Еркин Қарақалпақстан Вести Каракалпакстана 10:31:00, 18.11.2017
Хош келипсиз! | RSS
Сайт мазмуны

Кириў усылы

КЛАРА — ЖӘҲӘН ЧЕМПИОНЫ

Ҳәзирги ўақытта спортшыларымыз ха­лықаралық майданларда дүньяның ең алдын­ғы саптағы спортшылары менен гүреске түсип, өз жеңислери менен халқымызды қуўаныш­қа бөлеп келмекте. Бүгин бизлер дерлик ҳәр күни ғалаба хабар қураллары арқалы спортшыларымыздың жәҳән ареналарында қолға киргизип атырған табыслары ҳаққында еситип жүрмиз. Әлбетте, бул, елимизде дене тәрбиясы ҳәм спортқа қаратылып атыр­ған үлкен дыққат-итибардың нәтийжеси.

Қуўанышлы тәрепи, дүнья спорт майданларында елимиз байрағын желбиретип атырған мине усындай спортшыларымыздың қатары жыл сайын көбеймекте.

Усы жылдың 12-16-октябрь күнлери Сербия мәмлекетиниң Нови сад қаласында жаслар арасында самбо бойынша жәҳән чемпионаты болып өтти. Дүньяның 50 ге жақын мәмлекетиниң 360 тан аслам күшли палўанлар чемпионлық ушын гүрескен жәҳән чемпионатына Өзбекистан сайланды командасы қурамында қатнасқан жерлесимиз, Қарақалпақ мәмлекетлик университетиниң 1-курс студенти Клара Дәрменбаева польшалы, сербиялы ҳәм россиялы қарсыласлары үстинен жеңиске ерисип, алтын медаль ийесине айланды ҳәм бул спорт түринен қарақалпақ қызлары арасынан шыққан туңғыш жәҳән чемпионы атанды.

Спорттың самбо түри менен бир неше жыллардан берли устазы Байрам Досбергеновтан сабақ алып, өткен дәўир ишинде бир неше мәрте Қарақалпақстан ҳәм Өзбекистан чемпионлығын қолға киргизген палўан қызымыз  өткен жылы Түркменстан Республикасында, ал, усы жылдың июнь айында Ташкент қаласында өткерилген Азия чемпионатларында алтын, сондай-ақ, өткен жылы Румынияда болып өткен жәҳән чемпионатында гүмис медаль ийесине айлан­ған еди.

20-октябрь күни Нөкис халықаралық аэропортында Клара Дәрменбаева кең жәмийетшилик ўәкиллери тәрепинен салтанатлы жағдайда күтип алынды. Мәресимде сөзге шыққан Қарақалпақстан Республикасы Дене тәрбиясы ҳәм спорт бойынша мәмлекетлик комитети баслығы Ғ.Байниязов ҳәм басқалар спортшы қызымызды ерискен бул табысы менен қызғын қутлықлап, усы пәтти жаздырмай, алдында күтип тур­ған үлкен халықаралық жарыслардан да ҳәмийше алтын медальлар менен қайтып, өз жеңислери менен халқымызды қуўаныш­қа бөлей бериўине тилеклеслик билдирди.

 

Саламат  ГҮЛИМБЕТОВ.

СҮЎРЕТТЕ: Клара Дәрменбаева тренери Б.Досбергенов пенен.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF