклесиў, мәмлекетлик уйымларда ўәкиллик етиў, келиспеўшиликлерди суд­қа шекем шешиў, мийнет ҳуқықы бойынша юридикалық хызметлер көрсетиў, ҳуқықый саўатлылықты арттырыў сыяқлы бағдарларда бундай хызметлерди күшейтиў кереклигин айрықша атап көрсетти.

Усылар менен биргеликте мәмлекетимиз Басшысы өз Мүрәжатында суд ҳәм ҳуқықты қорғаў мәкемелериниң жумысына тек ғана халқымыздың өзи баҳа беретуғынлығын, олар ушын бирден-бир ҳәм ең жоқары талап — бул пуқаралардың нызамлы мәплерине хызмет етиўден ҳәм олардың ҳуқықларын ҳәр қандай жағдайда да қорғаўдан ибаратлығы, ең тийкарғысы, биз бир мәкемениң жолында барлық ўәкилликлер менен ресурслардың жыйналып қалыўына, өз-ара тыйып турыў ҳәм мәплер теңсалмақлылығы принципиниң бузылыўына жол қоймаўымыз зәрүр, деп билдирди.

Жуўмақлап айтатуғын болсақ, Президентимиз тәрепинен 2017-жыл 22-декабрь күни Олий Мажлиске жоллаған Мүрәжаты жәми­йетимиздеги пуқаралардың ҳәм исбилерменлердиң ҳуқықларын жоқары дәрежеде қорғаўда үлкен әҳми­йетке ийе екенлигин және бир рет атап өтемиз.

 З.БЕРДИМУРАТОВ,

Шымбай районлар­аралық экономикалық судының судьясы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF