Еркин Қарақалпақстан Вести Каракалпакстана 00:08:46, 18.06.2018
Хош келипсиз! | RSS
Сайт мазмуны

Кириў усылы

ЕРИК  ГҮЛЛЕРИН  САҒЫНЫП  ЖАСАЙТУҒЫН  ФЕРМЕР

Дийқаншылық пенен айланысқанлар гәпке «шорқақ» болады дегенлердиң пикирине қосыла бермеймиз. Гүрриңди керекли бағытқа бурсақ, базылары бир сөйлесе шорта кесип, пикирин қалпал болса да оңдырмай айтады. Елликқала районындағы «Тоҳир уғли Боғибек» фермер хожалығы баслығы Фархад Атаджанов та керек жеринде гәп келсе буғып қалмайтуғынлар тайпасынан.

Ол, кишипейил, ҳадал, жанкүйер ҳәм пидайылығы арқасында елдиң нәзерине түсти. Хошласып атырған жылымыз елимиздиң барлық фермерлери сыяқлы Фархад ушын  да табыслы жуўмақланып атыр. Гәпти созбай оның сөзлерине қулақ түргенди дурыс деп таптық.

— Быйыл, фермерлердиң көкирегине самал тийди. 2004-жылы фермер хожалығын дүзгели, биримиз — еки болғанын бийкарламайман. Лекин, ҳүрметли Шавкат Мирзиёев Президент болған бир жыл ишинде аўыл хожалығы тараўында елеўли жаңаланыўлар жүз берди. Әсиресе, ҳәр жылы декабрь айының екинши екшембиси аўылхожалығы тараўы хызметкерлери күни деп белгилениўи бизлерге көрсетилген сый-ҳүрметке санайман. Усы мүнәсибет пенен «Дослық» орденин Президентимиздиң қолынан алғаным өмиримдеги умытылмас ўақыя деп билемен. Жоқары сыйлық, маған үлкен жуўапкершилик жүклегенин жүрегимнен сезинемен. Бул дәрежеге жетиўиме себепши болған аўылласларымнан миннетдарман. Ташкенттен аўылыма келгеннен, ҳәр жылы несийбемизди шөпшейтуғын атызларымды көргим келип, ат басын ирктим. Оларды бейишке мегзетемен. Әкем ерксиз есиме түсти. Ҳешкимге айтпайтуғын сырымның сандығын ашсам, бәҳәрде аппақ гүллерге оралған ерик ағашларын сағынып жасайман. Ерик гүллегенин көргенсиз бе! Бәҳәрдиң әжайып гөззаллығы, сыры усында жәмленген. Оны сағынбаўға бола ма!

Балалығым аўылда өтти. Әкем Бағыбек пахташылықта механизатор, бригадир болып иследи. Қасында демеўши болып оннан көп нәрсе үйрендим. 1999-жылы сум әжел оны арамыздан алып кетти. Өмир бойы атызда ислеп, фермер яғный өз жеринде дақыл егиў әрманы иске аспағаны кеўлимди қабартады. Бирақ, бизлерге несип еткенине шүкиршилигимиз көп. Төрткүл аўыл хожалығы техникумының механизация бөлимин питкергеним фермерликке аяқ қосқанымда пайдасын тийгизди. Ҳәзирги күнде көп тармақлы фермер хожалығына айландық. Пахта, гүзлик бийдайдан тысқары, 3 сотых жердеги ыссыхана ҳәм ярым гектар майдандағы ҳәўизимизде балық өсирип атырмыз. Быйыл, ғәлледен босаған атызларымызға тәкирарый егинлерден салы, картошка, мәш ҳәм  геширден қосымша алған 70 миллион сум нобай дәрамат қалтамызды қампайтты. Өтип баратырған жылда ҳәмме дақыл ҳәм пилледен 210 миллион сум пайда алдық.

2015-жылы 40 центнершилер қатарында «Малибу» машинасы менен сыйлықландым. Үлкен улым Қуўандық ҳәм оннан тетеси Атабеклер жумыстың аўырын бир ийнимнен атқарыўда қолласып жүр. Бала-шағамыздың баўыры пүтин, мийнети қәдирленген бахытлы фермер болса, биздей-ақ болар. Ерик гүллеўин асығыслық пенен күтип жүрмен. Жердиң тоңы жибип, жаплардан суўлар сырқырап ақса, дала шертегине көшип өтемен. Себеби, «Дослық» ордени бурынғыданда жедел ислеўге үндейди. Елимиздиң барлық фермерлери, Президентимиздиң бизлерге деген исенимин ақлаўымыз шәрт. Ал, халқымызды кирип келген 2018-жыл менен қутлықлап, шаңарақларына бахыт, аўызбиршилик ҳәм дастурханларына қут-берекет тилеймен.

Ф.Атаджановтың кеўил кеширмелерин қағазға көширген:

 Қонысбай РЕЙМОВ, өз хабаршымыз.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF