Еркин Қарақалпақстан Вести Каракалпакстана 09:56:21, 28.05.2018
Хош келипсиз! | RSS
Сайт мазмуны

Кириў усылы

ЖАС  ӘЎЛАД  ТӘРБИЯСЫ  УШЫН

Бүгинги  күнде мәмлекетимиз тәрепинен балаларымыздың  билимли, зийрек, епшил болып камалға келиўинде тәлимниң  дәслепки  басқышы  болған  мектепке  шекемги  билимлендириў  системасын  раўажландырыўға  айрықша  итибар  қаратылып атыр.

Президентимиздиң  2017-жыл  30-сентябрьдеги  «Мектепке  шекемги  билимлендириў  системасын  басқарыўды түп-тийкарынан  жетилистириў  илажлары ҳаққында»ғы қарары бул бағдардағы жумыслардың жаңаланыўына түртки болды.  Ҳақыйқатында да, өсип кия­тырған жас әўлад тәрбиясы  бүгинги күнде  мәмлекетлик сиясат дәрежесине  көтерилди. Олардың қызығыўшылығын ҳәм умтылысын есапқа алып, ҳәр тәреплеме тыянақлы тәлим-тәрбия бериў, дүнья-қарасын кеңейтиў,еркин пикирлеў қәбилетин раўажландырыў, қәлбине ҳәм санасына миллий, улыўма инсаныйлық қәдириятларды сиңдирип барыў арқалы ана-Ўатанға сүйиспеншилик  сезимин оятып тәрбиялаўдан ибарат.   

Төрткүл районында  үш жастан жети жасқа шекемги 10092 балалар бар. Солардан 2664 бала 26,4 проценти  мектепке шекемги  билимлендириў  мәкемелеринде тәрбияланып атыр.  Ал, ҳәзирги ўақытта бес-алты жас аралығындағы  балаларды реже бойынша   мектепке шекемги  билимлендириў  мәкемелеринде ҳәм «Оқбошли» аўыл пуқаралар  жыйынында жайласқан 59-мектептиң бос турған ханаларынан  пайдаланып, тәлим-тәрбия жумысларын жүргизиў бойынша қысқа мүддетли топарларға 1275 бала қамтып алынды. Балалардың ҳәр тәреплеме интеллектуаллық, әдеп-икрамлылық, эстетикалық ҳәм физикалық жақтан раўажланыўы  ушын  барлық мүмкиншиликлер жаратылып, педагог кадрлар менен тәми­йинленди.            

 Жақында Төрткүл районы ҳәкими Н.Худайбергеновтың  басшылығында 2018-жылы  мәмлекетлик жеке меншик  шериклик тийкарында қурылысы басланып атырған 12 мектепке шекемги билимлендириў  мәкемесин ҳәм бир үй бақшасын барып көрдик. Буның нәтийжесине қарап күн тәртибиндеги кешиктирип болмайтуғын ўазыйпалар белгиленип алынды. Себеби  Төрткүл районы Қарақалпақстан Республикасы бойынша  сынаў  майданшасы деп белгиленген еди. Соның ушын жуўапкершиликти сезине отырып, район белсендилери иске мәрдана  кирисип кетти. 

 Р.РОЗУМБЕТОВА,

Төрткүл районлық мектепке шекемги билимлендириў бөлими баслығы. 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF