Еркин Қарақалпақстан Вести Каракалпакстана 01:16:22, 19.01.2018
Хош келипсиз! | RSS
Сайт мазмуны

Кириў усылы

ҚАРАҚАЛПАҚСТАНЛЫ ЖАСЛАР КОРЕЯЛЫ  ҚӘНИГЕЛЕРДИ ҲАЙРАН ҚАЛДЫРДЫ

Бердақ атындағы қарақалпақ мәмлекетлик университети журналистика тәлим бағдары 4-курс  студентлери  жақында Нөкис қаласындағы бир қатар әҳмийетли орынлар­ға саяxат  еткени ҳаққында xабар берген едик. Саяxат шеңберинде студентлер “Samsung-Nukus” қоспа кәрxанасында да болып, оның жумыслары менен жақыннан танысты.  

“Samsung-Nukus” қоспа кәрxанасы 2014-жылда өз жумысын баслаған. Кәрxанада 2017-жылдың апрель-октябрь айларында қайта қурылыс ҳәм реконструкция жумыслары әмелге асырылды. Бул ушын 14,0 млрд сум, ал  үскенелер ушын 19,0 млрд сум сарпланды. Жәми киргизилген инвестиция 33 млрд. сум.

Бүгинги күнде кәрxанада бир күнде 4 түрдеги 400 дана телевизор ҳәм 13 түрдеги 900-1000 дана шаңжутқыш ислеп шығарылмақта. 2018-жылдан баслап өз өнимлерин 15 мәмлекетке экспорт етиўди режелестирген. Кәрханада 200 адам жумыс пенен тәмийинленген. Олардың көпшилиги колледж питкериўши жаслар.

Кәрханаға келип, жумыс барысы менен танысқан кореялы қәнигелер “бизиң жумысымызды колледж питкериўшилери ислей алып атыр ма?” деп ҳайран қалды, - дейди кәрxана xызметкери Еркин Абдураxманов.

Кәрxанада жумысшылар ушын барлық қолайлықлар жаратылған. 8 саатлық жумыс күни, күнниң еки мезгилинде жумысшыларға 20 минутлық демалыс бериледи, еки мезгил ыссы аўқат. Китапxана, ойын майданшалары ҳәм спорт заллары шөлкемлестирилген, жумысшылардың жумысқа қатнаўы ушын автобус қойылған.

“Samsung-Nukus” қоспа кәрxанасында өним ислеп шығарыў ушын аўысық бөлеклердиң 50% ти Кореядан алып келинсе, 50% ти кәрxананың өзинде ислеп шығарылады. Бул кәрxанада да ҳеш қандай шығынды болмайды. Яғный жумыс процесинде шыққан шығынды арнаўлы үскенеде майдаланып, қайта өндириске жибериледи.

“Samsung-Nukus” кәрxанасы быйылдан баслап микротолқынлы печь ислеп шығарыўды режелестирген.

 А.Ажимуратов.

Қарақалпақстан  хабар агентлиги.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF