Еркин Қарақалпақстан Вести Каракалпакстана 00:03:42, 18.06.2018
Хош келипсиз! | RSS
Сайт мазмуны

Кириў усылы

НӘПСИН ЖЫЛАЎЛАЙ АЛМАЙ...

Жоқары мағлыўматлы, билимлендириў тараўында бирнеше жыллық ис-тәжирийбеге ийе З.Абдуллаева өзи басшылық еткен мектепке шекемги билимлендириў мәкемеси хызметкерлери ҳақысына қыянет етпегенинде, бүгинги күнге келип өзине ҳәм басқаларға да тәшўиш арттырмаған болар еди.

«Қаҳарман»ымыз буннан алдын да Өзбекистан Республикасы Жынаят Кодексинде көрсетилген жынаятқа қол урып, амнистия актине тийкар жазадан азат етилген. Әттең, ол мәмлекетимиз тәрепинен өзине берилген бул имканияттан туўры жуўмақ шығармады. Және қыңыр жолды таңлады. Кәсибине, жәмәәтине қыянет етти. Ол өзи басқар­ған Қанлыкөл ра­йонындағы 2-санлы мектепке шекемги билимлендириў мәкемесиниң баслығы лаўазымында ислеп жүрип, өз ўәкиллигинен жеке мәпине пайдаланды. 2014-2016-жыллар даўамында мәкемеде ислеўши хызметкерлердиң айлық ис ҳақылары түсирилген банк пластик карталарын ҳәрқыйлы жалған ўәделер ҳәм себеплер менен олардан жыйнап алды. Соң усы банк пластик карталардан ата-аналар төлемине төлеп барыўын бәне етип, өзиниң ықтыярында болған өзгелердиң мүлклерин өзлестирип, жеке мәпине жумсап жиберди. Яғный, усы бақшада тәрбияшы болып ислеўши Ш.Пазылбекованың банк пластик картасынан 6 миллион 462 мың сум пулын, бақша хызметкерлери Г.Хожаниязова, А.Нурымбетова, М.Хожанова, М.Сарыбаевлардың ҳәр бириниң 2 миллион сумнан артық пулларын ҳәм тағы бир қатар хызметкерлердиң айлықларын өз мәпине жумсап, жәми 23 миллион 725 мың сумнан артық муғдардағы пул қәрежетлерин өзлестириў жолы менен талан-тараж етти.

Бирақ, оның өз нәпси жолында ислеген усы жынайый ҳәрекетлери ҳуқық қорғаў уйымларының нәзеринен шетте қалмады. Нәпсин жылаўлай алмаған З.Абдуллаеваның қарсысына Өзбекистан Республикасы Жынаят Кодексиниң тийисли статьялары менен жынаят иси қозғатылды ҳәм ол суд тәрепинен ти­йисли жазаға ҳүким етилди. Ал, пуқараларға келтирилген материаллық зыян болса, айыпкерден ықтыярлы рәўиште өндирилди.

 Жанибек

СУЛТАМУРАТОВ,

Қанлыкөл районы прокуратурасының ис үйрениўши тергеўшиси.

 Миясар

ҚАБУЛОВА, журналист.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF