Еркин Қарақалпақстан Вести Каракалпакстана 17:28:27, 20.02.2018
Хош келипсиз! | RSS
Сайт мазмуны

Кириў усылы

ЖЕТИСКЕНЛИКЛЕР ТАЛҚЫЛАНДЫ

Елимиз спортшыларының жәҳән ареналарында қолға киргизген табыслары халқымыздың мақтанышы саналады. Спорттың жеке гүрес түрлери бойынша қәнигелестирилген Республикалық балалар ҳәм жас өспиримлер спорт мектебинде 2017-жылда спортшы жасларымыздың қолға киргизген жетискенликлерин талқылаў ҳәм 2018-жыл «Жедел исбилерменлик, инновациялық идеялар ҳәм технологияларды қоллап-қуўатлаў жылы»на белгиленген  ўазыйпалардың орынланыўы бойынша мәжилис болып өтти.

Илажды усы мектептиң директоры А.Алланазаров кирис сөз бенен ашты.

Атап өтилгениндей, ҳәзирги ўақытта мектепте 12 спорт секциясы болып, оларда жас спортшылар еркин гүрестиң бирнеше түри, таэквондо (25:), қылышпазлық, аўыр атлетика, велоспорт, бокс, самбо, каратэ-до ҳәм пауэрлифтинг түрлери менен турақлы шуғылланып келмекте. Сондай-ақ, спорт мектебиниң сайланды командасы ағзалары өткен жылы Өзбекистан чемпионаты ҳәм кубогы жарысларында 175, халықаралық турнирлерде  48 ҳәм жәҳән чемпионатларында 10 медальды қолға киргизди. Олардан Ш.Жарылқағанова ҳәм З.Қурбашова (еркин гүрес), Н.Утебаева (қылышпазлық), Ж.Утемуратова ҳәм Ж.Бердимуратовалар (аўыр атлетика)  жоқары оқыў орынларына тест сынақларысыз кириў имканиятына ийе болды. Әсиресе, өткен жылы сентябрь айында Түркменстан пайтахты Ашхабад қаласында жабық имаратларда өткерилген V Азия ойынларында Рустам Жаңабаев алтын, Д.Яхшимуратова ҳәм С.Ешмуратовалар қола  медальлар менен елимизге оралып, халқымызды үлкен қуўанышқа бөледи.

Әлбетте, бул жетискенликлер елимизде спортқа қаратылып атырған айрықша итибардың нәтийжеси болып табылады.

Илаж соңында жеңимпаз спортшылар, оларды таярлаўда жемисли мийнет еткен тренер ҳәм нураныйларға кәсиплик аўқам комитети тәрепинен таярланған саў­ғалар тапсырылды.

А.ОРАЗОВ,  арнаўлы  хабаршымыз.

 СҮЎРЕТТЕ: жеңимпаз спортшылар.

Автордың түсирген сүўрети.

 

 

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF