Еркин Қарақалпақстан Вести Каракалпакстана 01:19:18, 19.01.2018
Хош келипсиз! | RSS
Сайт мазмуны

Кириў усылы

ӘСКЕРИЙ  ХЫЗМЕТКЕРЛЕРГЕ  ЖАҢА ЖЫЛ  САЎҒАСЫ

Нөкис қаласындағы «Дәрбент» мәкан пуқаралар жыйыны аймағында әскерий хызметкерлерге көп қабатлы,  18 квартиралы еки турақ жай пайдаланыўға тапсырылды.

Усы мүнәсибет пенен өткерилген илажда Қарақалпақстан Республикасы Жоқарғы Кеңесиниң Баслығы М.Ерниязов, Арқа-батыс әскерий округининг сәркардасы  Ф.Ортиқов ҳәм басқалар шығып сөйлеп, ҳүрметли Президентимиз, Қураллы Күшлердиң Жоқары Бас Сәркардасы  Ш.Мирзиёевтиң басшылығында әскерий тараўда әмелге асырылып атырған кең көлемли  реформаларға тоқтап өтти. Елимиз бүгинги күни  профессионаллық таярлыққа ийе болған, заманагөй қурал-жарақлар және техникалар менен тәмийинленген, аймақлық пүтинликти, шегараларымыздың қол-қатылмаслығын тәмийинлей алатуғын миллий армия­мызға ийе болды.

Өзбекистан Республикасы Президентиниң 2017-жыл 30-марттағы «Өзбе­кистан Республикасы Қорғаныў министрлигиниң әскерий хызметкерлери ушын турақ жайлар қурыў Бағдарламасы ҳаққында»ғы қарарының орынланыўын тәмийинлеў шеңберинде Арқа-батыс әскерий округи тәрепинен бир қатар жумыслар алып барылды. «Нөкис цемент» жуўапкершилиги шекленген жәмийетиниң қурылысшылары тәрепинен август айында басланған қурылыс жумыслары қысқа мүддетте сапалы етип питкерилип, жаңа жыл байрамы қарсаңында әскерий хызметкерлерге саўға етилди. Нәтийжеде 36 әскерий хызметкердиң шаңарақ ағзалары Жаңа жылды жаңа турақ жайда күтип алатуғын болды.

Квартира ийелерине жаңа турақ жайдың гилтлери, сондай-ақ, Арқа-батыс әскерий округи тәрепинен саўғалар тапсырылды.

— Заманагөй турақ жайдың пайдаланыўға тапсырылыўы бәршемизди қуўа­ныш­қа бөлемекте,-дейди жаңа квартира ийелеринен бири, Хожели районлық Қорғаныў бөлими шақырыў бөлимшесиниң хызметкери, киши сержант Тоқжан Шоханова. — Дерлик 15 жылдан берли әскерий тараўда мийнет етип киятырман. Халқымызды жаңа жыл байрамы, Өзбекистан Республикасы Қураллы Күшлери дүзилгениниң 26 жыллығы ҳәм Ўатан қорғаўшылары күни менен қутлықлайман. Елимиз тыныш, аспанымыз ашық болсын.

Илаж қатнасыўшылары жаңа турақ жайда жаратылған шараятлар менен таныс­ты.

 Д.АБИБУЛЛАЕВ,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF