Еркин Қарақалпақстан Вести Каракалпакстана 01:32:24, 19.01.2018
Хош келипсиз! | RSS
Сайт мазмуны

Кириў усылы

НӘТИЙЖЕЛЕР  ҚАНААТЛАНДЫРАРЛЫ  ДЕП БОЛМАЙДЫ

Өзбекистан Республикасы Президентиниң басшылығында усы жылдың 15-ноябринде елимизде ҳуқықбузарлықлар профилактикасы ҳәм жынаятшылыққа қарсы гүресиў бағдарында белгиленген ўазыйпалардың орынланыўына бағышланған видеоселекторында мәмлекетимиз Басшысы тараўдағы жол қойылған кемшиликлерди кескин сынға алған еди.

Биз жақында Өзбекистан Республикасы Президентиниң усы жылдың 14-мартындағы «Ҳуқықбузарлықлар профилактикасы ҳәм жынаятшылыққа қарсы гүресиў системасын буннан былай да жетилистириў илажлары ҳаққында»ғы қарарының орынланыўы бойынша Хожели районлық ИИБ тәрепинен усы жылдың 11 айы даўамында исленген жумыслар менен жақыннан таныс­тық.

Усы жылдың 11 айы даўамында районда улыўма жынаятлардың саны өткен жылдың усы дәўирине салыс­тырғанда 17,9 процент­ке азайған, яғный, 2016-жылда районда улыўма жынаятлар саны 195 болған болса, усы күнге дейин 160 жынаят есапқа алынған.

Бул, әлбетте, аз да болса кеўилге қәтержамлық бағышлайды. Деген менен, жынаятларды түрине қарай бөлгенимизде унамсыз цифр­ларға көзимиз түсти. Өйткени, быйылғы жылда аўыр жынаятлар саны көбейип, 2016-жылда 4 жынаят есапқа алынған болса, бүгинги күнге келип 15 жынаят жүз берген.

Буның себеби не! Бунда, әлбетте, тек райондағы ҳуқық қорғаў уйымлары хызметкерлериниң ғана емес, ал, өзин-өзи басқарыў уйымлары хызметкерлериниң де айыбы бардай көринеди. Себеби, жүз берген жынаятлар ҳаққындағы мағлыўматлардан бизге мәлим болғанындай, буған мәҳәлле баслықлары, диний ағартыўшылық ҳәм руўхый әдеп-икрамлылық тәрбия мәселелери бойынша мәсләҳәтшилери ҳәм «Мәҳәлле сақшысы» жәмийетшилик дүзилмеси сәрдарларының толық хабардар болмағанлығы, сондай-ақ, айырым мәҳәл­лелерде жүз берген жынаятлардың толық талқыланбағанлығында болып отыр.

Хожели районлық ИИБ баслығы тәрепинен тасты­йықланған реже тийкарында жынаят жүз берген мәҳәллелерде сол күнниң өзинде халық арасында талқылаў өткерилип, қайта жынаят ислеў ҳәм ҳуқықбузарлықлар жүз бериўиниң алдын алыў бойынша бир қатар жумыслар әмелге асырылмақта. Район бойынша быйылғы жылда 93 пуқара билқастан денеге жарақат жеткериў (өткен жылы 98 пуқара), быйылғы жылда 104 пуқара майда бийзарылық (өткен жылы 283 пуқара) жынаят ислегени ушын ҳәкимшилик жуўапкершиликке тартылып, оларға нызамлы шаралар көрилген.

Районда аймақ профилактика инспекторлары тәрепинен турақлы түрде халық пенен ушырасыў ҳәм сәўбетлесиўлер өткерилип, Өзбекистан Республикасы ҳүкимети тәрепинен жынаятшылыққа қарсы гүресиў бағдарында қабыл етилген нызам, пәрман ҳәм қарарларының мазмун-мәниси түсиндирилип барылмақта. Үгит-нәсият жумысларының нәтийжесинде усы жыл 11 ай даўамында 10 пуқара нызамсыз оқ атыў қуралларын ИИБне алып келип тапсырған. 

Ал, турақ жайға урлыққа түсиў, автомашина урлаў, өз лаўазымынан пайдаланып жынаят ислеў, экономикалық, автоавария жынаяты, адам намысына тийиў әдеўир көбейген. Бул көрсеткишлер адамды тәшўишлендиреди. Себеби, ишки ислер уйымларының ҳәм профилактика инспекторларының биринши нәўбеттеги ўазыйпасы ҳуқықбузарлықлардың ҳәм жынаятшылықтың ерте алдын алыў болып табылады.

Бәршемизге мәлим, Президентимиздиң 2017-жыл 10-апрельдеги «Ишки ислер уйымларының жумыс нәтийжелилигин түп-тийкарынан арттырыў, жәмийетлик тәртипти, пуқаралардың ҳуқықларын, еркинликлери менен нызамлы мәплерин исенимли қорғаўды тәми­йинлеўде олардың жуўапкершилигин күшейтиў илажлары ҳаққында»ғы Пәрманына тийкарланып, аймақ профилактика инспекторлары бүгинги күнде турақ жай ҳәм жеңиллетилген кредит есабынан жеңил автомашиналар менен тәмийинленбекте.

Солай екен, бул олардың жумысында жуўапкершиликти және де арттырады.

Жуўмақлап айтқанда, Хожели районында сөз етип отырған бағдарда жумысларды еле де жетилистириўи зәрүрлигине көзимиз жетти.

С.ОРАЗЫМБЕТОВ, өз хабаршымыз. 

Хожели районы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF