Еркин Қарақалпақстан Вести Каракалпакстана 01:15:35, 19.01.2018
Хош келипсиз! | RSS
Сайт мазмуны

Кириў усылы

ӨЗГЕРИСЛЕРДИ,  ЕҢ ДӘСЛЕП, ӨЗИМИЗДЕН  БАСЛАЎЫМЫЗ КЕРЕК

Мәмлекетимиз басшысының Өзбекистан Республикасы Олий Мажлисине Мүрәжатын ҳәр бир ўатанласымыздың терең толқынланыў ҳәм зор қызығыўшылық пенен тыңлағанына гүман жоқ. Неге дегенде, бул тарийхый шынлықта көтерилген мәселелер, ортаға тасланған барлық машқалалар бәршемиздиң бүгинимиз ҳәм ертеңги күнимизге, турмысымыз ҳәм арзыў-үмитлеримизге тиккелей байланыслы.

Президентимиздиң күйиниўшилик пенен ақты ақ, қараны қара, деп қалыслық пенен билдирген пикирлери халқымыздың әйне кеўлиндеги гәплер болды. Бул бағдарда мәмлекет ҳәм жәми­йетти түпкиликли раўажландырыў, Ҳәрекетлер стратегиясында нәзерде тутылған мақсет ҳәм тийкарғы бағдарларды әмелиятта жүзеге шығарыў менен байланыслы әҳмийетли ўазыйпалар анық, түсиникли ҳәм ҳақыйқый көрсетилип берилди, усы күнге шекем көз жумып келинген өзи боладылық, көзбояўшылық, бюрократия, коррупция сыяқлы иллетлердиң тамыры менен жоғалыўы ушын тек тийисли мәкеме ҳәм шахслар емес, ал, ҳәр биримиз белгили дәрежеде жуўапкер екенимизди және де тереңирек сезиндик. Шын мәнисиндеги өзгерислер дәўиринде реформалардан шетте турмай, белсенди пуқаралық пози­циясын көрсетиў, халық сыпатында бир күшке айланып, жәмлесиў, қысқаша айтқанда, өзгерислерди дәслеп өзимизден баслаўымыз кереклигин аңладық. Сергек тарттық. Ҳақыйқатында да, елимиз басшысының «Өзимиз өзимизге қыянет етпесек, өзимиз өзимизди алдамасақ, ҳадал-пәк болып мийнет етсек, гөзлеген барлық шеклеримизге, әлбетте, ерисетуғынымызға беккем исенемен. Бул бағдарда мен бәринен бурын көп сынақлардан жарқын жүз бенен өткен уллы хал­қымыздың беккем сабыр-тақатына ҳәм дөретиўшилик потенциалына исенемен», деген сөзлери жуўапкершилик жүклеўи менен бир қатарда, Ўатанымыздың тәғдири ҳәм келешеги, балаларымыздың бахыт-ығбалы ушын пидайы болыўға шақырады.

Әлбетте, ғәрезсизликтиң дәслепки шерегинде түрли тараўларда қолға киргизилген табыслар қатарында хал­қымыздың турмыс тәризинде, дүньяқарасында қандай да бир өзгерислер жүз бергенин мақтаныш пенен тилге аламыз. Буны бийкар етпеген ҳалда атап өтиў керек, ҳәзирги заманға мас рәўиште және де сергек ҳәм пидайы болыў, сәл ғана немқурайдылық ҳәм бийпәрўалық та базыда киши машқалалардан социаллық, экономикалық дағдарысларға жол ашыўы мүмкинлигин зин­ҳар умытпаслық әйне зәрүрлик болып табылады. Және бир ҳақыйқатлық сол, бүгин адамларымызда наразылық оятып атырған машқала менен кемшиликлерди ҳеш ким шеттен келип, бийғәрез шешип бермейди.

Бир ғана мысал. Бүгин белгили бир күшлердиң дүньяны бөлип алыўға болған умтылысы, гүреси күтилмеген тәризде кескинлесип ҳәм өзгерип баратырған қурамалы пайытта ертеңги күнимиздиң ийелери есаплан­ған жасларымызды қорғаў, ҳәр тәреплеме қоллап-қуўатлаў турмыслық мәселе екенлиги ҳаққында қайта-қайта айтып атырмыз. Бирақ, қоңсымыздың перзенти урлық  яки нәшебент­лик қурдымына түсип қал­ғаны ҳаққында еситсек, көбинесе ашыныўдан арыға өтпеслигимиз де рас. Ҳақыйқатында сол жас өспирим ямаса қыздың жүрис-турысын, көшеде өзин тутыўын көрип, көрмегенликке ал­ғанымыз, «Маған не! Басында ата-анасы бар-ғой! Және мектеп бар, мәҳәлле бар...» сыяқлы көнликпелеримиз бенен бундай кеўилсизлик себепшилеринен бол­ғанымызды көбинсе тән ала бермеймиз. Күни келип, ҳәтте өз баламыз да бундай бийғамлық ҳәм бийпәрўалық қурбаны болыўы мүмкинлигин қыялымызға келтирмеймиз.

Президентимиз ҳәр бир шығып сөйлеўинде, аймақларға сапар етип, адамлар менен алып барған ҳәр бир пикирлесиўинде өсип киятырған әўладтың бүгини ҳәм келешеги ҳаққында айрықша тоқталып, жасларды қыйнап, ойландырып атырған машқалаларды үзил-кесил шешиўге биринши дәрежели ўазыйпа сыпатында қараўы тосыннан емес. Атап айтқанда, парламентке Мүрәжатында да биз уллы бабаларымыздың мүнәсип избасарлары болатуғын жетик инсанларды тәрбиялаў мәселесине жетерлише әҳмийет бермей атырғанымыз тилге алынып, интеллектуал ҳәм мәдений потенциаллы жасларымызды камал­ға келтириў раўажланыўымыздың шешиўши факторы екенин умытпаў кереклигине әҳмийет берилди. Усының өзи-ақ бәршемиз, қайсы лаўазымда ислеўимиз ҳәм социаллық келип шығыўымызға қарамастан, жас әўлад тәғдирине бирдей жуўапкер екенимизге, «Баланың жаты болмайды» сүрени көзқарасларымыз бенен әдетлеримизден беккем орын алса ғана, бүгин ул-қызларымыз дус келип атырған түрли машқалалар менен иллетлердиң сапластырылыўына және бир мәрте ишара болып табылады.

Улыўма, жәмийетлик турмысымыздың қайсы тараўын алып қарамайық, әмелге асырылып атырған халықшыл реформалардың әмелде тастыйығын табыўы ушын биз, сиз — ҳәммемиз ояў қәлб, ояў руўх ҳәм ояў көзқарас пенен өзгерислерге өз үлесимизди қосыўымыз керек.

 

Батыр  МӘТМУРАТОВ,

Өзбекистан Республикасы Олий Мажлиси Сенаты

Нызамшылық ҳәм суд-ҳуқық мәселелери комитетиниң баслығы.

(«Халқ сўзи» газетасының 2017-жыл 26-декабрь санынан алынды).  

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF