Еркин Қарақалпақстан Вести Каракалпакстана 17:50:44, 15.12.2018
Хош келипсиз! | RSS
Сайт мазмуны

Кириў усылы

ЖАС ШАҢАРАҚЛАРҒА ТУРАҚ ЖАЙЛАР ТАПСЫРЫЛДЫ

Жаңа жыл байрамы пайтахтымыздағы «Қумбыз аўыл» мәкан пуқаралар жыйынының аймағында Өзбекистан жаслар аўқамының қалалық ҳәм ра­йонлық кеңеслерине «Матиз» жеңил автомашиналары, сондай-ақ, республикамыздың жәмийетлик-сиясий турмысында белсене қатнасып атыр­ған жас шаңарақларға жаңаланған үлги жойбарлар бойынша қурылған арзан турақ жайлар пайдаланыўға тапсырылды.

Илажда Қарақалпақстан Республикасы Министрлер Кеңесиниң Баслығы Қ.Сариев шығып сөйлеп, жыйналғанларды  Жаңа жыл байрамы ҳәм жаңа турақ жайлардың пайдаланыўға тапсырылыўы менен қутлықлады.

Атап өтилгениндей, Өзбекистан Республикасы Президенти Шавкат Мирзиёевтиң басшылығында елимизде жасларды руўхый ҳәм физикалық жақтан жетик және саламат, Ўатанды сүйиўши, пидайы етип тәрбиялаў, олардың ҳуқықлары менен мәплерин қорғаў бойынша кең көлемли жумыслар әмелге асырылды. Бурынғы «Камалат» жаслар жәмийетлик ҳәрекети негизинде Өзбекистан жаслар аўқамын шөлкемлестирилди. Өзбекистан жаслар аўқамы шөлкемлестирилген күн — 30-июнь сәнеси елимизде Жаслар күни деп жәрияланды.

Өзбекистан Республикасы Президентиниң 2017-жыл 5-июль «Жасларға байланыслы мәмлекетлик сиясаттың нәтийжелилигин арттырыў ҳәм Өзбекистан жаслар аўқамының жумысын қоллап-қуўатлаў ҳаққында»ғы Пәрманын орынлаў шеңберинде елимиздиң жәмийетлик-сиясий турмысында белсене қатнасып атырған жас шаңарақларды буннан былай да қоллап-қуўатлаў, олардың турақ жай ҳәм турмыслық шараятларын жақсылаў мақсетинде 2018-2021-жылларға мөлшерленген Жаслар үйлерин қурыў бағдарламасы ислеп шығылмақта. Бул бағдарламада барлық қалаларда — көп қабатлы, елатлы пунктлерде — 1-2 қабатлы үлги жойбарлар тийкарында арзан турақ жайлар қурыў, Өзбекистан жаслар аўқамының ўәлаятлық, қалалық ҳәм районлық кеңеслериниң баслықларын хошаметлеў мақсетинде оларға «Матиз» ҳәм «Дамас» автомашиналарын сатып алыў ушын жеңиллетилген кредитлер ажыратыў нәзерде тутылған.

Илажда Өзбекистан жаслар аўқамының Нөкис қалалық, Еллик­қала, Қоңырат, Мойнақ, Тахтакөпир, Төрткүл, Хожели ҳәм Шымбай районлық кеңеслерине «Матиз» жеңил автомашиналарының, 48 жас шаңараққа еки ҳәм үш ханалы турақ-жайдың гилт­лери салтанатлы жағдайда тапсырылды.

— Өтип баратырған жыл мениң ушын бахытлы жыллардың бири болды,-дейди Зульфия атындағы мәмлекетлик сыйлықтың ийеси, Өзбекистан мәмлекетлик көркем өнер ҳәм мәденият институты Нөкис филиалының оқытыўшысы, «Дослық» ордениниң ийеси, Қарақалпақстан халық бақсысы Гүлбәҳәр Ахымбетова. — 2017-жылы «Өзбекистан белгиси» көкирек нышаны менен сыйлықланған болсам, жаңа жыл байрамы қарсаңында турақ жайға ийе болдым. Буның ушын Президентимизге, республикамыздың басшыларына шексиз миннетдаршылық билдиремен.

— Президентимиздиң Пәрманлары менен қарарларын орынлаў, жынаятшылықтың ҳәм ҳуқықбузарлықтың алдын алыў, жаслардың бәнтлигин тәмийинлеў  бағдарында бир қатар илажлар әмелге асырылмақта,-дейди Өзбекистан жаслар аўқамы Мойнақ районлық кеңесиниң баслығы Саламат Иниятов. — Районлық кеңесимизге  «Матиз» жеңил автомашинасының берилиўи республикамыздың ең арқа аймағында жасап атырған жасларымызды айрықша қуўанышқа бөлемекте. Елбасшымыздың биз жасларға билдирип атырған исенимин ақлаў жолында аянбай мийнет етемиз.

Илажға Қарақалпақстан Республикасы Жоқарғы Кеңеси Баслығының орынбасары А.Ҳамраев қатнасты.

 Д.АБИБУЛЛАЕВ,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF