Еркин Қарақалпақстан Вести Каракалпакстана 09:35:08, 23.04.2018
Хош келипсиз! | RSS
Сайт мазмуны

Кириў усылы

ЙОД МИКРОЭЛЕМЕНТИ ЖЕТИСПЕЎШИЛИГИНИҢ  САЛАМАТЛЫҚҚА ЗЫЯНЫ

Йод микроэлементи жетиспеўшилиги өсип киятыр­ған жасларымыздың, миллетимиздиң даўамшысы бол­ған перзентлеримиздиң ҳәм адамлардың интеллектуал ойлаў, пикирлеў қәбилетлериниң пәсейип, арқада қалыўын келтирип шығарыўшы саламатлық душпаны саналады. Ол адамлардың арасында кең тарқал­ған инфекциялық емес кеселлик болып табылады.

Бүгинги күнде жер жүзинде 1,5 миллиард адам йод жетиспейтуғын зоналарда жасайды. Дүнья жүзилик денсаўлықты сақлаў шөлкеми берген мағлыўматларға қарағанда, 800 миллионға шамалас адамлар қалқансыман бездиң үлкейиўи, ал, йод жетиспеўшилигинен 45 миллионнан аслам адамлар интеллектуал раўажланыўдан арқада қалыў себебинен қыйналар екен.

Биз, инсанлар барлық ўақытта ҳәрекет етип жасаймыз. Ал, қалқансыман без гармонлары бизиң ҳәр бир клеткамызды кислород пенен тәмийинлеўде, оксидлениў процесинде қатнасады. Тағы бир әҳмийетли тәрепи, қалқансыман без барлық органлар ҳәм репродуктив системаны басқарып турады.

Йод жетиспеўшилигиниң ең аўыр асқыныўлары ақыбетинде бас мийдиң нормал жағдайда раўажланыўының бузылыўына алып келеди. Бирқанша аймақларда, әсиресе, йод микроэлементи жетиспеўшилиги бар жерлерде мыңлаған инсанлар ақыл-санасы раўажланыўдан арқада қалыў кеселлигине жолығады. Ҳәмиледар ҳаялларға аўқатлық затлар рационында йод микроэлементи жетиспеўшилиги өзиниң унамсыз тәсирин тийгизеди. Неге дегенде, ҳәмиледарлықтың биринши 3 айлығында йод микроэлементи жетиспеўшилиги бала мийиниң толық раўажланбаўына алып келеди. Яғный, туўылған перзенттиң санасы раўажланыўы арқада қалады.

Ҳәр күни йодланған дуз ҳәм йод сақлаўшы азықлық затлар белгиленген муғдарда қабылланса адам саламатлығына пайдасын тийгизери анық. Сонлықтан да, ҳәр биримиз шыпакерлерден кеңес алып турсақ йод жетиспеўшилиги кеселлигиниң кемейиўине үлесимизди қосқан боламыз.

Г.НАЖИМОВА,

Нөкис қалалық 1-санлы шаңарақ поликлиникасы шыпакери.

 

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF