Еркин Қарақалпақстан Вести Каракалпакстана 04:26:38, 22.02.2018
Хош келипсиз! | RSS
Сайт мазмуны

Кириў усылы

«НАЎҚАН  БАҒ»ДАҒЫ  УНАМЛЫ  ИСЛЕР

Көпшиликке мәлим, 2017-жыл 3-февральда Өзбекис­тан Республикасы Президентиниң «Мәҳәлле институтын буннан былай да жетилистириў илажлары ҳаққында»ғы Пәрманы қабыл етилген еди. Онда мәҳәлле инс­титутын халыққа ең жақын структураға айландырыў ҳәм олардың материаллық-техникалық базасын беккемлеўге айрықша итибар қаратылған.

Пайтахтымыздағы «Наў­қанбағ» мәкан пуқаралар жы­йыны аймағында түрли миллет ўәкиллеринен қурал­ған 800 ден артық шаңарақ беккем аўызбиршилик ҳәм татыўлықта жасап келмекте. Өткен «Халық пенен пикирлесиў ҳәм инсан мәплери жылы» деп жәрияланған 2017-жылда олардың турмыс шараятын жақсылаў мақсетинде аймақта нәтийжели жумыслар әмелге асырылды. Атап айтқанда, аймақ турғынларының мүтәжликлерин  қанаатландырыў мақсетинде электр энергиясы тармақлары, ишимлик суўы қубырлары жаңадан тартылып, жыйын аймағынан өтиўши гүзар жол асфальтланды. Сондай-ақ, исбилерменлик пенен шуғылланыўды нийет еткен 37 шаңарақ «Алоқа банк» Қарақалпақстан филиалы тәрепинен  жеңиллетилген кредит пенен тәмийинленди. Өз гезегинде пуқаралардың қыйтақ жерлерде ыссыхана шөлкем­лес­тириўи, мал шарўашылығы ҳәм қусшылықты раўажландырыўда қосымша жаңа жумыс орынлары жаратылды.   

— Аймақ турғынлары менен жийи-жийи ушырасыўлар шөлкемлестирилип, нураный ҳәм көп балалы, кем тәми­йинленген шаңарақлардың ҳал-жағдайларынан хабар алынып, байрам илажларында саў­ғалар менен хошаметленбекте, - дейди жыйын ақсақалы Бахтияр Елмуратов. — Соның менен бирге қәўендер шөлкемлер тәрепинен қайырқомлық жәрдемлер көрсетилип, II топар майыбы болған С.Утемуратов ҳәм П.Өтегеноваларға майыплар арбашасы тапсырылды. Сондай-ақ, усындай пуқара Б.Мамытбаевтың «Миллий банк»тен ашылған есап бетине бир миллион сум өткерип берилди.  Буннан бас­қа да, Б.Муртазаева ҳәм     Б.Азатовалар өз қәнигелиги бойынша жумысқа орналастырылды. Және айтып өтетуғын нәрсе, пуқараларымыздан аймақта дәрихана ҳәм балалар майданшасы жоқлығы себепли мүрәжатлар келип түспекте. Бул бойынша тийисли шөлкемлерге усыныслар берилди.

Соның менен бирге, мәҳәлле аймағында ҳуқықбузарлықлар ҳәм жынаятшылықтың алдын алыў бойынша аймақ сақшылары тәрепинен нәтийжели жумыслар алып барылмақта.

— Баслы мақсетимиз пуқаралардың шаңарақта тыныш-татыў жасаўын тәмийинлеў болып табылады. Бунда «Мениң мәҳәллемде жынаят болмаўы керек» деген идеяны қәлиплестириўде жәмәәт ағзалары менен биргеликте профилатикалық илажлар алып барылмақта, - дейди мәкан пуқаралар жыйынының профилактика инспекторы Расул Таңирбергенов.

Әлбетте, бул илажлар жәмийетлик тәртипти сақлаўда, халықтың тыныш ҳәм абадан турмысын тәмийинлеўде үлкен жуўапкершиликти талап етеди. 

 А.ОРАЗОВ,

арнаўлы хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF