Еркин Қарақалпақстан Вести Каракалпакстана 18:11:56, 16.10.2018
Хош келипсиз! | RSS
Сайт мазмуны

Кириў усылы

ФОТОАППАРАТҚА  ӨШ  ЖИГИТ

Елимизде соңғы ўақытларда жынаятшылық ҳәм ҳуқықбузарлықтың алдын алыўға қаратылған кең көлемли илажлар өзиниң унамлы нәтийжелерин берип, бундай иллетлердиң азайыўына ерисилгени сыр емес. Лекин, бес бармақтың бирдей болмағанындай, арамызда жеңилдиң асты, аўырдың үсти менен жүрип, өзгелердиң мал-мүлкине көз алартатуғынлар да ушырасып туратуғыны өкинишли жағдай.

Тақыятаслы Искандаржон Джумабаев әйне тепсе тебингини үзетуғын, ғырыстай 20 жасында. Өзиниң бар имканиятларын, күш-қарыўын унамлы ислерге сарплағанда шаңарағына да, мәмлекетимизге де көп пайда келтирген болар еди. Тилекке қарсы, ол ақыл-еси пүтин, саналы адамлар ушын уят, шерменделик есапланатуғын урлық пенен шуғылланып, өзине де, жақынларына да дақ келтирди.

Быйылғы жыл февраль айының басында түнги саат 02.00 лер шамасында И.Джумабаев Тақыятас дийқан базарының ишинде жайласқан «Файз» кафесине орнатылған 3 дана «VIEW» маркалы видео гүзетиў камераларын урлайды. «Дәмиккеннен қуныққан жаман» дегениндей, өзиниң жынаятлы исин және даўамлаўды нийет еткен ол арадан бир неше күн өтип, енди ол дийқан базар ишиндеги «Диёр» фотостудиясына көз тигеди. 13-февральға өтер ақшамда студия қулыпларын бузып ашып, бул жерден бир дана «Nikon D 7000» маркалы фотокамера ҳәм бир дана «Packardbell» маркалы ноутбукти алып кетеди. Арадан бир ҳәпте өтип, түнги саат 02.30 ларда И.Джумабаев және усы студияға урлыққа түседи ҳәм бул сапары 5 дана фотоаппарат флешкартасын, 1 дана 512 гб сыйымлылықтағы флешкарта, 1 дана «Nikon D 5200», 1 дана «Nikon D 5100», 3 дана «Nikon D 3100» маркалы фотоаппаратлар ҳәм 520 000 сум нақ пулды урлайды.

«Қыңыр истиң қыйығы, қырық жылдан соң да шығады» дейди халық даналығы. Сол айтқандай, Искандаржон Джумабаевтың да қылмыслы ислери узаққа бармай әшкара болды. Жынаят ислери бойынша Хожели районлық судында болып өткен ашық суд мәжилисинде тергеў жуўмақлары ҳәм гүўалар менен жәбиркешлердиң берген көрсетпелери тийкарында И.Джумабаевтың жынайый ислери мойнына қойылып, Өзбекистан Республикасы Жынаят кодексиниң тийисли статья­лары бойынша оған жаза та­йынланды.

У.УТЕПОВ,

Хожели районы прокурорының аға жәрдемшиси, әдиллик киши кеңесшиси.   

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF