Еркин Қарақалпақстан Вести Каракалпакстана 10:31:36, 18.11.2017
Хош келипсиз! | RSS
Сайт мазмуны

Кириў усылы

БАЯНАТТЫҢ МАЗМУН - ӘҲМИЙЕТИ ҮЙРЕНИЛДИ

Жақында Өзбекистан «Миллий тикланиш» демократиялық партиясы Қарақалпақстан Республикасы Кеңеси ҳәм Бердақ атындағы Қарақалпақ мәмлекетлик университети тәрепинен биргеликте  Өзбекистан Республикасы Президенти Ш.Мирзиёевтиң усы жылы 19-сентябрьде БМШ Бас Ассамблеясының 72-сессиясында шығып сөйлеген баянатының мазмуны ҳәм әҳмийетин үйрениўге бағышлан­ған семинар шөлкемлестирилди.

Онда Қарақалпақстан Республикасы Жоқарғы Кеңеси депутатлары, ӨзМТДП Қарақалпақстан Республикасы кеңеси Атқарыў комитети аппараты хызметкерлери, Бердақ атындағы Қарақалпақ мәмлекетлик университети профессор-оқытыўшылары ҳәм студент-жаслары, партия белсендилери ҳәм ғалаба хабар қуралларының ўәкиллери қатнасты.

Семинарда Қарақалпақстан Республикасы Жоқарғы Кеңесиниң депутаты, Жазыўшылар аўқамы баслығы К.Каримов, Өзбекистан Жаслар аўқамы Нөкис қалалық Кеңеси баслығының орынбасары А.Абибуллаев, ӨзМТДП Қарақалпақстан Республикасы атқарыў комитети аппараты баслығы Л.Абдимуратов ҳәм университеттиң ҳуқықтаныў факультети аға оқытыўшысы Д.Сапаровлар шығып сөйлеп, усы баянаттың үлкен әҳмийетке ийе екенлиги ҳаққында өз пикирлерин билдирип өтти.

Шығып сөйлеўшилердиң атап өткениндей, Президентимиздиң Америка Қурама Штатларына сапары, БМШ Бас Ассамблеясының 72-сессиясында жасаған бая­наты халқымызда шексиз мақтаныш сезимлерин оятты. Баянат мазмуны ҳәм әҳмийети жағынан айрықша ажыралып, қысқа болыўына қарамастан, заманымыздың ең актуал темаларын қамтып алды. Өзбекистандағы реформалар, демократия, инсан ҳуқықлары, жаслар мәселеси, диний кеңпейиллик, халық­аралық қәўипсизлик, экология темалары да шетте қалмаған.

Илаж соңында студент-жаслар тәрепинен берилген сораўларға толық ҳәм анық жуўаплар қайтарылды.

У.ҚОШҚАРОВА,

ҚМУ Журналистика тәлим бағдарының 4-курс студенти.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF