Еркин Қарақалпақстан Вести Каракалпакстана 17:07:47, 11.12.2017
Хош келипсиз! | RSS
Сайт мазмуны

Кириў усылы

ЖУЎМАҚЛАР ШЫҒАРЫЛЫП, ЎАЗЫЙПАЛАР БЕЛГИЛЕНДИ

Нөкисте Өзбекистан ветеранларын социаллық қоллап-қуўатлаўшы «Нураный» қоры Қарақалпақстан Республикалық Кеңесиниң кеңейтилген мәжилиси болып, оған тийисли министрликлер менен ведомстволардың, мәпдар шөлкемлердиң, қордың қалалық ҳәм  районлық бөлимлериниң басшылары, ғалаба хабар қуралларының ўәкиллери қатнасты.

Илажды «Нураный» қоры Қарақалпақстан Республикалық Кеңесиниң баслығы Ш.Уснатдинов ашты ҳәм күн тәртибиндеги мәселелер бойынша баянат жасады.

Мәжилисте атап өтилгениндей, Өзбекистан  ветеранларын  социаллық  қоллап-куўатлаў «Нураный»  қорынын  Қарақалпақстан Республикалық бөлими тәрепинен елимизде қабыл етилген Президентимиздиң пәрман ҳәм қарарларының орынланыўы бойынша  бир қанша нәтийжели  жумыслар  алып барылды. Быйыл­ғы «Инсан мәплери ҳәм халық пенен пикирлесиў жылы» Мәмлекетлик бағдарламасында белгиленген ўазыйпалардың орынланыўы бойынша жәмийетимиздиң нураный ағзалары ушын қолайлы шөлкемлестириўшилик-ҳуқықый шараятлар жаратыўға қаратыл­ған нызамшылық нормативлик-ҳуқықый базалар беккемленип, социаллық қоллап-қуўатлаў системасын жетилистириў, кекселерге ҳәр тәреплеме жәрдем көрсетиў бойынша әмелий илажлар көрилмекте.

Мәжилистиң күн тәртибинде еки мәселе, яғный, Өзбекистан ветеранларын  социаллық  қоллап-қуўатлаў «Нураный» қорының  Қарақалпақстан бөлими тәрепинен бир жыл даўамында  исленген  жумыслар ҳәм жаслар менен ислесиў, олар арасындағы ҳуқық­бузарлықлардың алдын алыў, шаңарақлардағы тынышлық ҳәм татыўлықтың турақлылығын тәмийинлеўде «Нураный» қоры тәрепинен алып барылған  жумысларға итибар қаратылды.

Есап бериў мәжилисинде  бүгинги күнге шекем  екинши жер жүзилик урыс қатнасыўшылары, мийнет фронты ветеранлары, 100 жастан асқан  нураныйларды ҳәм жеке баслы  кекселердиң ҳал-жағдайларынан  хабар алынғанлығы оларды социаллық ҳәм руўхый жақтан қоллап-қуўатлаў бойынша  алып барылған  жумыслар  кеңнен додаланды. Бөлим тәрепинен бир қатар мәкеме шөлкемлер менен биргеликте  быйылғы «Халық пенен пикирлесиў ҳәм инсан мәплери жылы»нда  белгиленген ўазыйпаларды орынлаў мақсетинде муўапықластырыўшы  комиссия дүзилип,  316 жумысшы топар тәрепинен  43 мыңнан аслам шаңарақ  жағдайлары  үйренип шығылды. Үйрениўлер нәтийжесинде  5301 шаңарақтың социаллық қоллап-қуўатлаўға болған мүтәжлиги анықланып, соннан 901 шаңарақтың  жағдайын  жақсылаўға қара­тыл­ған жумыслар әмелге асырылды.  Ал, 2591  шаңараққа  өз исбилерменлигин  раўажландырыўы ушын  банклерден  жеңиллетилген кредитлер алыўына  жәрдем көрсетилди.  Және де  135  шаңарақ ағзалары  диний  экстремистлик  дизимнен шығарылып, олардың    бәнтлиги  тәмийинленди. Төрт екинши жер жүзилик урыс қатнасыўшысына жасаў жағдайларын жақсылаў мақсетинде жаңадан меншик жай сатып алып берилди. 

Мәжилис даўамында  Президентимиз  Шавкат Мирзиеёв тәрепинен усы жылдың  22-23-июнь  күнлери  Ферғана ўәлаятына  сапары ўақтында  жасларға   тәлим-тәрбия бериў, олар арасында  ҳуқықбузарлықтың  алдын алыў, нураныйлардың  бай өмирлик   тәжирийбесин  жаслар арасында  талқылаў ҳәм үгит-нәсиятлаў, шаңарақларда  жәми­йетлик  руўхый  орталықты  жақсылаў бойынша  берген  анық  тапсырмалардың орынланыўын тәми­йинлеў мақсетинде  «Нураный»  қорының  Қарақалпақстан Республикалық  бөлими тәрепинен  исленген  жумыслар  бойынша есап берилди.

Мәжилис соңында  «Нураный» қоры Қарақалпақстан Республикасы бөлиминиң алдағы  ўазыйпалары  белгиленип алынды.

Илажда Қарақалпақстан Республикасы   Жоқарғы Кеңеси Баслығының  орынбасары А.Ҳамраев кең түрде шығып сөйледи.

Мәжилиске Қарақалпақстан Республикасы Минис­трлер Кеңеси Баслығының орынбасары М.Әлеўов, Өзбекистан ветеранларын социаллық қоллап-қуўатлаўшы «Нураный» қоры баслығының орынбасары Ш.Усманов қатнасты.

Қарақалпақстан хабар агентлиги.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF