Еркин Қарақалпақстан Вести Каракалпакстана 11:35:50, 28.03.2020
Хош келипсиз! | RSS
Сайт мазмуны

Кириў усылы

НАЎҚАСЛАР МҮШКИЛИН ЖЕҢИЛЛЕТИЎ ЖОЛЫНДА

Президентимиз Ш.Мирзиёев өзиниң ҳәр бир баянаты ҳәм шығып сөйлеўинде, халық пенен ушырасыўларында халқымызды разы етиў ушын бәринен бурын оның сапалы медициналық хызметке болған талабын қанаатландырыў оғада зәрүр екенлигин айрықша атап өтпекте.

Әсиресе, бул тараўда бәринен бурын қыстаўлы медицина саласындағы нормативлик ҳуқықый ҳүжжетлерди жетилистириў, материаллық-техникалық базаны беккемлеў, илимий қолланбаларды раўажландырыў, маман кадрлар, дәри-дәрмақлар, медициналық үскенелер, қәнигелестирилген автотранспорт ҳәм байланыс қураллары менен тәмийинлеў дәрежесин жақсылаў әҳмийетли мәселе болып қалмақта.

Усы мақсетте қабыл етилген Өзбекистан Республикасы Президентиниң «Қыстаўлы медициналық жәрдемди буннан былай да жетилистириў илажлары ҳаққында»ғы Пәрманы тийкарында Кегейли районлық медицина бирлеспесинде де бир қатар унамлы жумыслар әмелге асырылмақта. Бүгинги күни 88 мыңнан аслам халыққа хызмет көрсетип киятырған бирлеспениң тез жәрдем бөлими «Кегейли», «Халқабад», «Жалпақжап», «Абат», «Қазанкеткен» ҳәм «Порлытаў» елатларында өзиниң шақапша постларына ийе болып, оларда 32 шыпакер ҳәм 36 фельдшер мийнет етип келмекте.

— Усы жылдың май айын­да бөлимимиз жаңа «Дамас» тез жәрдем автомашинасы менен тәмийинленди,-дейди бизге бөлим меңгериўшиси Ташкентбай Қалиев. — Наўқасларға керекли болған дәри-дәрмақлар республикалық қыстаўлы медициналық жәрдем илимий орайы тәрепинен орайластырылған тәртипте жеткерилип берилмекте. Деген менен, «Кегейли» тез жәрдем постында тек ғана бир автомашина болғанлықтан жумыс барысында автотранспорттың жетиспеўшилиги сезиледи. Алдағы ўақытлары бул машқала да өз шешимин табатуғынына исенемиз...

Ҳақыйқатында да, жоқарыда аты көрсетилген тез жәрдем шақапшасы бүгинги күни район орайы, «Ақтуба» ҳәм «Кегейли» аўыл пуқаралар жыйыны аймағында жасаўшы 27 мыңнан аслам халыққа медициналық хызмет көрсетеди. Аймақта халық санының көплиги ҳәм олардың шашаў жайласқанлығы себепли бөлим хызметкерлери наўқаслардың шақырыўларына өз ўақтында жетип бара алмаўы гүзетилмекте. Жақын ўақытлар ишинде биз де бөлим меңгериўшиси сыяқлы тийисли тараў басшылары тәрепинен бул машқаланың унамлы шешими табылып, автотранспорт жетиспеўшилиги сапластырылатуғынлығына исенип қаламыз.

Ә.ОРАЗОВ, арнаўлы  хабаршымыз.

Кегейли районы.

СҮЎРЕТЕ:  Бөлим меңгериўшиси Т.Қалиев, фельдшер Ж.Аяпов ҳәм автотранспорт басқарыўшысы Б.Алланиязовлар нәўбеттеги шақырыққа асықпақта.

Автордың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF