Еркин Қарақалпақстан Вести Каракалпакстана 04:39:38, 22.02.2018
Хош келипсиз! | RSS
Сайт мазмуны

Кириў усылы

ТЕХНИКАНЫҢ ЖЕТИК МАМАНЫ

2017-жыл 7-декабрьде Өзбекистан Республикасы Президенти Ш.Мирзиёевтиң «Аўылхожалығы хызметкерлери күни мүнәсибети менен тараўдың раўажланыўына мүнәсип үлес қосқан ўатанласларымыздан бир топарын сыйлықлаў ҳаққында»ғы Пәрманы қабыл етилди. Оған муўапық бизиң республикамыздан да бир қатар алдыңғы хызметкерлер орден ҳәм медальлар менен сыйлықланды.  

Олар арасында өз исиниң пидайысы болған Хожагелди Абитов та бар. Ол аўыл хожалығы тараўындағы көп жыллық пидәкерлик мийнети ушын «Шуҳрат» медалы менен сыйлықланды. Әлбетте, оның бундай жоқары мәмлекетлик сыйлыққа ийе болыўы өз-өзинен болған жоқ. Хожагелдиниң «Тахтакөпир агросервис» машина трактор паркинде «Магнум 2126» маркалы сүрим тракторы операторы болып жумыс ислеп атырғанына саррас жигирма жылдың майданы болыпты. Ол усы өткен жыллар ишинде райондағы дийқан-фермер хожалықларына сапалы хызмет көрсетип, олардың гүзги қырманда мол зүрәәт топлаўын мүнәсип үлес қосты. 

Соны айрықша атап өтиў керек, «Тахтакөпир агросервис» МТП бүгинги күнде жоқары өнимдарлы 5 сүрим тракторы ҳәм 7 дән түйеклейтуғын комбайн­ға ийе. Жәмийет тәрепинен бул жерде ислеўшилердиң өнимли мийнет ислеўи ушын барлық қолайлы шараятлар жаратыл­ған, ис ҳақы пуллары өз ўақтында берип барылмақта.

— Мениң азы-кем ислеген мийнетимниң елимиз басшылары тәрепинен баҳаланып, мәмлекетлик сыйлық бергени ушын ҳүкимет басшыларына миннедаршылық билдиремен,-дейди Хожагелди өзиниң ерискен табысынан толқынланып. — Алдағы ўақытлары елимиз қырманының бәлент бола бериўинде бар күш жигеримди аянбай жумсай беремен...

Х.Абитов аўыл хожалығы саласында алдынғы механизатор болыўы менен бирге үлгили шаңарақ басшысы. Бүгинги күни ол өмирлик жолдасы Шәригүл Абдамбетова менен үш перзент­ти тәрбиялап камалға келтирмекте.

 А.ОРАЗОВ,  арнаўлы  хабаршымыз. 

СҮЎРЕТТЕ: (солда) Хожагелди Абитов устахана меңгериўшиси Мырзамурат Ибадуллаев пенен мәсләҳәтлеспекте.

Ә.ОРАЗОВтың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF