Еркин Қарақалпақстан Вести Каракалпакстана 10:22:32, 18.11.2017
Хош келипсиз! | RSS
Сайт мазмуны

Кириў усылы

 «ҚЫЗ БАЛА — БОЛАЖАҚ ШАҢАРАҚ БИЙКЕСИ, КЕЛЕШЕГИМИЗ ИЙЕСИ»

Соңғы жылларда елимизде жүз берип атырған үлкен өзгерислер менен жаңаланыўларда жаслар айрықша орынды ийелейди. Сонлықтан да жаслар мәселеси мәмлекетлик сиясат дәрежесине көтерилгени тосыннан емес.

Жақында пайтахтымыздағы «Жаслар орайы»нда Өзбекистан жаслар аўқамы Қарақалпақстан Республикалық Кеңеси ҳәм Өзбекистан Ҳаял-қызлар комитетиниң шөлкемлестириўинде 11-октябрь — Халық­аралық қызлар күнине бағышланып «Қыз бала — болажақ шаңарақ бийкеси, келешегимиз ийеси» ураны астында I республикалық қызлар фестивалы болып өтти.

 Фестивальға Өзбекистан жаслар аўқамы ҳәм Өзбекистан Ҳаял-қызлар комитети, белсенди жаслар, сондай-ақ, жәмлеспеген қызлар, Халық билимлендириў министрлиги, жоқары оқыў орынлары, орта арнаўлы кәсиплик билимлендириў басқармасына қараслы билимлендириў мәкемелери ҳәм басқа да жәмийетлик шөлкемлерден ўәкиллер қатнасқан бул илажды Өзбекистан жаслар аўқамы Қарақалпақстан Республикалық Кеңеси баслығы А.Данияров кирис сөз бенен ашты. Буннан соң Қарақалпақстан Республикасы Руўхыйлық ҳәм ағартыўшылық орайы баслығы Ш.Аяпов, Министрлер Кеңеси Баслығының орынбасары, Ҳаял-қызлар комитети баслығы З.Ибрагимова ҳәм басқалар фестиваль қатнасыўшыларын қутлықлап, келешектеги жумысларында ҳәм оқыўларында табыслар тиледи.

Тийкарғы мақсети — қызлардың билим алыўға болған қызығыўшылығын, жәми­йетлик-сиясий белсендилигин күшейтиў, инталы қызлар қатарын кеңейтиў, сондай-ақ, жәмлеспеген қызларды ҳәр тәреплеме қоллап-қуўатлаў, олардың кийиниў ҳәм қарым-қатнас мәдениятын арттырыў, оларды идеялық қәўиплерден қорғаў, әмелге асырылып атырған реформаларға белсенди мүнәсибетин қәлиплестириў, саламат турмыс тәризин  үгит-нәсиятлаўдан ҳәм шаңараққа таярлаўдан ибарат болған бул фес­тивальда Қарақалпақстан Жазыўшылар аўқамы, Репродуктив саламатлық орайы, Руўхыйлық ҳәм ағартыўшылық орайы, Денсаўлықты сақлаў министрлигинен ўәкиллер қатнасып, ҳәр қыйлы темаларда баянатлар жасады.

Фестиваль шеңберинде қатнасыўшылар инталы қызлардың дөретиўшилик мийнетлери, исбилермен қызлардың өнимлери ҳәм спортшы қызлардың жетискенликлери көргизбесин, сондай-ақ, жәмлеспеген қызлар арасында өткерилген «Билим-ринг» интеллектуал ойыны ҳәм шахмат жарысларын қызығыўшылық пенен тамашалады.

Елимизде жасларға байланыслы алып барылып атырған сиясаттың әмелий көриниси болған бул фестиваль көркем өнер шеберлериниң атқарыўындағы қызықлы концерт бағдарламасы менен жуўмақланып, қатнасыўшыларда айрықша тәсир қалдырды.

 

Н.САДУЛЛАЕВА,

ҚМУ журналистика тәлим бағдарының 4-курс студенти.

СҮЎРЕТТЕ: фестивальдан көринис.

М.ҲАБИБУЛЛАЕВтың түсирген сүўрети.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF