Еркин Қарақалпақстан Вести Каракалпакстана 19:30:33, 15.12.2018
Хош келипсиз! | RSS
Сайт мазмуны

Кириў усылы

ЗАМАН  БАҒЫТЫН  АҢЛАҒАН  ЖИГИТЛЕР

Өзбекистан Республикасы Президентиниң «Қарақалпақстан Республикасы ҳәм Хорезм ўәлаятында исбилерменлик жумысын алып барыў ушын қосымша қолайлы шараятлар жаратыў илажлары ҳаққында»ғы қарарында көрсетилген жеңиллик ҳәм имканиятлардан нәтийжели пайдаланып кия­тырған республикамыз исбилерменлери елимиздиң экономикасын жедел раўажландырыў ҳәм жаңа жумыс орынларын жаратыў бағдарында бир қатар унамлы жумысларды әмелге асырып келмекте.

Әсиресе, фармацевтика товарлары ҳәм препаратлары, электротехника өнимлери, сондай-ақ, пардозлаў қурылыс материалларын ислеп шығарыўға қәнигелескен юридикалық тәреплердиң 2017-жылдың 1-апрелинен 2022-жылдың 1-январына дейинги дәўирде мүлк, жер, абаданластырыў ҳәм социаллық инфраструктураны раўажландырыў салығы, соның менен бирге Өзбекистан Республикасы Министрлер Кабинети жанындағы Республикалық жол қорына мәжбүрий ажыратпаларды төлеўден азат етилиўи, киши бизнес субъектлери қатарының көбейиўине өзиниң унамлы тәсирин тийгизбекте.

 Мәмлекетимиздиң ең арқа шығыс аймағы есап­ланған Тахтакөпир районында буннан бес-алты жыл бурын өндирис кәрханалары жоқтың қасында, бар болғанда да бармақ бүгип санарлы еди. Соңғы ўақытлары Президентимиз Ш.Мирзиёев ҳәм республика ҳүкиметиниң исбилерменликти қоллап-қуўатлаў ҳәм оларға ҳәр тәреплеме қолайлықлар жаратыў бо­йынша жүргизип атырған сиясатының арқасында бул аймақта да көплеген санаат ҳәм хызмет көрсетиў кәрханалары иске түспекте.

Жас өнермент Жамал Сапарбаев басшылық етип атырған «Шухрат Стайлс» шаңарақлық кәрханасы усындай исбилерменлик субъектлериниң бири болып табылады.

— Ата-бабаларымызда уста өнермент болмаса да, турмыстың өзи инсанды шебер етип жибереди екен,-дейди ол өзиниң басып өткен мийнет жолы ҳаққында сорағанымызда. —Хийўада жасайтуғын қыз апамыз Гүлимханның үйине қыдырып барып, қоңсы уста Шухрат Ибадуллаевқа көмеклесейин деп жүргенимде бул тараўға шәкирт болып араласып қалғанымды сезбей де қалдым. Соның арасында көзди ашып-жумғанша он жыл ўақыт өтипти ҳәм устазымның ақ пәтия­сын алып аўылға қайта оралдым. Дәслеп үйде жеке өнермент болып хызмет көрсеткен болсам, Президентимиз Ш.Мирзиёевтиң «... кимде-ким исбилермен болып бир-еки адамды жумыс пенен тәмийинлесе, оны төбеме көтеремен» деген сөзлеринен тәсирленип, елимиз экономикасының беккемлениўи ҳәм жумыссызлықты сапластырыўға өз үлесимди қосыў мақсетинде усы кәрхананы иске қостым ҳәм бир-неше колледж питкериўшилерин жумыс пенен тәмийинледим. Бүгинги күни район халқына ҳәр қыйлы өлшем ҳәм түрдеги заманагөй мебель әнжамларын таярлап бермектемиз...

 Ал, және бир исбилермен Бахтияр Султанов болса район орайынан жаңа үлгидеги автомобильлерге хызмет көрсетиў орайын ашып, тек ғана усы аймақ турғынларының емес, қоңсылас қараөзекшилердиң де алғысына бөленип жүр.

Ҳәзирги ўақытлары бул орайда вулканизация, мотор жыйнаў, кузов оңлаў, май алмастырыў цехлары бар болып, онда Бекбосын Абдимов, Жумабай Сапаров, Салаўат Ермеков, Дәўран Ибрагимов сыяқлы жергиликли жас қәнигелер мийнет етпекте.

Әлбетте, Бахтиярдың истиң көзин билетуғын исбилермен болып жетилисиўи өз-өзинен болған жоқ. Бунда оның әкеси Қарақалпақстан Республикасына мийнети сиңген аўыл хожалығы хызметкери Пирнияз Султановтың ислеген ғам­қорлығы ҳәм баҳалы мәсләҳәтлериниң тутқан орны айрықша болды деп толық айта аламыз.

— Быйылғы жылдың елимизде «Жедел исбилерменлик, инновациялық идеялар ҳәм технологияларды қоллап-қуўатлаў жылы» деп жәрияланыўы ҳәм усы тийкарда киши бизнес субъект­лерине көрсетилип атырған ғамқорлық ҳәм жеңилликлер бизге айрықша күш-жигер ҳәм қуўаныш бағышлады, - дейди Бахтияр Султанов. — Алдағы ўақытлары кәрханамызда хызмет көрсетиў көлемин кеңейтип, жумыссыз жаслардың бәнтлигин тәмийинлеўди нийет етип отырмыз...

«Қундыз-Абыз» кәрханасының баслығы Қундызбай Қайпенов болса, район ора­йындағы қараўсыз қалған ески гастраном имаратын инвестиция киргизиў шәрти менен алып, бул жерде заманагөй нанбайхана ҳәм макарон цехын иске түсирди. Ҳәзир кәрханада бирнеше жаслар турақлы жумыс орны менен тәмийинленип, бул жерде таярланған өнимлер аўыл халқынан тысқары  2-4-10-санлы мектепке шекемги билимлендириў мәкемелери ҳәм районлық медицина бирлеспесине өз-ара шәртнама тийкарында жеткерилип берилмекте.

Ә.ОРАЗОВ, арнаўлы  хабаршымыз.

Тахтакөпир районы

Сүўретлерде: 1. Исбилермен Ж. Сапарбаев өз өнимлерин қарыйдарға көрсетпекте. 2. (солдан оңға қарай) Б. Абдимов, С.Ермеков, исбилермен Б.Султанов  ҳәм Ж. Сапаровлар өз-ара ойласықта. 3. Нанбайхана жумысшылары Г.Досбергенова ҳәм К. Айтымбетовалар.    

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF