Еркин Қарақалпақстан Вести Каракалпакстана 05:44:31, 18.06.2018
Хош келипсиз! | RSS
Сайт мазмуны

Кириў усылы

МИЛЛИЙ  АРМИЯМЫЗДЫҢ ЕРТЕҢГИ  ЖЕТКИНШЕКЛЕРИ

Өзиниң дүзилгенине енди ғана жигирма алты жыл толып атырған Миллий Армиямыз бүгинги күни жаслардың ҳақыйқый мәртлик мектебине айланды. Соңғы жыллары елимиз жаслары арасында Өзбекистан Республикасы Қураллы Күшлери қатарында хызмет етиўди қәлеўшилер саны жылдан-жылға артып бармақта. Бул болса, Армиямыз абыра­йының кең жәмийетшилик арасында өсип баратырғанлығынан дәрек береди.

 Әсиресе, Өзбекистан Республикасы Президентиниң 2017-жыл  24-январьдағы «Өзбекистан Республикасы Қураллы Күшлерин реформалаў ҳәм буннан былай да раўажландырыў ўазыйпаларын әмелге асырыў бойынша ис-илажлар бағдарламасы ҳаққында»ғы қарары ҳәм Өзбекистан Республикасы Министрлер Кабинетиниң   2017-жыл 21-апрельдеги «Жоқары әскерий оқыў орынларына кириў ушын талабанларды таярлаў системасын және де жетилистириў ис-илажлары ҳаққында»ғы қарары тийкарында  2017-2018-оқыў жылынан баслап мәмлекетимиздиң барлық аймақларындағы бир қатар орта арнаўлы оқыў орынларында әскерийлестирилген арнаўлы топарлардың ашылыўы бул тараўға қызыўшы жас әўлад ўәкиллерине және де кең имканиятлар есигин ашып берди. Атап айтқанда, усындай топарлар Бердақ атындағы Қарақалпақ мәмлекетлик университетиниң Академиялық лицейи ҳәм Төрткүл Банк колледжинде шөлкемлестирилип, оларда ҳәр тәреплеме шыныққан, саламат ҳәм билимли оқыўшылар тәлим-тәрбия алмақта.

— Оқыўшыларды оқыўға қабыллаў үш басқышта шөлкемлестирилди,-дейди бизге лицей директоры Гүлайым Алламбергенова. — Атап айтатуғын болсақ, оқыўға ҳүжжет тапсырыўшы жаслар дәслеп қала, район ҳәм республика көлеминде медициналық тексериўден өткерилген болса, екинши басқышта қарақалпақ тилинен жазба жумысы, психологиялық тест ҳәм белгиленген физикалық нормативлерди орынлаў бойынша имтихан тапсырды. Ал, усы сынақлардан табыслы өткен 55 оқыўшы мәмлекетлик тест сынақларына жиберилип, соннан жоқары балл топлаған 26 оқыўшы оқыўға қабылланды. Сондай-ақ, квотадан тысқары республикалық Меҳрибанлық үйинен бир оқыўшы оқыўға қабылланып, бүгинги күни  әскерийлестирилген арнаўлы топарда 27 оқыўшы оқып билим алмақта. Бул топар ушын лицейден арнаўлы оқыў блогы ажыратылып, онда оқыўшылардың заманагөй тәлим-тәрбия алыўы ушын барлық қолайлы шараятлар жаратылған. Атап айтқанда, Арқа-Батыс әскерий округи жәрдеминде  жасларды шақырыққа шекемги таярлаў, пуқаралық қорғаныў, медициналық билим тийкарлары, руўхыйлық ҳәм ағартыўшылық ханалары, Ўатансүйиўшилик руўхындағы шақырықлар, фотосүўретлер ҳәм плакатлар менен тәмийинленди. Буннан тысқары, оқыўшылардың бос ўақытларын мазмунлы өткериў мақсетинде ҳәрқыйлы пән дөгереклери ҳәм спорт секциялары турақлы түрде ислеп тур. Сондай-ақ, ҳәр ҳәптениң жума күни Арқа-Батыс әскерий округи, қала ҳәм районлық қорғаныў бөлими хызметкерлери жасларға жоқары әскерий оқыў орынлары жумысы ҳәм мүддетли әскерий хызмет бойынша кең түсиниклер берип келмекте...

Әлбетте, жас әўлад ушын жаратылған бундай кең имканият ҳәм шараятлар олардың  әскерий тараўға деген қызығыўшылығы ҳәм Ўатанға деген сүйиспеншилигин және де арттырмақта. Бул болса, ғәрезсиз мәмлекетимиздиң ертеңги келешеги исенимли қолларда екенлигинен дәрек береди.

 Ә.ОРАЗОВ, арнаўлы хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF