Еркин Қарақалпақстан Вести Каракалпакстана 01:22:24, 19.01.2018
Хош келипсиз! | RSS
Сайт мазмуны

Кириў усылы

ӘМЕЛИЯТ  ӨЗИНИҢ УНАМЛЫ  НӘТИЙЖЕСИН  БЕРМЕКТЕ

15-ноябрьде Президентимиз Ш.Мирзиёев басшылығында елимизде ҳуқықбузарлықлар профилактикасы ҳәм жынаятшылыққа қарсы гүресиў бағдарында белгиленген ўазыйпалардың орынланыўына, бул бағдардағы машқалалар ҳәм оларды шешиў мәселелерине бағышланған видеоселектор мәжилиси болып өткен еди.

Онда қысқа ўақыт ишинде пуқаралардың тыныш ҳәм абадан турмыс кешириўин тәмийинлеўге, ҳуқықбузарлықлардың алдын алыў, жынаятшылыққа қарсы гүресиў бойынша бирқанша жумыслардың әмелге асырылғаны атап өтилди. Тилекке қарсы, айырым жынаятлардың еле азаймай атыр­ғанлығы тилге алынды. Жақында биз Нөкис қалалық Ишки ислер бөлими баслығы, подполковник Гурбангелди Аметов пенен пайтахтымыз аймағында ҳуқықбузарлықлар ҳәм жынаятшылықтың алдын алыў, жәмийетлик тәртипти сақлаў ҳәм пуқаралардың қәўипсизлигин тәмийинлеў бағдарындағы жумыслардың барысы жөнинде гүрриңлестик.

— Гурбангелди Амангелдиевич, өзиңиз жақсы билесиз  Президентимиздиң басламасы менен ҳәр ҳәптениң пийшемби күни — «Ҳуқықбузарлықлар профилактикасы»  күни етип белгиленди. Бул әмелияттың орынлардағы нәтийжеси қандай! 

— Быйылғы «Халық пенен пикирлесиў ҳәм инсан мәплери жылы» Мәмлекетлик бағдарламасын әмелге асырыўда ҳәм Өзбекистан Республикасын раўажландырыўдың бес тийкарғы бағдары бойынша Ҳәрекетлер стратегиясында жынаятшылыққа қарсы гүресиў ҳәм ҳуқықбузарлықлардың алдын алыў бойынша жумысты муўапықластырыўға айрықша итибар қаратылған. 2017-жыл 10-апрельде «Ишки ислер уйымларының жумыс нәтийжелилигин түп-тийкарынан арттырыў, жәмийетлик тәртипти, пуқаралардың ҳуқықларын, еркинликлери менен нызамлы мәплерин исенимли қорғаўды тәмийинлеўде олардың жуўапкершилигин күшейтиў илажлары ҳақ­қын­да»ғы Пәрманы, усы жылы 14-марттағы «Ҳуқық­бузарлықлар профилактикасы ҳәм жынаятшылыққа қарсы гүресиў системасын буннан былай да жетилистириў илажлары ҳаққында»ғы қарары ҳуқық қорғаў уйымлары ҳәм басқа да ти­йисли шөлкемлерге аймақларда жынаятшылықтың алдын алыў ҳәм профилактикалық илажларды буннан былай да күшейтиўде анық ўазыйпаларды белгилеп берди.  

Усы қарардың орынланыўын тәмийинлеў мақсетинде Ҳуқықбузарлықлар профилактикасы ҳәм жынаятшылыққа қарсы гүресиў бойынша Нөкис қалалық мәкемелер аралық комис­сиясы шөлкемлестирилип, мәкеме-шөлкем, мәкан пуқаралар жыйынлары ҳәм  оқыў орынларында ушырасыўлар өткерип, үгит-нәсият жумыслары алып барылмақта. Әсиресе, мәкан пуқаралар жыйынларының профилактика инспекторлары үйме-үй кирип, шаңарақлардан хабар алып, олардың жасаў жағдайы ҳәм кеўил кеширмелери менен жақыннан таныспақта. Усындай илажлар нәтийжесинде қаламыз аймағында жынаятшылық ҳәм  ҳуқықбузарлықлардың өткен жылға салыстырғанда анағурлым көрсеткишлерге кемейгенлигин көриўимизге болады.

— Кейинги ўақытлары жаслар арасында белгиленген ҳәкимшилик тәртипти бузыў жағдайлары көзге тасланбақта. Бул бағдарда қандай профилактикалық илажлар алып барылмақта!

— Ҳақыйқатында да, видеоселекторда жас өспиримлер ҳәм жаслар арасында  жүз берип атырған жынаятшылық мәселесине айрықша итибар қаратылды. Көпшиликтиң хабары болса керек, пайтахтымыздағы «Лас-Вегас» кафесинде жүз берген тәртипсизликлер социаллық тармақларда бөрттирилип, жалған мағлыўматлар менен халықтың арасына ҳәр қыйлы өтирик өсек сөзлер тарқатылған. Мине, усы сыяқлы унамсыз ўақыялар ҳәм жынаятларды болдырмаў мақсетинде «Жас өспиримлер арасында қадағалаўсызлық ҳәм ҳуқықбузарлықлардың профилактикасы ҳаққында»ғы нызам шеңберинде түрли рейдлер өткерилмекте. Усы өткерилген илажлар нәтийжесинде өткен 10 ай даўамында жас өспиримлер түнги саат 22.00 ден кейин биймезгил 36 жағдайда ата-анасынан бири ямаса оның орнын басыўшы шахстың гүзетиўисиз кафе-барлар, интернет-кафе ҳәм басқа да кеўил ашар орынларда жүргенлиги анықланды ҳәм бул бойынша нызам бузыўшыларға тийисли шаралар көрилди. Бундай ўақыяларды талқылап көргенимизде олардың көпшилиги спиртли ишимликлер ишип, мәс ҳалында автотранспорт қуралларын басқарыў, шаңарақларда жүз берип атыр­ған  келиспеўшиликлер ҳәм айырым ата-аналардың өз перзентлери тәғдирине бийпәрўалық пенен қараўы ақыбетинде пайда болып атырғанлығы көзге тасланады. Әлбетте, бул бағдарда ертеңги келешегимиз бол­ған жаслардың тәрбиясына айрықша кеўил бөлип, оларды жат иллетлерден қорғап, туўры жолға баслаўда ҳәр биримиз миннетли түрде жумыс алып барыўымыз тийис.

— Сондай-ақ, мәжилисте ҳаял-қызлар тәрепинен жынаят ислеў жағдайларына шек қо­йылмай атырғаны ҳәр тәреплеме сынға алынды. Бул жынаятлардың алдын алыў бойынша  қандай илажлар көрилмекте!

— Дурыс апа-қарындасларымыздың билип-билмей жынаятшылыққа қол урғаны өкинишли жағдай. Әлбетте, бул бойынша Нөкис қаласы аймағында ҳаял-қызларға дурыс жол-жоба бериў, оларды бизге жат болған диний-экстремизм иллетлеринен қорғаў, өз жанына қастыянлық етиўине жол қоймаў бойынша бир қатар жумыслар алып барылмақта. Атап айтқанда, усы жылдың 10 айы даўамында ҳаял-қызлар тәрепинен исленген  жынаятлар өткен жылға салыстырғанда 101ден 78ге кемейген. Бирақ, бул жағдайларды болдырмаў ушын жергиликли ҳәкимият ҳәм өзин-өзи басқарыў уйымлары, соның менен бирге ҳаял-қызлар комитети, имам хатиблер ҳәм басқа да тийисли  шөлкемлер менен биргеликте еле де тығыз жумыс алып барыўымыз тийис...

Демек, бундай унамсыз жағдайлар менен гүресиў тек ғана ҳуқық қорғаў уйымлары хызметкерлериниң емес, ал, бәршемиз теңдей жуўапкер екенлигимизди умытпаўымыз керек.

Сәўбетлескен:  А.ОРАЗОВ,

арнаўлы  хабаршымыз.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF