Еркин Қарақалпақстан Вести Каракалпакстана 17:06:03, 11.12.2017
Хош келипсиз! | RSS
Сайт мазмуны

Кириў усылы

АТ СПОРТЫН  РАЎАЖЛАНДЫРЫЎҒА  БАҒЫШЛАНДЫ

Әзел-әзелден халқымыздың тойлары атлар бәйгисисиз, көкпар ойынысыз өтпеген. Әсиресе, ҳәр түрли айлаўларға атларды бәйгиге жибериў, көкпар ойыны, қыз қуўыў ҳәм басқа да усы сыяқлы тамашалар бәршеде үлкен қызығыўшылық оятқан.

Ата-бабаларымыздан бизге мийрас болып кия­тырған мине усы миллий мәдений мийрасымыз бүгинги күни спорт түрлери қатарынан беккем орын алған болып,  оны еле де раўажландырыў,  күшли спортшыларды таярлап шығарыў бүгинги күнниң әҳмийетли мәселелериниң бири.

25-ноябрь күни Қарақалпақстан Республикасы Министрлер Кеңесиниң мәжилислер залында Өзбекистан Жылқышылық ҳәм ат спорты федерациясы Қарақалпақстан бөлимин шөлкемлестириўге бағышланған мәжилис болып өтти. Оған республикамыздағы барлық балалар ҳәм жас өспиримлер спорт мектеплери директорлары, тренер-оқытыўшылар ҳәм спортшылар қатнасты.

Мәжилисти Өзбекистан Миллий Олимпия комитетиниң Қарақалпақстан Республикасы бойынша ўәкили М.Сәрсенбаев бас­қарып  барды.

Жыйналыс қатнасыўшыларының пикир-усынысларынан келип шығып федерация бөлими Президиум ағзалығы 9 адам қурамында даўыс бериў жолы менен сайланды. Жыйналғанларға федерация бөлиминиң Уставы да таныстырылып,  бир аўыздан мақулланды.

Буннан соңғы мәселелер, яғный федерация бөлиминиң басшылығын сайлаў болып, бөлим баслығына жәмийетлик басламада Қарақалпақстан Республикасы Министрлер Кеңеси Баслығының орынбасары С.Хожаметовтың, ал баслық орынбасарлары лаўазымларына, ат заводлары менен бирге ислесиў ислери бо­йынша Қарақалпақстан Республикасы Ветеринария комитети баслығы М.Қайпановтың, спорт жарысларын шөлкемлестириў ислери бойынша «Ер зийўар» фермер хожалығы баслығы З.Зайтовтың, шөлкемлестириў ислери бойынша «Карал-Хужайли» жылқышылық фермер хожалығы ис жүргизиўшиси Д.Жаббарбергеновтың, федерацияның атқарыўшы директоры лаўазымына республикалық ойын түрлери ҳәм жеңил атлетика бойынша қәнигелестириген балалар ҳәм жас өспиримлер спорт мектебиниң директоры Д.Қалхоразовтың кандидатуралары усынылып, талабанлар қатнасыўшылар тәрепинен мақулланды.

Сондай-ақ, федерацияның атқарыўшылық комитети ағзалары, қадағалаў-ревизиялаў комиссиясы баслығы ҳәм ағзалары да даўыс бериў жолы менен сайланды.

Буннан соң сөзге шыққан федерация баслығы С.Хожаметов, Президиум ағзасы, Қарақалпақстан Республикасы Денетәрбия ҳәм спорт бойынша мәмлекетлик комитети баслығы Ғ.Байниязов ҳәм басқалар республикамызда ат спортын раўажландырыў ушын ислениўи тийис бол­ған ўазыйпалар, бул жолда шешимин күтип турған маш­қалалар бойынша өз пикир-усынысларын билдирди. 

Мәжилис соңында қарал­ған мәселелер бойынша тийисли қарарлар қабыл етилди.

С.ГҮЛИМБЕТОВ.

 

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF