Еркин Қарақалпақстан Вести Каракалпакстана 17:05:01, 11.12.2017
Хош келипсиз! | RSS
Сайт мазмуны

Кириў усылы

АТАЙЫ ПАЛЎАННЫҢ  ЕСТЕЛИГИНЕ

Жақында Кегейли районындағы Халқабад санаат ҳәм транспорт кәсип-өнер колледжиниң спорт базасында 2017-жыл «Халық пенен пикирлесиў ҳәм инсан мәплери жылы»на ҳәм республикамызға белгили палўан Тәңирберген Турымбетовтың естелигине бағышланып, Академиялық лицей ҳәм кәсип-өнер колледжлериниң оқыўшы жаслары арасында спорттың гүрес түринен республикалық ашық турнир болып өтти.

Жарысты шөлкемлестириўден тийкарғы мақсет — Өзбекистан Республикасы Президентиниң 2017-жыл 3-июньдеги «Дене тәрбиясын ҳәм ғалабалық спортты буннан былай да раўажландырыў илажлары ҳаққында»ғы, 2017-жыл 2-октябрьдеги «Кураш» миллий спорт түрин буннан былай да раўажландырыў илажлары ҳаққында»ғы қарарларының орынланыўын тәми­йинлеў, елимизге белгили палўан Тәңирберген Турымбетовтың өмир жолын жасларға кеңнен үгит-нәсиятлаў ҳәм Самарқанд қаласында болып өтетуғын «Бәркамал әўлад спорт командалары» жарысының Өзбекистан Республикасы финал басқышына спортшыларды таңлап алыўдан ибарат еди.

Жарыс халықаралық «Кураш» қағыйдасына муўапық алып барылып, оны өткериў ҳәм басшылық етиў Өзбекистан «Кураш» Федерациясының Қарақалпақстан Республикасы бөлими тәрепинен усынылған ҳәм Қарақалпақстан Республикасы Дене тәрбиясы ҳәм спорт бойынша мәмлекетлик комитети тәрепинен тас­тыйықланған төрешилер қурамына жүкленди.

Жарысқа республикамыздағы Академиялық лицей ҳәм кәсип-өнер кол­ледж­леринен 120 спортшы жаслар, соннан 29 қыз балалар қатнасты. Қызғын беллесиўлер астында болып өткен жарыс жуўмағында жеңимпазлар анықланып, ер балалар арасында өз салмақ категориясында Р.Мәмбет­баев, Ә.Генжебаев, А.Тилеў­ниязов, Е.Сәрсенбаев, М.Жақсылықов, А.Ибрагимовлар, қыз балалар арасында А.Жумабаева, Ш.Абдиреймова,   Ф.Аманиязова, Н.Абдираманова, С.Узақбаева ҳәм Г.Төребаевалар биринши орынды ийеледи.

Жарыс жуўмағында жеңимпазлар Өзбекистан «Бәркамал әўлад» дене тәрбиясы ҳәм спорт жәми­йетиниң Қарақалпақстан аймақлық бөлими тәрепинен диплом ҳәм медальлар, қәўендерлер тәрепинен қымбат баҳалы саўғалар менен сыйлықланды.

С.ОРАЗЫМБЕТОВ, өз хабаршымыз.

Кегейли районы. 

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF