Еркин Қарақалпақстан Вести Каракалпакстана 01:29:42, 19.01.2018
Хош келипсиз! | RSS
Сайт мазмуны

Кириў усылы

ПИДАЙЫЛЫҒЫ  МАҚТАЎҒА  АРЗЫЙДЫ

Қараөзек районындағы 31-санлы қәнигелестирилген мәмлекетлик улыўма орта билим бериў мектеби оқыўшылардың ҳәм муғаллимлердиң билим дәрежеси, үлгериўшилик көрсеткиши ҳәм оларға жаратылған қолайлы шараятлар бойынша республикадағы ең үлгили оқыў дәргайларының биринен саналады.

Бүгинги күни 184 оқыўшы математика, қарақалпақ тили ҳәм әдебияты пәнлеринен терең үйренип тәлим-тәрбия алып атырған мектепте өз исиниң маманы болған тәжирийбели муғаллимлер жумыс ислеп, оқыўшыларға билим сырларын жалықпастан үйретип келмекте. Солардың бири химия пәни муғаллими Тамара Байманова.

— Оның менен көп жыллардан берли бирге ислесип киятырмыз,-дейди бизге усы мектеп директорының оқыў ислери бойынша орынбасары Турсынбай Бабаназаров. — Тамараның оқытқан оқыўшылары ҳәр жыл са­йын билимлер беллесиўи, пәнлер олимпиадасында сыйлы орынларды ийелеп, педагогикалық жәмәәтимиздиң абырай-мәртебесин асырып келмекте. Соның менен бирге, ол кәсиплес жас оқытыўшыларға да өзиниң ис-тәжирийбесин үйретип киятыр. Оның жумыстағы пидайылығын қанша мақтаныш етсең де арзыйды...

Ҳақыйқатында да, Тамара Байманова кәсибинен камал таўып, көпке үлги болып жүрген тәжирийбели устазлардың бири. Оның бул мийнетлери тараў басшылары ҳәм республика ҳүкимети тәрепинен мүнәсип түрде баҳаланып, ол 2009-жылы «Шуҳрат» медалы, ал, быйылғы жылы болса «Өзбекистан Республикасына хызмет көрсеткен халық билимлендириў хызметкери» ҳүрметли атағы менен сыйлықланыўға миясар болды. Бүгинги күни тәжирийбели устаз Т.Байманова өмирлик жолдасы Артық Сейдабуллаев пенен бирге үш перзентти тәрбиялап камалға келтирмекте.

Ә.ОРАЗОВ, арнаўлы  хабаршымыз.

Қараөзек районы.

СҮЎРЕТТЕ: Т.Байманова сабақ пайытында.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF