Еркин Қарақалпақстан Вести Каракалпакстана 17:10:14, 11.12.2017
Хош келипсиз! | RSS
Сайт мазмуны

Кириў усылы

БЕККЕМ ИСЕНИМНИҢ АЙҚЫН КӨРИНИСИ

Демократиялық принциплер тийкарында өткен ҳәм халқымыз ерк-ықрарын сәўлелендирген сайлаў нәтийжелерине бола Шавкат Мирзиёев Өзбекистан Республикасы Президенти етип сайланғанына бир жыл болды. Өткен усы қысқа дәўир ишинде елимиз социал-экономикалық жақтан шын мәнисинде жаңа раўажланыў бас­қышына шықты.

Өзбекистан Республикасы Биринши Президенти Ислам Әбдиғаниевич Кәримов 2016-жылы сентябрь айының басында дүньядан көз жумды.

2016-жыл 8-сентябрьде болып өткен Олий Мажлистиң еки палатасының басқоспа мәжилисинде Президент сайланыўына шекем Президенттиң ўазыйпасын ўақтынша атқарыў Бас министр болып ислеп атырған Шавкат Миромонович Мирзиёевқа жүкленди. 

Орайлық сайлаў комиссиясының қарарына муўапық Президенттиң мүддетинен бурын сайлаўын өткериўди Олий Мажлис 4-декабрь 2016-жылға белгиледи. Президент болып сайланыўға сиясий партиялардан 4 талабан көрсетилди. 

Шавкат Миромоновичтиң усынысы бойынша ҳәмме талабанларға өзлериниң программаларын сайлаўшы­ларға таныстырыўға, баспасөзден, эфирден теңдей пайдаланыўға мүмкиншилик туўдырды.

Өзбекистанда Президент сайлаў кампаниясы демократиялық ашық ҳәм жоқары шөлкемлескенлик дәрежеде өтти.

Усындай жағдайда сайлаўдың өтиўи Шавкат Миромоновичтиң әдиллиги, сайлаўшылардың сана-сезиминиң өсиўи арқасында әмелге асырылды.

Әзелден ақыллы-дана елбасшысы өзинен кейин ел басқарыўға, оның социаллық-экономикалық раўажланыўы сыяқлы машақатлы аўыр жүгин арқалап, оны мәнзилине жеткериўге, уқыплы, озық ойлы, билимли, күш-ғайраты жететуғын шәкирт таярлайды.

Усы идеядан келип шығып, Биринши Президент И.Ә.Кәримов жүдә ақыллы, дана, үлкен талант ийеси, ис тәжирийбеси мол, келешекти болжап билиў қәбилети күшли, адамгершилик пазыйлети жоқары, кишипейил, зор интеллект, жетик саўатлы инсан Шавкат Миромонович Мирзиёевты өзине ылайық шәкирт етип таярлады.

***

2016-жыл 4-декабрьде болып өткен Президент сайлаўында Шавкат Миромонович Мирзиёев 88,6 % даўыс алыўға миясар болды.

Усындай сайлаўдың унамлы нәтийжеси Шавкат Миромоновичке жоқарыда берилген баҳамыздың айқын дәлили болып есапланады.

Сайлаўға халықаралық шөлкемлерден ҳәм мәмлекетлерден 600 ден аслам бақлаўшылар ҳәм 1300 журналистлер қатнасып, сайлаўдың өтиў процесин бақлап барды. Олардың пикири бо­йынша, сайлаў ең жоқары дәрежеде, тынышлық жағдайда, терең шөлкемлескенлик жағдайда өтти.

Бизиң пикиримиз бойынша, сайлаўдың унамлы нәтийжеси — Өзбе­кистанның жарқын келешеги ҳәм кескин раўажланыўының толық кепили болып хызмет етеди.

Оның Президент болып сайланыўы халқымыздың үлкен бахты.

Ғәрезсиз Өзбекистанның беккем аяққа турыўында, оның социаллық-экономикалық раўажланыўын тәми­йин етиўде жаңадан сайланған Президентимиздиң хызмети айрықша уллы. Оны халқымыз толығы менен тән алады.

Шавкат Миромонович машақатлы турмыс мектебиниң ҳәмме басқышларын басып өтти. Ол пайтахттағы Мырза Улығбек районының, Жиззақ, Самарқанд ўәлаятларының ҳәкими болып иследи. Соңғы 13 жыл даўамында, 2003-жылдан баслап мәмлекетимиздиң  Бас министри болып ислеп, елимиздиң гүлленип, раўажланыўында өзиниң салмақлы үлесин қосты.

Өзбек халқы совет жылларында да, оннан соң да уллы алымларды, дана, пидайы жәмийетлик, мәмлекетлик ғайраткер басшыларды дөретти, таярлады. Олардың қатарына Усман Юсупов, Шараф Рашидов, Ислам Кәримов, ҳәзирги Президентимиз Шавкат Миромонович Мирзиёевлар киреди. 

Елдиң, бир халықтың өсип-өниўин, раўажланыўын тәмийин етиў Елбасшыларының уқыбына, искерлигине байланыслы екенин ҳәмме биледи.

Жоқарыдағы аты аталған Елбасшылары Өзбекистан Республикасының күш-қуўатын, илимин, билимин, мәдениятын, әдебиятын, халықтың турмыс жағдайын кескин раўажландырыўға өзлериниң салмақлы үлеслерин қосты. Сонлықтан, оларды өзбек халқының Уллы аталары десек қәте болмайды. Өзбекистан бурынғы аўқам жылларында да, әсиресе, ғәрезсизликке ийе болған дәўирде үлкен тарийхый өсиў, раўажланыў жолын басып өтти.

Шавкат Мирзиёев тәбияттың берген талантына сүйенип, топлаған үлкен турмыс тәжирийбесине ҳәм терең билимине, әсиресе, узақты көре билиў, айрықша мийнетке уқыплылығына, искерлигине, тыным таппай, үзликсиз ел хызметине берилип, жанкүйерлик пенен ис тутыўы пүткил елди, халықты қуўандырады. Президентимиздиң ис тутыў жолы ҳәмме басшыларға, хал­қымызға үлкен мектеп болады, деп ойлайман.

Президентимиздиң бас мақсети — инсан мәпи, жәмийетимиздиң кең көлемли раўажланыўы, оның жоқары жуўапкершилигинен дерек береди. Сонлықтан, 2017-жылды «Халық пенен пикирлесиў ҳәм инсан мәплери жылы» деп атады. Бул Президентимиздиң ең үлкен философиялық пикирлер менен тәмийин етилген реформасы болып есапланады.

Ҳәзирге дейин ҳеш бир мәмлекет басшылары усындай мәнисте, халықтың арзыў-әрманын тыңлап, мүмкиншилиги болғанынша оны қанаатландырыў бойынша реформа қабыл еткен жоқ. Усы жағынан бизиң Президентимиздиң реформасы теңи-тайы жоқ мәмлекет басқарыўда жаңалық болып хызмет етеди.

Халық мәпин ҳәмме ўазыйпалардан жоқары қойыў — бул ақыллы басшының нийети.

Усы мақсетти әмелге асырыў ушын Ташкентте, Қарақалпақстанда, ўәлаятларда, районларда Президент «Халық қабыллаўханалары» шөлкемлестирилген. Буларға басшы етип ең саўатлы, ис-тәжирийбеси жетерли басшылар қойылған. «Қабыллаўхана»ларға келген инсанлардың тилеги, машқалалары илажы болғанынша қанаатландырылады. Кем тәмийинленген хожалықларға жеңиллетилген кредит, турақ жай, майыпларға арбашалар берилип атыр. Бул илажлар Президентимиздиң атап өткениндей «Инсан мәмлекет ушын емес, ал, мәмлекет инсан ушын хызмет етеди».

Президентимиз келешекти терең ойлап халық хожалығының, жәмийетимиздиң ҳәмме тараўлары бойынша ҳәзирги заманға сай ўазыйпаларды анықлап қарарлар, пәрманлар қабыл етип атыр.

Бас мақсет — Елбасшымыз сайлаўалды өзиниң бағдарламасын орынлаў, жәмийетимиздиң кең көлемде раўажланыў мәселелерин толық ҳәм өз ўақтында әмелге асырыў бойынша ис тутыўы оның жоқары жуўапкершилигинен дерек береди.

Қабыл етилген ҳәмме қарарлар, пәрманларды, басшылардан ис талап етиў усылларын бир мақалада баян етиў қыйын ҳәм мүмкин де емес. Солай болса да, айырым қарарларын қысқа түрде баян етиўимиздиң зыяны жоқ.

Ең дәслеп, «Нураный» қорының жумысын жетилистириў, елге хызмет еткен ақсақалларға қолайлы жағдай туўғызыў нәзерде тутылған.

— Қалаларда, аўылларда ҳәзирги заман талабына жуўап берерликтей турақ жайлар қурыў;

— көплеген заводлар, кәрханалар қурыў, елимиздиң экспортлық мүмкиншилигин күшейтиў бойынша ҳәр ўәлаятқа барып, жақын арада жана-жан Өзбекистанымызды индустриал-аграр мәмлекетке  айландырыў мәселелерине үлкен итибар қаратылып атыр.

***

Усының менен бирге, Шавкат Миромонович сайланыўдан кейин көп ўақыт өтпей-ақ, ҳәрқыйлы минис­трликлер, басқа да уйымлар менен артқа қалдырып болмайтуғын мәселелер бойынша ушырасыўлар ҳәм мәжилислер өткерип, басшылардың жуўапкершилигин арттырыў бойынша әмелий илажлар көрди.

Биринши ушырасыў Өзбекистан Илимлер академиясының ағзалары менен болды. Илим раўажланбай халық хожалығы раўажланбайды, деп ҳәзирги илимниң жаңа жетискенликлерин елимизге алып келип, халық хожалығын кескин көтериў мәселесин биринши ўазыйпа етип белгиледи. 

Президентимиз тийкарғы итибарды медициналық мәкемелердиң жумысын пүткиллей жаңаша жолға қойыў, халқымыздың денсаўлығын сақлаў — ең бас ўазыйпа деп белгилеп, медицина хызметкерлерин сынға алды.

Прокуратура хызметкерлери менен ушырасып, нызамның үстинлигин тәмийин етиў мәселесин тиккелей орынлаўды олардан талап етти.

Президентимиз Өзбекистанда жасап атырған 130 миллетлердиң ўәкиллерин жыйнап, халықлар дослығын беккемлеў бойынша алға ўазыйпа қойып, көплеп усыныслар берди.

Усындай ушырасыўлар әдебият, мәденият, көркем өнер, спорт, жаңадан дүзилген жаслар аўқамының ағзалары менен де болды.

Президентимиз ҳәмме ушырасыўларда жақын арада Өзбекистанда барлық раўажланған мәмлекетлер тәжирийбесин тезирек өзлестириў, инвестицияның кирип келиўин тәмийинлеў, солай етип, тезирек раўажланған еллердиң қатарынан орын ийелеўди ўазыйпа етип қойды, бул мәселелерди унамлы шешиў ушын бизде ҳәмме мүмкиншилик бар. 

Буған толық исеним, ҳадал тер төгип, ҳәр ким өз орнында пидайы мийнет етиўди талап етеди.

***

Әлбетте, усы жерде Президентимиздиң Қарақалпақстанға өзиниң айрықша дыққат-итибарын айтып өтиўимиз керек.

Сайлаў алдындағы ушырасыўларды биринши гезекте Қарақалпақстаннан баслады. Сондай-ақ, Президент болып сайланғаннан соң ең алдын Қарақалпақстанға жумыс сапары менен келип, барлық әҳмийетли ўазыйпаларды терең түрде көрип шықты, тийисли шешимлерди қабыл етти. Ол өз сөзинде «мен өзбек ҳәм қарақалпақ халқының перзентимен» деп айтып өткенлиги хал­қымызды үлкен мақтаныш сезимлерине бөледи.

Ал, өзиниң шығып сөйлеўинде мени — Қарақалпақстанның социаллық-экономикалық раўажланыўына салмақлы үлес қосты деп атап өтти. Соның ушын мен бул жоқары баҳасына мың мәрте рахмет айтаман ҳәм  халқыма, елиме ырзаман.

Қарақалпақстанда ең бир ашынарлы машқала — бул Арал апатшылығы. Усы мәселе бойынша алдынғы ўақытлары Орайлық Азия республикаларының басшылары ушырасып, бирнеше мәрте симпозиумлар өткерип, тийисли қарарлар қабыл етти. Бирақ, булар ақырына дейин толық жеткерилмеди.

Ал, Шавкат Миромонович Президент болып сайланғаннан соң биринши гезекте Мойнақ районына өз дыққатын аўдарды, бес айдың ишинде Қоңыраттан Мойнаққа 101 километр водовод қурылды. Суў барғаннан ке­йин ҳәмме халық жыйналып, әсиресе, кексе адамлар бетин суўға жуўып, көзинен жас ағып Президентимизге шексиз миннетдаршылық билдирди.

Мойнақта жумыссыз отырған 252 ҳаял-қызларға жумыс орнын жаратты. Ҳәзир Мойнақта көплеген турақ жайлар, социаллық объектлер ҳәм басқа да қурылыслар иске асырылмақта.

Шавкат Миромонович Бас министр болып ислеген ўақтынан-ақ бизиң пайтахтымыз Нөкис қаласына айрықша дыққатын аўдарып келди. Соңғы жыллары көплеген турақ жайлар, социаллық-мәдений объектлер салынды. Буған бюджеттен ҳәм банклерден қосымша көп қаржылар ҳәм кредитлер ажыратылды. Усы жылдың 20-21- январь күнлери Өзбекистанның көп министрлерин алып келип, Нөкис­те 2 завод, Ибрайым Юсупов атындағы мектебин, балалар медикалық ора­йын, балалар спорт орайын қурыў, Нөкисте мешиттиң реконструкциялаў мәселелерин шешти, тийисли қаржы ажыратып, Нөкис халқын қуўанышқа бөледи.

Қарақалпақстанның халқының тилеги бойынша Шавкат Миромонович Қаратаўда Тебинбулақ массивинде титан-магнетит руда базасында металлургиялық комбинатын қурыў мәселесин шешти. Қаратаўда және еки цемент заводын қурыў нәзерде тутыл­ған.

Жуўмақластырып айтқанда, Өзбекистанның ҳәмме регионларында, әсиресе, Ташкент қаласында үлкен ин­дустриаллық ҳәм социаллық объектлер қурылады.

Президентимиз ҳәмме ўәлаятларға барып, еки күн даўамында республика активлери менен бирге олардың 2017-2021-жыллар арасында әмелге асыратуғын ўазыйпаларын белгилеп, келешекте барлық аймақларда заводлар қурыў, экспортлық мүмкиншиликти кескин кеңейтиў мәселелерин додалап, тийисли шешимлер қабыл етпекте.

Өзбекистанда туризмди жанландырыў ушын үлкен мүмкиншиликлер бар. Сонлықтан, Самарқанд, Бухара, Хийўа қалаларындағы музейлерди оңлаў, мийманханалар қурыў, тағы басқа да заман талабына жуўап берерлик жаңалықлар киргизиў мәселелерине дыққат аўдарып, шешим қабыл етти. Олардың ишине Нөкисте Савицкий атындағы музей де киреди.

Шавкат Миромонович биринши гезекте қоңсы мәмлекетлер менен дослық, татыўлықты беккемлеп, арада пайда болған келиспеўшиликлерди, машқалаларды толығы менен унамлы рәўиште шешти. 

Россия менен дослық қатнасықлар Өзбекистанның тезирек раўажланыўы ушын мүмкиншиликлер туўдырады, усы мақсетти гөзлеп Шавкат Миромонович Россия менен қарым-қатнасты күшейткени бул үлкен жетискенлик.

Президентимиз бас­қа да шет мәмлекетлер менен байланысты күшейтиў мақсетинде халықаралық аренаға шығып, көп әмелий илажларды иске асырып, Өзбекистанның абырай-атағын көтериў үстинде унамлы ислерди атқарып, сыртқы сиясатқа да жетерли кеўил бөлмекте.

Бирлескен Миллетлер Шөлкеминиң 72-сессиясында шығып сөйлеп, Президентимиз халықаралық мәселелерди кең түрде ортаға таслады. Солардың ишинде ең әҳмийетли машқалалар төмендегилерден ибарат:

- мәмлекетлер арасында келиспеўшилик болса, оны урыс-қағыс пенен емес, сөйлесиўлер ҳәм дипломатиялық жолы менен шешиў тийис;

- Ислам тәлийматын таза сақлаўымыз лазым:

- терроризмге, экстремизмге қарсы гүрести күшейтиў керек:

Оларға қатнасыўшылардың көбиси 30 жастан төменги жаслар, оның ушын жаслар тәрбиясына айрықша дыққат аўдарыў зәрүр.

Президентимиздиң БМШ сессиясында шығып сөйлеген сөзи қатнасыўшыларда үлкен қызығыўшылық туўдырды, ҳәмме қоллап-қуўатлады.

Өзбекистан, Қазақстан ҳәм Түркменстан Президентлериниң өтиниши менен БМШтың келисими менен Самарқандта халықаралық конференция өткерилди, 80 мәмлекеттиң ўәкиллери қатнасты. Онда Президентимиз, БМШ тың ўәкили, басқа мәмлекетлердиң  ўәкиллери шығып сөйледи.

Елимиз басшысы өз сөзинде Орайлық Азияны тыныш ҳәм турақлы регионға айландырыў, терроризм, экс­тремизм, наркотрафикке қарсы гүресиўди бириктириў ҳәм күшейтиў мәселелерин көтерди.

Ең әҳмийетли ўазыйпаның бири  — бул Орайлық Азияның мәмлекетлер арасында ҳәмме тараўда тығыз байланыс жасаўдан ибарат.

Президентимиз Аўғанстанда парахатшылықты орнатыў, Аўғанстанды региондағы экономикалық қатнасыўға қосыўды, жәрдем бериўге барлық Орайлық Азия мәмлекетлерин шақырды. Көп жыллардан берли Өзбекистан Корея Республикасы менен экономикалық қатнасықларды раўажландырмақта. Дослық қатнасықларын күшейтиўде буннан 80 жыл бурын елимизге жайласқан кореецлердиң айрықша тәсирин айтып өтиўимиз зәрүр. Олар өткен дәўирде Өзбекистанның раўажланыўына өзиниң салмақлы үлесин қосты.

Ҳәзирги ўақытта қатнасықлар беккемленип атыр. Корея Республикасы Өзбекистанда көп ири кәрханалар қурды. Олардың ишинде Асака автозаводы, Үстирттеги газ-химия ком­плекси ҳәм басқа объектлер, 470 қоспа кәрханалар ислеп тур.

Корея Республикасы менен дипломатиялық қатнасықлар дүзилгенине 25 жыл толды. Соған байланыслы Корея Республикасы Президенти Шавкат Миромоновичти Сеулге мирәт етти. Өзбекистан делегациясы кең қурамда үш күн болып, барлық қатнасықлар бойынша 60 келисимге қол қойылды. Бизиң делегацияны Корея Республикасы үлкен ҳүрмет пенен күтип алды. Президентимизге «Сеул қаласының ҳүрметли пуқарасы» атағын берди.

Келисимлердиң шәрти бойынша Корея Республикасы Өзбекистанға 9 миллиард АҚШ доллар инвестиция бериўге келисим жасады.

Жуўмақластырып айтқанда, еки мәмлекет арасындағы қатнасықлар беккемленип, келешектеги раўажланыўға үлкен мүмкиншилик туўдырды.

Шавкат Миромонович Мирзиёевқа Аллатаала сақыйлық бенен терең ақыл-ойды, жоқары адамгершиликти, дослық қатнасықты күшейтиў уқыбын бергенлигин тән алып, мақтаныш етиўимиз тийис. Өйткени, ислеген бир жылдың ишинде әмелге асырып атырған илажлардың көлеми елди тезирек раўажландырыўға бағдарланған көлемли ўазыйпаларды унамлы шешиўге сөзсиз хызмет етеди.

Халқымыз Президентимиздиң халықаралық майданда елимиздиң мәплерин алға қойыў, сырт мәмлекетлер менен еки ҳәм көп тәреплеме бирге ислесиўди  раўажландырыў, қоңсы мәмлекетлер менен барлық бағдарларда байланысты активлестириў, олар менен жақсы қоңсышылық, дослық, шериклеслик мүнәсибетлерин орнатыў бойынша табанлы сиясатты алып баратырғаны жоқары баҳаға ылайық. Мәмлекетимиз жақын ҳәм узақ сырт еллер менен бирге сиясий, социал-экономикалық, мәдений-гуманитар, илимий-техникалық тараўларда өз-ара пайдалы байланысларды жолға қоймақта. «Жәмийетлик пикир» жәмийетшилик орайының халқымыз арасында өткерген сораўнамасында пуқараларымыздың Президентимизге исеним рейтинги анықланды. Ўатанласларымыздың абсолют көпшилик бөлегиниң атап өткениндей, бүгин мәмлекетимиздиң басшысы халқымыз исенимин ҳәм арзыў-үмитлерин ақлап, елимиз тәғдири ҳәм де журтымыздың пәраўанлығы ушын жуўапкершиликти өз мойнына алған жетекши сыпатында жоқары ҳүрмет-итибарға миясар болмақта. Бул келешеги уллы жолда Ҳүрметли Президентимизге ели-халқымыз бахтына аман болың, Аллатаала ҳәмийше мәдаткар болсын, деп тилек билдиремиз.

Қәллибек  КАМАЛОВ,

мийнет ветераны, «Эл-юрт ҳурмати» ордени ийеси.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF