Еркин Қарақалпақстан Вести Каракалпакстана 00:00:48, 31.05.2020
Хош келипсиз! | RSS
Сайт мазмуны

Кириў усылы

МЕНИҢ  МӘҲӘЛЛЕМ ЖЫНАЯТТАН  АЎЛАҚ

«Ҳуқықбузарлықлар профилактикасы ҳәм жынаятшылыққа қарсы гүресиў системасын буннан былай да жетилистириў илажлары ҳаққында»ғы қарары қабыл етилгеннен кейин өткен жылы 15-ноябрь күни болып өткен видеоселектор жыйналысында ҳүрметли Президентимиздиң жәмийетте жынаятшылық ҳәм ҳуқықбузарлықлардың алдын алыў, бул бойынша профилактикалық ис-илажларды күшейттириў тек ғана тийисли уйымлар емес, ал, кең жәмийетшилик ҳәм халықтың жуўапкершилигин арттырыў бойынша айтқан сын пикирлери мәкан пуқаралар жыйынлары ақсақалларының алдына да үлкен жуўапкершиликли ўазыйпаларды қойды.

Мине усыннан келип шыға отырып, орынларда «Мәҳәллемиз жынаятшыллықа қарсы турады», «Мениң мәҳәллем жынаятшылықтан аўлақ» ҳәм басқа да сүренлер астында түрли кешелер өткерилмекте.  

Ҳүждан азабы ҳәм соңғы пушайманнан ҳеш кимге пайда жоқ екенлиги әйне ҳақыйқат. Солай екен, қандай да бир жағымсыз ўақыядан кейин тийкарғы қәтени излеўден жаманы жоқ. Ҳақыйқатында да, аймағымызда жүз берип атырған ўақыялардан өз ўақтында хабардар болсақ, бийпәрўалықтан аўлақ болып, шаңарақларда, мәҳәллелерде журтымыздың тынышлығы ҳәм раўажланыўына мүнәсип үлес қосыўға умтылсақ, әлбетте, жынаятшылықлардың азайыўы турған гәп.

Биз сөз етпекши бол­ған Нөкис қаласындағы «Боз аўыл» мәкан пуқаралар жыйыны аймағында бир нешше жыллардан берли аймақ турғынларын уялдыратуғындай жағдайлар жүз бермеди. «Боз аўыл» үлкен аймақ болып, 33 көшени өз ишине ал­ған. Бул жерде мыңнан аслам пуқаралар жасайды. Олардың тынышлығын сақлаўда профилактика инспекторлары жыйын белсендилери менен биргеликте жумыс алып бармақта.

— Президентимиздиң көрсетпеси тийкарында «Мениң мәҳәллемде жынаят болмаўы керек» деген идеяны аймақ турғынларының ҳәр бирине терең түсиндирип атырмыз. Елимиздиң, аймақтың аўызбиршилиги, тынышлығын сақлаў бәршениң ўазыйпасы екенлигин айтыўдан шаршамаймыз. Және де аймағымыз тынышлығын сақлаўда жәмлеспеген жасларды иске тарттық, - дейди мәкан пуқаралар жыйыны баслығы Бахыт Қосымбетов.

— Аймағымыз тыныш-татыў. Жасларымыз арасында жаман иллетлер жоқ. Көше бийлерин жыйнап, түсиник жумысларын алып барыўды әдетке айландырғанбыз. — Тилекке қарсы, бес бармақтың бирдей болмағанындай, билип-билмей, жаслық етип аяғын қыя басып атырғанлар да жоқ емес. Өткен жылдың он бир айы даўамында аймақта еки жынаят жүз берди. Биреўиниң ҳаял-қызлар тәрепинен исленгени ашынарлы жағдай,-дейди аймақтың профилактика инспекторы Абат Санкибаев.

С.ТУРДЫБЕКОВА.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF