Еркин Қарақалпақстан Вести Каракалпакстана 00:51:26, 19.09.2018
Хош келипсиз! | RSS
Сайт мазмуны

Кириў усылы

КОРЕЯ  РЕСПУБЛИКАСЫ  ЕЛШИСИНИҢ  САПАРЫ

Өзбекистан ҳәм Қубла Корея Республикалары арасындағы дипломатиялық байланыслардың жол­ға қойылғанына 25 жыл толды. Мине, шерек әсирден берли еки ел арасында экономика, санаат, газ-химия, автомобиль қурылысы, мәденият, денсаўлықты сақлаў тараўларындағы бирге ислесиў жаңа басқышқа көтерилди.

Буған айқын мысал ретинде Әндижан ўәлаяты Асака қаласындағы автомобиль ислеп шығарыў заводы, Сүргил газ кәни негизинде Үстирт газ-химия комплексиниң пайдаланыўға тапсырылыўы және жақында ғана елимиз Президенти Ш.Мирзиёевтиң Корея Республикасына мәмлекетлик рәсмий сапарын атап өтсек болады. 

Усы жыл 5-декабрь күни  Корея Республикасының Өзбекистандағы Айрықша ҳәм толық ҳуқықлы елшиси Квон Ён У ҳәм оның зайыбы Ким Хи Вон еки күнлик сапар менен  республикамызға келди.

Кореялы мийманлар ҳүрметине Қарақалпақстан Республикасы Жоқарғы Кеңесинде қабыллаў мәресими болып өтти. Илажда Қарақалпақстан Республикасы Министрлер Кеңесиниң Баслығы Қ.Сариев елши мырзаны жыллы жүзлилик жағдайында қабыл етип, еки ел арасындағы ҳәр тәреплеме байланыслардың жаңа басқышқа көтерилип, унамлы нәтийжелерге ерисип атырғанын атап өтти.

Өз гезегинде мырза Квон Ён У жыллы жүзлилик пенен күтип ал­ғаны ҳәм көрсетилип атырған миймандослығы ушын ҳүкимет басшысына миннетдаршылық билдирип, өз-ара байланыслардың буннан былай да раўажлана беретуғынына исеним билдирди.

Қабыллаў мәресимине Қарақалпақстан Республикасы Жоқар­ғы Кеңеси Баслығының орынбасары А.Ҳамраев қатнасты.

Күнниң екинши ярымында мийманлар Тақыятас районындағы «Тақыятас ыссылық станциясы» акцио­нерлик жәмийетинде қубла кореялы қәнигелердиң қатнасында алып барылып атырған жумыслар менен танысты ҳәм бул жойбарды әмелге асырыўда қатнасып атыр­ған қәнигелер және исбилерменлер топары менен сәўбетлесиў алып барды.

6-декабрь күни мийманлар пайтахтымыздағы Қарақалпақ мәмлекетлик Қуўыршақ театрында «Корея кино күнлери»ниң ашылыў салтанатына қатнасты. Сондай-ақ, елши мырза республикамыздың басқа да дыққатқа ылайық орынларын барып көрди ҳәм усы күнниң өзинде Нөкистен Ташкент­ке жөнеп кетти.

Қарақалпақстан хабар агентлиги.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF