Еркин Қарақалпақстан Вести Каракалпакстана 02:13:43, 19.09.2018
Хош келипсиз! | RSS
Сайт мазмуны

Кириў усылы

ИНСАН МӘПЛЕРИ УЛЫҒЛАНҒАН ЖУРТ

«...Өзбекистан  Республикасы өз аймағындағы жасаўшы барлық миллет ҳәм халықлардың тиллери, үрп-әдетлери ҳәм дәстүрлери ҳүрмет етилиўин тәмийинлейди, олардың раўажланыўы  ушын шараятлар  жаратады».

(Өзбекистан Республикасы Конституциясының 4-статьясынан).

Президентимиз Шавкат Мирзиёев «Бизиң әййемги ҳәм сақаўатлы жеримизде көп әсирлер даўамында ҳәр қыйлы  миллет ҳәм халық, мәденият ҳәм дин ўәкиллери тыныш-татыў  жасап келген. Миймандослық, жақсылық, қайырқомлық ҳәм шын мәнисиндеги кеңпейиллик бизиң халқымызға бәрҳама тән болған ҳәм оның менталитетиниң тийкарын қурайды» деп айтқанындай, бүгинги күнде  елимизде жасап атырған 130 дан аслам ҳәр қыйлы миллет ўәкиллери тең ҳуқықлы болып, өз ана тилин, миллий дәстүрлери менен  үрп-әдетлерин  сақлап,  бир   шаңарақ  ағзаларындай жасап келмекте. Ҳақый­қатында да, миллетлераралық татыўлық жәмийетимиз ушын әҳмийетли.

Қарақалпақстан  Республикасында  Кореец ассоциациясында бир жүз елиўден аслам ағза бар болып, олар ҳәр жылы  елимизде өткерилип атырған ҳәр қыйлы байрам кешелерине қатнасып келмекте.  Бизлердиң ата-бабаларымыз  1937-жылы  репрессия ўақтында көшип келип, ҳәзирги ўақытта Қарақалпақстан Республикасында  6700 ден аслам  кореецлер жасайды. Быйыл кореецлердиң  елимизде жасап атыр­ғанына  80 жыл толды. Бул сәне Өзбекистан көлеминде кең түрде белгиленип, республикамыздан ҳәм ҳәр бир ўәлаяттан  кореец миллетинен  бир адам  Корея Республикасына саяхат етип қайтты. Әлбетте, Президентимиз тәрепинен  бизлерге қаратылып атырған итибарынан қуўанышлымыз.

 Кореец тилин үйрениўге қызыққан талабанлар ушын алты муғаллим сабақ береди. Ҳәзирги ўақытта  тил үйрениўге қызығыўшылар саны көбейип атыр. Усы жерде тил үйренген көпшилик жасларымыз  Кореяда оқып ҳәм жумыс ислеп атыр. Ҳәр жылы кореялы шыпакерлердиң  қатнасыўында «Френдс» акциясы шөлкемлестирилип, усы күнге шекем  республикамыздан 490 балаға бийпул операция исленип, олардың саўалып кетиўине жәрдеми  тийди.  

Өз үйиң-өлең төсегиң,

Бостаның бар, шәмениң бар,

Келер әрмансыз жасағың.

Қарап тоймас Ўатаның бар,-деп шайыр  Сражиддин Саййидтың айтқанындай, ҳәр бир инсанның миллетине қарамастан  туўылып өскен  Ўатаны биринши орында  турады.

Халқымызды Тий­карғы Нызамымыз бол­ған Өзбекистан Республикасы Конституциясы қабыл етилгениниң 25 жыллығы менен қутлықлайман. Елимиз тыныш, халқымыз абадан болсын!

 Марина КОГАЙ,

Қарақалпақстан Кореец ассоциациясы баслығы.

***

 

 Қуяшлы журтымызда ҳәр бир инсанның қәдир-қымбаты жоқары қәдирият саналып, Тийкарғы Нызамымыз ­ Өзбекистан Республикасы Конституциясында ҳуқық ҳәм еркинликлериниң қорғалыўы кепилленген. Солай екен, мәмлекетимизде бир неше миллет ўәкиллери тыныш-татыўлықта жасап келмекте.

Қарақалпақстан Республикасы Рус мәдений орайы 1994-жылы дүзилип, бүгинги күнде 200 ден зыят ағзалары бар.  Өткен жыллар даўамында бизиң орайы­мыз миллетлераралық дослықта, аўызбиршиликте жасап, жәмийетлик турмыста белсендилик көрсетип, өз үлеслерин қосып киятыр. Орайымыздың алдына қойған тийкарғы мақсети — рус миллетиниң бай тилин, халқының бийтәкирар мәдениятын ҳәм салт-дәстүрлерин сақлаў, оны жасларға үйретиў, оқыў орынларында рус тили ҳәм әдебияты пәни муғаллимлери менен тығыз байланыста болып, орай жумысларының алға илгерилеўине үлес қосыўдан ибарат.

Байрамларда рус халқының ертеклери тийкарында дүзилген әдебий кешелер, халық қосықлары ҳәм ойынларынан дүзилген концерт бағдарламалары қойылыўы бәршеге хош кейпият бағышлайды. Қалаберди, қарақалпақ хал­қы баўырман,  мәрт, кеңпейил халық. Оның тарийхы, мәденияты, салт-дәстүрлерине ҳүрмет пенен қараймыз. Әлбетте, буның бәршеси Өзбекистан аталмыш бостанда бәрше миллет ўәкиллериниң аўызбиршиликте жасап атырғанлығынан дәрек береди.

Өзбекистан Республикасы Конституциясының 25 жыллығы менен шын жүрегимнен қутлықлайман. Аспанымыз ашық, шаңарақларымыз тыныш болсын!

Галина ЗОРКИНА,

Рус мәдений орайы баслығы.

***

Халқымыздың «Ўатан күннен сулыў, алтыннан қымбат» деп бийкарға айтпағанлығын Ғәрезсизликтиң арқасында азат Өзбекистанда жасап атырған ҳәр бир пуқара жақсы биледи. Ал, еркинлигимизди қорғайтуғын Конституциямыз қабыл етилген күн — 8-декабрь ҳәр жылы асығыслық пенен күтетуғын байрамымыз деп айтсақ ҳасла қәтелеспеймиз.

Инсан мәпи, қәдири елимизде ҳуқықый жақтан қорғалады. Көп миллетли, аўызбиршиликли Өзбекистанды туўылған жерим деп санайтуғын түркмен миллети ўәкиллери ҳешкимнен кем болмай бахытлы заманда өмир кеширип атыр­ғанын мақтаныш етеди.

Қарақалпақстанда түркмен миллети ўәкиллери перзентлери ана тилинде мектеплерде билим алып атырғаны буның айқын мысалы. Ал, Қарақалпақ мәмлекетлик университетинде түркмен тили ҳәм әдебияты пәни қәнигелиги бөлиминде болажақ кадрлардың билим алыўы мәмлекетимиз ғамқорлығының нышаны. «Мекан» газетасы миллий мәдениятымыз, үрп-әдетлеримиз, салт-дәстүрлеримизди жас әўладлар санасына Ўатансүйиўшилик руўхын сиңдириўде бийминнет хызмет етип келмекте.

Ғәрезсизлик, Наўрыз байрамлары дослар қатнасыўында кең нышанланады. Өзбек, қазақ, қарақалпақ ҳәм түркмен халықларының тиллери, үрп-әдетлери бир-бирине жақын. Олар ата-бабалары салып кеткен дослық көпиринен ҳеш қашан аўыспайды. Себеби, бул дослықтың тамыры беккем.

Өзбекистан Республикасының Бас нызамы — Конституциямыздың 25 жыллық байрамын түркмен миллетиниң ҳәр бир пуқарасы кеўиллеринде қуўаныш пенен күтип алмақта.

Ашық, парахатшылық аспаны ҳүким сүрген Өзбекистанда жасаў ҳәр кимге де несип ете бермейди.

 М.ТАҒАНМУРАДОВ,

Түркмен миллий орайы баслығы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF