Еркин Қарақалпақстан Вести Каракалпакстана 09:38:39, 23.04.2018
Хош келипсиз! | RSS
Сайт мазмуны

Кириў усылы

ҚӘЎИПСИЗЛИК ҚАҒЫЙДАЛАРЫНА ӘМЕЛ ЕТЕЙИК

Өзбекистан Республикасы Президентиниң 2017-жыл 23-май күнги «Ишки ислер уйымлары өрт қәўипсизлиги бөлимлериниң жумысын түп-тийкарынан жетилистириў илажлары ҳаққында»ғы қарарына муўапық, ҳәр ҳәптениң сәршемби сәнеси «Өрт профилактикасы күни» деп белгиленген еди. Усы мүнәсибет пенен белгиленген талапларды әмелге асырыў мақсетинде «Тақыятас ЫЭС» акционерлик жәмийети басшылығы менен келисип, ти­йисли илажлар ислеп шығылды.

«Тақыятас ЫЭС» акционерлик жәмийетин өрттен қорғаўшы өрт қәўипсизлиги бөлими 4-санлы Әскерийлестирилген өрт қәўипсизлиги бөлиминде 4 дана өрт өшириў автомобильлери саз жағдайға келтирилди. Бөлим жеке қурамының кәсиплик-жаўынгерлик таярлығын арттырыў, жүз бериўи мүмкин болған ҳәм айрықша жағдайда анық ҳәрекетлери менен өзиниң алдына қо­йылған ўазыйпаны орынланыўына ерисиў мақсетинде жәми­йеттиң цех ҳәм участкаларында жыллық оқыў режесине тийкарланып, нәўбетши смена жеке қурамы ҳәм ықтыярлы өрт өшириў топары ағзалары менен биргеликте әмелий тактикалық шынығыўлар өткерип барылмақта. Объектте цех ҳәм участкалардың өртке қарсы жағдайлары тексерилип, анықланған кемшиликлер бойынша тийисли басшы хызметкерлерге жазба көрсетпелер берилди ҳәм олардың орынланыўы қадағалаўға алынды.

Сондай-ақ, бөлим жеке қурамы тәрепинен пуқаралардың турақ жайлары да көзден өткерилип, өрттиң алдын алыў, қәўипсизлик қағыйдаларын сақлаў бойынша түсиник жумыслары алып барылып, ҳәр бир шаңараққа еслетпелер берилмекте.

Мақаламыз жуўмағында пуқараларымыздан өрт қәўипсизлиги қағыйдаларына қатаң әмел етиўин, немқурайдылық ҳәм бийпәрўалық сыяқлы иллетлерден жырақ болып, өртлер ҳәм бахытсыз ҳәдийселерге алып келиўши факторларды сапластырыўда өрт қәўипсизлиги хызмети қәнигелерине жақыннан жәрдем бериўин сорап қаламыз. Өзиниң ҳәм өзгелердиң өмири ушын жуўапкершилик ҳәр бир пуқараның ҳүждан иси болыўы керек. Өзин ҳүжданлы деп билген адамлар болса ҳеш қашан өртке алып келиўши себеплерге бийпарқ қарамайды, керисинше, олардың алдын алыўда белсендилик көрсетеди.

 И.ЮЛДАШЕВ,

«Тақыятас ЫЭС» АЖ ин өрттен қорғаўшы

ӨҚБ 4-санлы ӘӨҚБ смена баслығы, лейтенант.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF